ఈ సీజన్‌లో సన్‌రైజర్స్ హైదరాబాద్ చేసిన ఘోర తప్పిదం ఇదే: వీరేంద్ర సెహ్వాగ్

వార్నర్‌ను పక్కనపెట్టి..

డేవిడ్ వార్నర్‌ పట్ల సన్‌రైజర్స్‌ హైదరాబాద్ వ్యవహరించిన తీరు సరికాదన్నాడు.'ఏం జరిగిందన్న విషయంతో సంబంధం లేకుండా డేవిడ్ వార్నర్‌ను సన్‌రైజర్స్ రిటైన్ చేసుకోవాల్సింది. ఒకవేళ డేవిడ్ వార్నర్ స్థానంలో భారత ఆటగాడే ఉంటే అతన్ని తప్పించేవారా? ముమ్మాటికి అతన్ని కొనసాగించేవారు. వార్నర్‌కు సన్‌రైజర్స్‌ మేనేజ్‌మెంట్ మద్దతుగా నిలవాల్సింది. ఒకవేళ వారు అలా చేసి ఉంటే వార్నర్‌ కచ్చితంగా సన్‌రైజర్స్‌తోనే ఉండేవాడు. ఏదేమైనా డేవిడ్‌ వార్నర్‌ను వదులుకుని సన్‌రైజర్స్‌ పెద్ద తప్పే చేసింది.

ఒక్క సీజన్‌కే..

కేవలం ఒక్క సీజన్‌ సరిగ్గా ఆడనంత మాత్రాన అతని పట్ల మరీ ఇంత దారుణంగా వ్యవహరించడం సరైనది కాదు. ప్రతి క్రికెటర్‌కు గడ్డు పరిస్థితులు సహజం. విరాట్‌ కోహ్లీ చివరి మ్యాచ్‌లో అర్ధ శతకం సాధించి ఉండకపోతే.. ఈ సీజన్‌ అతనికి చేదు జ్ఞాపకంగా మిగిలేది. విఫలమైనంత మాత్రాన కోహ్లీని బెంగళూరు వదిలేయదు? పక్కనపెట్టలేదు కదా?. వార్నర్‌కు అండగా ఉండి ఉంటే ఈ రోజు సన్‌రైజర్స్‌కు ఈ పరిస్థితి వచ్చేది కాదు. ఈ సీజన్‌లో వార్నర్ అద్బుత ప్రదర్శనతో దూసుకెళ్తున్నాడు. అతనో మంచి ప్లేయర్'అని వీరేంద్ర సెహ్వాగ్‌ కొనియాడాడు.

డగౌట్‌లోకి కూడా రాణించకుండా..

గత సీజన్‌లో దారుణంగా విఫలమైన వార్నర్ పట్ల సన్‌రైజర్స్ మేనేజ్‌మెంట్ అమానుషంగా ప్రవర్తించిన విషయం తెలిసిందే. మనీశ్ పాండే విషయంలో టీమ్ మేనేజ్‌మెంట్ తీరును బాహటంగా తప్పుబట్టాడనే ఆగ్రహంతో అతన్ని కెప్టెన్సీ బాధ్యతల నుంచి తప్పించడంతో పాటు జట్టు నుంచి పక్కనపెట్టింది. 2016లో జట్టుకు టైటిల్ అందించాడనే సోయి లేకుండా ఘోరంగా అవమానించింది. కనీసం టీమ్ డగౌట్‌లోకి కూడా అనుమతించలేదు.

కసితీర చెలరేగాడు..

ఇక తనను అవమానించిన సన్‌రైజర్స్‌ హైదరాబాద్‌ ఫ్రాంఛైజీకి వార్నర్ బ్యాట్‌తోనే సమాధానం చెప్పాడు. ఢిల్లీ, సన్‌రైజర్స్ మధ్య జరిగిన మ్యాచ్‌లో వార్నర్ కసితీర చెలరేగాడు. విధ్వంసకర బ్యాటింగ్‌తో 92 పరుగులతో అజేయంగా నిలిచి సన్‌రైజర్స్‌ను చిత్తు చేశాడు.

ఐపీఎల్ 2022 మెగావేలానికి ముందు హైదరాబాద్‌ వార్నర్‌ను వదిలేయగా.. ఢిల్లీ క్యాపిటల్స్‌ ఐపీఎల్‌-2022 మెగా వేలంలో 6.25 ​కోట్ల రూపాయలకు కొనుగోలు చేసింది. లేట్‌గా ఎంట్రీ ఇచ్చిన ఈ ఓపెనర్‌ బ్యాటర్‌ దుమ్ములేపే ప్రదర్శనతో ఆకట్టుకుంటున్నాడు. ఆడిన 11 మ్యాచ్‌లలో 427 పరుగులు చేశాడు. అత్యధిక స్కోరు 92 నాటౌట్‌. అది కూడా సన్‌రైజర్స్‌పైనే కావడం గమనార్హం.