వెస్టిండీస్ టూర్‌ ముందు శ్రీలంక‌కు గట్టి షాక్.. ఇద్దరు ప్లేయర్లకు కరోనా

కొలంబో: వెస్టిండీస్​ పర్యటనకు ముందు శ్రీలంక క్రికెట్​ ట్రైనింగ్ క్యాంప్‌లో కలకలం రేగింది. ఆ జట్టు పరిమిత ఓవర్ల ఆటగాళ్లు బినురా ఫెర్నాండో, చమికా కరుణరత్నేలకు కరోనా పాజిటివ్​గా తేలింది. దాంతో విండీస్​ టూర్​కు ఎంపికైన జట్టులో ఆందోళన మొదలైంది. ఫిబ్రవరిలో ప్రారంభం కానున్న ఈ పర్యటన​లో శ్రీలంక, వెస్టిండీస్​ మధ్య రెండు టెస్టులు, మూడు వన్డేలు, మూడు టీ20 మ్యాచ్​లు జరగనున్నాయి. ఇక తమ ఆటగాళ్లకు కరోనా సొకిందనే విషయాన్ని లంక క్రికెట్ బోర్డు ధృవీకరించింది. ఆ ఇద్దర్ని క్వారంటైన్‌కు తలరించినట్లు ఓ ప్రకటనలో స్పష్టం చేసింది.

'జనవరి 20న జరిపిన ఆర్​టీ పీసీఆర్​ పరీక్షల్లో ఇద్దరు ఆటగాళ్లకు కరోనా పాజిటీవ్ అని తేలింది. శ్రీలంక ప్రభుత్వం ఆదేశించిన కోవిడ్​ నిబంధనల ప్రకారం వారిద్దర్ని క్వారంటైన్​కు తరలించాం. జనవరి 18న ఎస్​ఎస్​సీ గ్రౌండ్స్​లో ఈ బృందం శిక్షణ ప్రారంభించింది. ఈ నెల 20న చేసిన ఆర్​టీ పీసీఆర్ పరీక్షల్లో ఫెర్నాండో, చమికాకు కరోనా పాజిటివ్ అని తేలింది.

ఈ ప్రక్రియలో భాగంగా మిగిలిన ఆటగాళ్లకు జనవరి 26న మరోసారి ​కరోనా​ టెస్ట్​లు చేస్తాం'అని లంక బోర్డు పేర్కొంది. పేసర్​ ఫెర్నాండో 2015లో చివరిసారిగా పాకిస్థాన్​తో జరిగిన టీ20లో శ్రీలంక తరఫున ప్రాతినిధ్యం వహించగా.. 2019లో ఆస్ట్రేలియాతో టెస్టు సిరీస్​లో కరుణరత్నే ఆడాడు. శ్రీలంక క్రికెట్​లో కోవిడ్​ కేసులు బయటపడడం ఇదే తొలిసారి.

ప్రస్తుతం శ్రీలంక జట్టు స్వదేశంలో ఇంగ్లండ్‌తో రెండు టెస్ట్‌ల సిరీస్ ఆడుతుండగా.. మరోవైపు విండీస్ టూర్‌కు ఎంపికైన ఆటగాళ్లు ట్రైనింగ్ క్యాంప్‌లో శిక్షణ తీసుకుంటున్నారు.