WI vs SA: నిప్పులు చెరిగిన షమర్ జోసెఫ్.. 10 ఇన్నింగ్స్‌ల్లో మూడు 5 వికెట్ హాల్స్! (వీడియో)

వెస్టిండీస్ యువ పేసర్ షమర్ జోసెఫ్ నిప్పులు చెరిగాడు. సొంతగడ్డపై సౌతాఫ్రికాతో జరుగుతున్న రెండో టెస్ట్‌లో సంచలన బౌలింగ్‌తో(5/33) ఐదు వికెట్ల ఘనతను అందుకున్నాడు. ఇందులో మూడు వికెట్లు క్లీన్ బౌల్డ్ కావడం విశేషం. సొంతగడ్డపై అతనికి ఇదే తొలి 5 వికెట్ హాల్ కావడం గమనార్హం. కేవలం 10 ఇన్నింగ్స్‌ల తన టెస్ట్ కెరీర్‌లోనే షమర్ జోసెఫ్ మూడు సార్లు ఐదు వికెట్ల ఘనతను అందుకున్నాడు.

ఆస్ట్రేలియాతో అరంగేట్ర సిరీస్‌లోనే షమర్ జోసెఫ్ రెండు సార్లు 5 వికెట్ల ఘనతను అందుకున్నాడు. కెరీర్ ఫస్ట్ టెస్ట్‌లోనే 5 వికెట్లతో నిప్పులు చెరిగాడు. సౌతాఫ్రికాతో రెండో టెస్ట్‌లోనూ బ్యాటర్ల‌ను ఇబ్బంది పెట్టాడు. ప్రస్తుతం అతని బౌలింగ్‌కు సంబంధించిన వీడియోలు నెట్టింట వైరల్‌గా మారుతున్నాయి. షమర్ జోసెఫ్ వేసిన కళ్లు చెదిరే ఇన్ స్వింగర్‌కు ఎయిడెన్ మార్క్‌రమ్ క్లీన్ బౌల్డ్ అయ్యాడు.

ఆ బంతిని ఆడే ప్రయత్నం కూడా మార్క్‌రమ్ చేయలేదు. చూస్తూ నిలబడిపోయాడు. ప్రస్తుతం ఈ వికెట్‌కు సంబంధించిన వీడియో నెట్టింట వైరల్‌గా మారింది. షమర్ జోసెఫ్ ధాటికి ముందుగా బ్యాటింగ్ చేసిన సౌతాఫ్రికా 160 పరుగులకు కుప్పకూలింది. యువ ప్లేయర్ డేన్ పైడెట్(60 బంతుల్లో 4 ఫోర్లు, సిక్స్‌తో 38 నాటౌట్) అజేయంగా నిలవగా.. బెడింగ్‌హామ్(28), ట్రిస్టన్ స్టబ్స్(26), వెర్రెన్(21) పోరాడే ప్రయత్నం చేశారు.

సౌతాఫ్రికా బౌలర్లలో షమర్ జోసెఫ్‌తో పాటు జైడెన్ సీల్స్(3/45), మోతీ(1/28), హోల్డర్(1/26) తలో వికెట్ తీసారు. అనంతరం తొలి ఇన్నింగ్స్ ప్రారంభించిన వెస్టిండీస్ తొలి రోజు ఆట ముగిసే సమయానికి 28.2 ఓవర్లలో 7 వికెట్లకు 97 పరుగులే చేసింది. కీసీ కార్టీ(26), జాసన్ హోల్డర్(33 బ్యాటింగ్) టాప్ స్కోరర్లుగా నిలిచారు. ఇంకా వెస్టిండీస్ 63 పరుగుల వెనుకంజలో ఉంది. సౌతాఫ్రికా బౌలర్లలో వియాన్ మల్డర్(4/18) నాలుగు వికెట్లు తీయగా.. నండ్రే బర్గర్(2/32) రెండు వికెట్లు పడగొట్టాడు. ఇరు జట్ల మధ్య జరిగిన తొలి టెస్ట్ డ్రా అయ్యింది.