అఫ్గాన్ క్రికెట్ టీమ్‌కు తాలిబన్ల మద్దతు.. టీ20 ప్రపంచకప్‌‌కు లైన్ క్లియర్!

కాబుల్: అఫ్గానిస్థాన్​.. ఇప్పుడు ఈ పేరు చెబితే చాలు తాలిబన్ల ఆకృత్యాలు, వారి నరమేధం అందరి కళ్ల ముందు కదలాడుతోంది. తాలిబన్ల ఆక్రమణతో ఆ దేశంలో పరిస్థితులన్నీ ఒక్కసారిగా తారుమారయ్యాయి. ఈ క్రమంలో ఆ దేశ భవిష్యత్తుపై ప్రపంచవ్యాప్తంగా చర్చ మొదలైంది. తాలిబన్ల ఆక్రమణతో చాలా రంగాలు తీవ్రంగా ప్రభావితమవుతున్నాయి. అందులో క్రీడారంగం కూడా ఉంది.

దాంతో టీ20 ప్రపంచకప్​లో అఫ్గాన్​ క్రికెట్ జట్టు ఆడుతుందా? లేదా? అనేది కూడా ప్రశ్నార్ధకంగా మారింది. ఆ జట్టు స్టార్ స్పిన్నర్ రషీద్ ఖాన్ వరుస ట్వీట్లతో తమ దేశ పరిస్థితులపై ఆవేదన వ్యక్తం చేశాడు. తమ దేశంలో శాంతి ప్రసాదించాలని ప్రపంచ దేశాలకు విన్నవిస్తున్నాడు. ఈ క్రమంలోనే అఫ్గాన్ క్రికెట్ పరిస్థితి ఏందా?అనే ఆందోళన అందరిలో నెలకొంది.

కానీ తాలిబన్లు అనూహ్యంగా క్రికెట్​కు మద్దతు ప్రకటించారు. దీంతో యూఏఈ వేదికగా జరిగే టీ20 ప్రపంచకప్​కు ముందు ఆ జట్టు పాల్గొనేది స్పష్టమైంది. అఫ్గానిస్థాన్​ క్రికెట్​ వర్గాలతో సమావేశమైన తాలిబన్​ నాయకుడు అనీస్​ హక్కానీ.. వారికి భరోసా కల్పించినట్లు తెలుస్తోంది.

ఈ సమావేశంలో అఫ్గాన్​ కెప్టెన్ హష్మతుల్లా షాహిది, క్రికెట్​ బోర్డు మాజీ అధికారులు నూర్​ అలీ జద్రాన్, అసదుల్లా పాల్గొన్నారు. ఎటువంటి భయాందోళనలకు గురి కావాల్సిన అవసరం లేదని, ధైర్యంగా క్రికెట్​ ఆడండి అని వాళ్లు చెప్పినట్లు సమాచారం.

మరోవైపు అఫ్గాన్‌ ఆటగాళ్ల సమస్యలను కూడా త్వరలో పరిష్కరిస్తామని హక్కాని భరోసా ఇచ్చినట్లు తెలుస్తోంది. కాగా, 1996-2001 మధ్యలో హక్కాని అధ్యక్షతనే అఫ్గాన్‌లో క్రికెట్ ప్రారంభమైంది. ఇదిలా ఉంటే, అఫ్గానిస్తాన్‌లో నెలకొన్న పరిస్థితులు పాకిస్తాన్ క్రికెట్‌పై కూడా ప్రభావం చూపిస్తున్నాయి.

త్వరలో ఆ దేశంలో పర్యటించాల్సి ఉన్న న్యూజిలాండ్, ఇంగ్లండ్‌ జట్లు విముఖత చూపుతున్నట్లు తెలుస్తోంది. అఫ్గనిస్తాన్‌లో నెలకొన్న పరిస్థితుల కారణంగా న్యూజిలాండ్, ఇంగ్లండ్‌ క్రికెటర్లు పాకిస్తాన్ పర్యటనలో భద్రతా సమస్యను లేవనెత్తుతున్నారు. ఈ నేపథ్యంలో ఆ రెండు జట్లు పాక్‌లో పర్యటించడం ప్రశ్నార్ధకంగా మారింది.