‘విజ్డెన్‌’లో రోహిత్‌కు చోటు లేదా?.. యాషెస్ కంటే ప్రపంచకప్ పెద్దది..

ఇది ఆశ్చర్యం..

‘వరల్డ్‌కప్‌లో ఏకంగా ఐదు సెంచరీలు చేసిన రోహిత్‌ పేరును విజ్డన్ జాబితాలో లేకపోవడం ఏంటో తనకు అర్థం కాలేదని లక్ష్మణ్‌ తెలిపాడు. ‘యాషెస్ సిరీస్ ముఖ్యమైందే కావొచ్చు. కానీ ప్రపంచకప్ దాని కంటే పెద్దది. అలాంటి టోర్నీలో రోహిత్ ఐదు సెంచరీలు బాదాడు. కఠినమైన సౌతాంప్టన్ పిచ్‌పై దక్షిణాఫ్రికాతో మ్యాచ్‌లో ఇతర ఆటగాళ్లు పరుగులు చేయడానికి కష్టపడితే.. అతను మాత్రం అద్భుతంగా ఆడి సెంచరీ చేశాడు. పాకిస్థాన్‌తో మ్యాచ్‌లోనూ కీలక ఇన్నింగ్స్ ఆడాడు. అలాంటి ఆటగాడిని పరిగణలోకి తీసుకోకపోవడం ఆశ్చర్యకరం. విజ్డెన్‌ జాబితాలో రోహిత్‌ పేరు లేకపోవడం క్రికెట్‌‌ను ఇష్టపడే ప్రతి ఒక్కరినీ షాక్‌కు గురిచేసింది. 'అని వీవీఎస్‌ అసహనం వ్యక్తం చేశాడు.

కోహ్లీకి బెన్ ‘స్ట్రోక్'

2016,2017,2018 వ‌రుస‌గా మూడేళ్ళు విజ్డ‌న్ రారాజుగా నిలిచిన విరాట్ కోహ్లీకి ఇంగ్లండ్ క్రికెట‌ర్ బెన్ స్టోక్స్ పెద్ద షాక్ ఇచ్చాడు. వన్డే ప్రపంచకప్ ఫైనల్లో అద్భుత ప్ర‌ద‌ర్శ‌న‌తో తన జట్టును విశ్వవిజేతగా నిలిపిన ఈ ఇంగ్లండ్ ఆల్‌రౌండర్ 2020 విజ్డన్ లీడింగ్ క్రికెటర్ ఆఫ్ ది ఇయర్‌గా ఎంపికయ్యాడు. దీంతో కోహ్లీ జైత్ర‌యాత్ర‌కి స్టోక్స్ బ్రేక్ వేసినట్లయింది.

2005లో ఇంగ్లండ్ తరఫున విజ్డన్ లీడింగ్ క్రికెటర్ ఆఫ్ ది ఇయర్‌గా మాజీ ప్లేయ‌ర్ ఆండ్రూ ఫ్లింటాఫ్ ఎంపిక కాగా, ఈ అరుదైన గౌర‌వాన్ని అందుకున్న తొలి ఇంగ్లీష్ ప్లేయ‌ర్‌గా నిలిచాడు. ఇప్పుడు బెన్ స్టోక్స్ త‌ర్వాతి స్థానంలో నిలిచాడు. న్యూజిలాండ్‌తో జ‌రిగిన వరల్డ్ కప్ ఫైనల్లో స్టోక్స్ 84(98 బంతుల్లో) పరుగులతో అద్భుత ప్రదర్శనతో ఆకట్టుకున్న విషయం తెలిసిందే.

జీవితాంతం గుర్తుండిపోయే..

ప్రపంచకప్ ఫైనల్, యాషెస్ సిరీస్‌లో స్టోక్స్ జీవితాంతం గుర్తుండిపోయే అత్యుత్తమ ప్రదర్శనలు ఇచ్చాడని విజ్డన్ ఎడిటర్ లారెన్స్ బూత్ తెలిపాడు.అత‌ను అసాధారణ ఆట ఆడాడ‌డ‌ని చెప్పుకొచ్చాడు. ఇక మహిళల విభాగంలో ఆస్ట్రేలియా ఆల్‌రౌండర్ ఎల్లిస్ పెర్రీ విజ్డన్ లీడింగ్ మహిళా క్రికెటర్‌గా నిలిచింది. విజ్డన్ అత్యత్తుమ ఐదుగురు ప్లేయర్ల జాబితాలో ఇంగ్లండ్ పేసర్ జోఫ్రా ఆర్చర్, ఆస్ట్రేలియా పేసర్ ప్యాట్ కమిన్స్, ఎల్లిస్ పెర్రీ, సిమన్ హర్మర్, మార్నస్ లబుషేన్ చోటు దక్కించుకున్నారు. విజ్డన్ టీ20 లీడింగ్ క్రికెటర్‌గా వెస్డిండీస్ విధ్వంసకర ప్లేయర్ ఆండ్రూ రసెల్ ఎంపికయ్యాడు. హెడింగ్లీలోని బెన్ స్టోక్స్ ఫోజ్.. విజ్డన్ ఫొటోగ్రాఫ్ ఆఫ్ ది ఇయర్‌గా ఎంపికైంది.