Virat kohli ఖాతాలో మరో అరుదైన ఘనత!

అహ్మదాబాద్: టీమిండియా మాజీ కెప్టెన్, రన్ మెషిన్ విరాట్ కోహ్లీ మరో అరుదైన ఘనతను అందుకున్నాడు. అంతర్జాతీయ వన్డేల్లో సొంతగడ్డపై 5 వేల పరుగుల మైలు రాయి అందుకున్నాడు. వెస్టిండీస్‌తో ఆదివారం జరిగిన రెండో వన్డేల్లో 8 పరుగులే చేసిన విరాట్.. 5 వేల పరుగుల మార్క్‌ను ధాటాడు.
తద్వారా ఈ రికార్డు నెలకొల్పిన నాలుగో బ్యాట్స్​మెన్​గా గుర్తింపు పొందాడు.

ఈ జాబితాలో క్రికెట్ గాడ్ సచిన్ టెండూల్కర్ అగ్రస్థానంలో ఉన్నాడు. సచిన్ 48.11 సగటుతో 6,976 పరగులు చేశాడు. ఆ తర్వాత స్థానాల్లో రికీ పాంటింగ్​ (ఆస్ట్రేలియా) 5521 పరుగులు- 39.71 సగటు, కల్లీస్​ (దక్షిణాఫ్రికా) 5186 పరుగులు- 45.89 సగటు ఉన్నారు. యావరేజ్ ప్రకారం (60.17)లో విరాట్​ కోహ్లీనే అగ్రస్థానంలో ఉన్నాడు. సొంతగడ్డపై అత్యంత వేగంగా 5వేల పరుగులు చేసిన ఆటగాడిగా కోహ్లీ నిలిచాడు.సొంతగడ్డపై విరాట్​ కోహ్లీ 99 మ్యాచ్​ల్లో 5002 పరుగులు చేశాడు. ఇందులో 19 శతకాలు, 25 అర్థశతకాలు ఉన్నాయి.

వెస్టిండీస్‌తో జరిగిన చారిత్రాత్మక 1000 వన్డేలో భారత్ 6 వికెట్ల తేడాతో గెలుపొందింది. టాస్ ఓడి ముందుగా బ్యాటింగ్ చేసిన వెస్టిండీస్ 43.5 ఓవర్లలో 176 పరుగులకు ఆలౌటైంది. జాసన్ హోల్డర్ (71 బంతుల్లో 4 సిక్స్‌లతో 57) హాఫ్ సెంచరీతో రాణించగా మిగతా బ్యాట్స్‌మెన్ అంతా దారుణంగా విఫలమయ్యారు. స్పిన్నర్ యుజ్వేంద్ర చాహల్(4/49) నాలుగు వికెట్లతో సత్తా చాటగా.. వాషింగ్టన్ సుందర్(3/30) మూడు, ప్రసిధ్ కృష్ణ రెండు వికెట్లు తీశారు. వీరికి తోడుగా సిరాజ్ కూడా ఓ వికెట్ పడగొట్టాడు. భారత బౌలర్ల ధాటికి ఓ దశలో 79 పరుగులకే 7 వికెట్లు కోల్పోయి పీకల్లోతు కష్టాల్లో పడ్డ విండీస్ 100 పరుగులైనా చేస్తుందా? అనిపించింది. కానీ హోల్డర్ ఆ జట్టు పరువును కాపాడాడు.

అనంతరం టీమిండియా 28 ఓవర్లలో 4 వికెట్లకు 178 పరుగులు చేసి సునాయస విజయాన్నందుకుంది. కెప్టెన్ రోహిత్ శర్మ హాఫ్ సెంచరీకి తోడుగా.. ఇషాన్ కిషన్(28), సూర్యకుమార్ యాదవ్(34 నాటౌట్), దీపక్ హుడా(26 నాటౌట్) రాణించారు. వెస్టిండీస్ బౌలర్లలో అల్జారీ జోసెఫ్ రెండు వికెట్లు తీయగా.. అకీల హోస్సెన్‌కు ఓ వికెట్ దక్కింది. మాజీ కెప్టెన్ విరాట్ కోహ్లీ(8), రిషభ్ పంత్(11) మరోసారి నిరాశపరిచారు.