SRH vs RCB: హాఫ్ సెంచరీతో మెరిసిన మ్యాక్స్‌వెల్.. సన్‌రైజర్స్ ముందు టఫ్ టార్గెట్!

శుభారంభం లేదు..

టాస్ ఓడి బ్యాటింగ్‌కు దిగిన ఆర్‌సీబీకి ఆదిలోనే గట్టి షాక్ తగింది. ఓపెనర్ దేవదత్ పడిక్కల్(11)‌ను భువనేశ్వర్ కుమార్ క్యాచ్ ఔట్‌గా పెవిలియన్ చేరాడు. దాంతో జట్టులోకి వచ్చిన షబాజ్ అహ్మద్(14)తో విరాట్ ఇన్నింగ్స్‌ను ముందుకు నడిపించాడు. నదీమ్ బౌలింగ్ షబాజ్ సిక్సర్‌ బాదగా.. నటరాజన్ బౌలింగ్‌లో విరాట్ రెండు ఫోర్లు బాదాడు. దాంతో ఆర్‌సీబీ పవర్‌ప్లేలో వికెట్ నష్టానికి 47 రన్స్ చేసింది. అయితే నదీమ్ వేసిన ఆ మరసటి ఓవర్‌లోనే భారీ షాట్ ఆడిన షబాజ్ అహ్మద్ క్యాచ్ ఔట్‌గా పెవిలియన్ చేరాడు.

సూపర్ బౌలింగ్..

క్రీజులోకి వచ్చి మ్యాక్స్‌వెల్ తొలుత డిఫెన్స్‌కు పరిమితమైనా.. రషీద్ బౌలింగ్‌లో ఫోర్‌తో ఖాతా తెరిచాడు. కానీ తర్వాతి రెండు ఓవర్లను సన్‌రైజర్స్ బౌలర్లు కట్టుదిట్టంగా వేసారు. అయితే నదీమ్ వేసిన 11 ఓవర్‌లో మ్యాక్స్‌వెల్ 6, 4, 6 బాదగా.. కోహ్లీ ఓ ఫోర్ కొట్టాడు. దాంతో ఈ ఓవర్‌లో 22 రన్స్ వచ్చాయి. ఆ తర్వాత నట్టూ కట్టదిట్టంగా బౌలింగ్ చేయడంతో ఒత్తిడికి లోనైన కోహ్లీ.. హోల్డర్ బౌలింగ్‌లో భారీ షాట్‌కు ప్రయత్నించి క్యాచ్ ఔట్‌గా వెనుదిరిగాడు. ఆ మరుసటి ఓవర్‌లోనే ఏబీ డివిలియర్స్(1) కూడా ఔటవ్వడంతో ఆర్‌సీబీ కష్టాలపాలైంది. ఆ తర్వాత సుందర్(8), డానియల్ క్రిస్టియన్(1) తీవ్రంగా నిరాశపరిచారు.

మ్యాక్సీ హాఫ్ సెంచరీ..

క్రీజులోకి వచ్చిన జేమీసన్.. భువనేశ్వర్ కుమార్ బౌలింగ్‌లో మూడు ఫోర్లు బాదాడు. నటరాజన్ వేసిన 19 ఓవర్లో తన మ్యాడ్ షాట్స్‌తో రెండు ఫోర్లు కొట్టిన మ్యాక్సీ.. హోల్డర్ వేసిన ఆఖరి ఓవర్‌ మూడో బంతికి క్విక్ డబుల్‌తో హాఫ్ సెంచరీ పూర్తి చేసుకున్నాడు. ఈ సీజన్‌లో అతనికిదే ఫస్ట్ ఫిఫ్టీ. ఆ మరసటి బంతినే భారీ సిక్సర్‌ కొట్టిన మ్యాక్సీ.. తర్వాత రెండు పరుగులు తీసి ఆఖరి బంతికి ఔటయ్యాడు. దాంతో ఆర్‌సీబీ 149 పరుగులు చేసింది. బ్యాటింగ్‌కు ప్రతికూలంగా మారిన ఈ పిచ్‌పై 149 రన్స్ చేదించడం హైదరాబాద్‌కు కష్టమే.