World Cup 2023: నెదర్లాండ్స్‌తో మ్యాచ్.. ఆ ఆల్‌టైమ్ రికార్డ్‌ను కోహ్లీ సాధించేనా..?

IND vs NED: వన్డే ప్రపంచకప్ 2023లో వరుస విజయాలతో జోరు మీదున్న టీమిండియా.. చివరి లీగ్ మ్యాచ్‌కు సిద్దమైంది. బెంగళూరు వేదికగా ఆదివారం జరిగే మ్యాచ్‌‌‌లో నెదర్లాండ్స్‌తో అమీతుమీ తేల్చుకోనుంది. ఇప్పటికే సెమీస్‌కు అర్హత సాధించిన టీమిండియా.. ఈ మ్యాచ్‌ను సన్నాహకంగా వాడుకోనుంది. ఈ క్రమంలో బెంచ్ బలాన్ని పరీక్షించే అవకాశం ఉంది.

అశ్విన్, ఇషాన్ కిషన్, శార్దూల్ ఠాకూర్‌లతో పాటు ప్రసిద్ కృష్ణాలను బరిలోకి దించనుంది. విన్నింగ్ కాంబినేషన్‌ను మార్చవద్దని భావిస్తే మాత్రం తుది జట్టులో ఎలాంటి మార్పులు చోటు చేసుకునే అవకాశం లేదు.

ఈ మ్యాచ్‌ ఓడినా.. గెలిచినా టీమిండియా కలిగే నష్టం ఏం లేదు. కానీ కీలక సెమీస్ పోరుకు ముందు ఓడితే జట్టు ఆత్మవిశ్వాసం సన్నగిల్లే అవకాశం ఉంది. అంతేకాకుండా పసికూన చేతిలో ఓడారనే అపరాధన ఆటగాళ్ల ప్రదర్శనపై ప్రభావం చూపనుంది. ఈ క్రమంలోనే ఈ మ్యాచ్‌ను ఏ మాత్రం లైట్ తీసుకోవద్దని టీమిండియా భావిస్తోంది.

విరాట్ కోహ్లీ 50వ సెంచరీ కొట్టేనా..:
ఈ మ్యాచ్‌లో టీమిండియా విజయం కంటే విరాట్ కోహ్లీ 50వ సెంచరీ సాధిస్తాడా? అనేదే చర్చనీయాంశంగా మారింది. బెంగళూరులోని చిన్నస్వామి స్టేడియం బ్యాటింగ్‌కు స్వర్గధామంగా ఉండటం.. ఈ గ్రౌండ్ విరాట్ కోహ్లీకి సెకండ్ హోమ్ గ్రౌండ్ కావడంతో 50 సెంచరీ బాదడం ఖాయమని ఫ్యాన్స్ భావిస్తున్నారు.

సౌతాఫ్రికాతో మ్యాచ్‌లోనే 49వ సెంచరీ బాది సచిన్ రికార్డ్ సమం చేసిన కోహ్లీ.. మరో శతకం బాదితే ఆల్‌టైమ్ రికార్డు అందుకోనున్నాడు. అంతేకాకుండా ఈ ప్రపంచకప్‌లో అత్యధిక పరుగులు సాధించిన బ్యాటర్ల జాబితాలో విరాట్(543) మూడో స్థానంలో ఉన్నాడు. క్వింటన్ డికాక్(591) అగ్రస్థానంలో కొనసాగుతున్నాడు.

తుది జట్లు(అంచనా)
భారత్: రోహిత్ శర్మ(కెప్టెన్), శుభ్‌మన్ గిల్, విరాట్ కోహ్లీ, కేఎల్ రాహుల్/ఇషాన్ కిషన్, సూర్యకుమార్ యాదవ్, జడేజా/అశ్విన్, కుల్దీప్ యాదవ్, షమీ, సిరాజ్, బుమ్రా/ప్రసిద్ద్

నెదర్లాండ్స్: వెస్లీ బర్రెసి, మ్యాక్స్‌ ఓడౌడ్, కొలిన్ అకెర్‌మన్, స్కాట్ ఎడ్వర్డ్స్(కెప్టెన్), బాస్ డిలీడే, తేజా నిడమనూరు, లొగన్ వాన్ బీక్, వాండర్ మెర్వ్, ఆర్యన్ దత్, వాన్ మీకెరెన్