Team India ఆటగాళ్లకు ‘హలాల్ మాంసం’.. నెట్టింట దుమారం!

న్యూఢిల్లీ: భారత క్రికెట్ నియంత్రణ మండలి(బీసీసీఐ) చిక్కుల్లో పడింది. సోషల్ మీడియా వేదికగా తీవ్ర విమర్శలను ఎదుర్కొంటుంది. భారత జట్టులోని ఆటగాళ్ల తిండి విషయంలో బోర్డు ఏర్పాటు చేసిన ప్రత్యేకమైన డైట్ ప్లాన్‌పై నెట్టింట దుమారం రేగుతోంది. న్యూజిలాండ్​తో గురువారం నుంచి ప్రారంభమయ్యే టెస్టు సిరీస్​లో పాల్గొనే ఆటగాళ్లు, సిబ్బంది కోసం తయారు చేసిన డైట్ ప్లాన్​లో.. వారందరూ హలాల్ సర్టిఫైడ్ మాంసాన్ని మాత్రమే తీసుకోవాలని బోర్డు పేర్కొన్నట్లు ప్రచారం జరుగుతోంది. దీంతో బీసీసీఐ విధానాన్ని వ్యతిరేకిస్తూ #BCCIPromotesHalal అనే ట్యాగ్‌ను ట్విటర్‌లో నెటిజన్లు ట్రెండ్ చేస్తున్నారు.

ఓ జాతీయ వెబ్‌సైట్ కథనం ప్రకారం భారత ఆటగాళ్ల కోసం రూపొందించిన డైట్ మెనూలో హలాల్ మాంసం మాత్రమే ఉండాలని బోర్డు పేర్కొంది. వారి ఆహారంలో ఈ మాంసం తప్ప బీఫ్, ఫోర్క్​లాంటివి అసలు ఉండరాదని స్పష్టం చేసింది. హలాల్ మాంసానికి ప్రాధాన్యం ఇవ్వడంపై నెటిజన్లు బీసీసీఐని విమర్శిస్తున్నారు. హిందువులు, సిక్కులు ఈ మాంసానికి దూరంగా ఉంటారని.. అలాంటపుడు ఆటగాళ్ల కోసం హలాల్ మాంసాన్ని ఎలా అందిస్తారంటూ మండిపడుతున్నారు.

న్యూజిలాండ్​తో టెస్టు సిరీస్ కోసం ప్రకటించిన జట్టులో కేవలం ఒకే ఒక్క ముస్లిం ఉన్నాడని.. అయినా అందరికీ హలాల్ మాంసాన్ని అందించడమేంటని ప్రశ్నిస్తున్నారు. పరిమిత మోతాదులో ప్రోటీన్స్, కార్బోహైడ్రేట్స్​, చాలా తక్కువగా కొవ్వుతో కూడిన ఆహారాన్ని న్యూజిలాండ్ క్రికెట్ బోర్డు కోసం తయారు చేయిస్తున్నారు. అలాగే రెడ్ మీట్, వైట్ మీట్​ కూడా వీరి మెనూలో ఉందని ఆ వెబ్‌సైట్ పేర్కొంది.

మరోవైపు ఆటగాళ్ల తిండి విషయంలో బీసీసీఐ ఎలాంటి జోక్యం చేసుకోదని బోర్డు ట్రెజరర్ అరుణ్ ధూమల్ స్పష్టం చేశారు. ఈ విమర్శలపై ఇండియా టుడేతో మాట్లాడిన ఆయన.. డైటరీ ప్లాన్ అంటూ వస్తున్న కథనాలను కొట్టిపారేసాడు. ఆటగాళ్లు తమకు నచ్చిన మాంసం తినొచ్చని, ఈ విషయంలో బోర్డు ఎలాంటి ఆంక్షలు, నిబంధనలు విధించలేదన్నాడు. అసలు డైటరీ ప్లాన్ వంటివేం లేవన్నాడు.

'అసలు డైట్ ప్లాన్ గురించి ఇప్పటి వరకు ఎప్పుడూ చర్చించలేదు. అసలు ఈ నిర్ణయం ఎప్పుడు తీసుకున్నారో కూడా నాకు తెలియదు. ఇప్పటి వరకు డైట్ ప్లాన్స్ విషయంలో మేం ఎలాంటి నిబంధనలు విధించలేదు. ఎవరి ఇష్టం మేరకు వారు తమ ఆహారాన్ని తీసుకోవచ్చు. ఈ విషయంలో బీసీసీఐ జోక్యం ఏ మాత్రం లేదు. వెజిటేరియన్, వేగన్, నాన్ వెజిటేరియనా? అనేది ఆటగాళ్ల ఇష్టం.'అని అరుణ్ ధూమల్ పేర్కొన్నాడు.