రవీంద్ర జడేజా లాంటి ఆటగాళ్లు చాలా అరుదుగా ఉంటారు: సురేశ్ రైనా

నెంబర్ వన్ ఆల్‌రౌండర్..

'జడేజా బౌలింగ్‌తో పాటు అద్భుతంగా బ్యాటింగ్ చేయగలడు. ఇక ఫీల్డింగ్‌లో అతని గురించి ప్రత్యేకంగా చెప్పాల్సిన పనిలేదు. ఇప్పటికే ఏడో, ఎనిమిదో క్యాచ్‌లు పట్టాడనుకుంటా. జడేజాలా మూడు ఫార్మాట్లలో రాణించే ఆల్‌రౌండర్లు చాలా అరుదుగా ఉంటారు. అతను మంచి హార్డ్‌వర్కర్‌.. నా దృష్టిలో ఇప్పుడు నెంబర్‌ వన్‌ ఆల్‌రౌండర్‌. ఆటలో ఎంత మంచి ప్రదర్శన చేసినా అతి చేయకుండా పద్దతిగా ఉంటాడు. జడేజాలో నాకు నచ్చిన గుణం అదే. ఇక ఫీల్డింగ్‌లో అతను పెట్టే శ్రమ నాకు ఆశ్చర్యం కలిగిస్తుంది. ఫీల్డింగ్‌ను బాగా ఆస్వాదిస్తాడు.

ఏ క్షణంలోనైనా మలుపు తిప్పగలడు..

మైదానంలో మెరుపువేగంతో కదిలే అతను క్షణాల్లో మ్యాచ్‌ను మలుపుతిప్ప గల సమర్థుడు. మ్యాచ్‌ మనకు అనుకూలంగా లేదన్న సమయంలో ఒక మెరుపు క్యాచ్‌ లేదా రనౌట్‌తో ఆటను మార్చేస్తాడు. అందుకే అతనితో కలిసి పనిచేయడం నాకు ఎప్పుడు సంతోషాన్నిస్తుంది. ఏ కెప్టెన్ అయినా అతని లాంటి ఆటగాడు జట్టులో ఉండాలనుకుంటారు.'అని రైనా చెప్పుకొచ్చాడు. ఈ వీడియోను సీఎస్‌కే సోషల్ మీడియా వేదికగా అభిమానులతో పంచుకుంది.

2011 నుంచి..

ప్రస్తుతం భీకర ఫామ్‌లో ఉన్న జడేజా ఐపీఎల్‌ 2021 సీజన్‌లోనూ తన జోరును కొనసాగిస్తున్నాడు. ఆర్‌సీబీతో జరిగిన మ్యాచ్‌లో జడ్డూ ఆల్‌రౌండ్‌ షో కనబరిచాడు. బ్యాటింగ్‌, బౌలింగ్‌, ఫీల్డింగ్‌ ఇలా అన్ని విభాగాల్లోనూ అన్నింటా తానే ముందుండి జట్టును గెలిపించాడు. మొదట బ్యాటింగ్‌లో 62 పరుగులతో విధ్వంసం.. బౌలింగ్‌లో మూడు కీలక వికెట్లు.. ఫీల్డింగ్‌లో మెరుపు రనౌట్‌.. వెరసి ఒక ఆల్‌రౌండర్‌ అంటే ఎలా ఉంటాడో చూపించాడు. టీమిండియా తరపున ఎన్నో మ్యాచ్‌లు ఆడిన రైనా, జడేజాలు ఐపీఎల్‌లోనూ 2011 నుంచి కలిసి ఆడుతున్నారు. 2011 నుంచి సీఎస్‌కేకు ఆడుతున్న వీరిద్దరు.. 2016లో సీఎస్‌కే బ్యాన్‌కు గురవడంతో రెండేళ్ల పాటు గుజరాత్‌ లయన్స్‌కు ప్రాతినిధ్యం వహించారు.