SRH vs CSK: ధోనీ జైత్రయాత్ర షురూ.. మ్యాచ్ టర్నింగ్ పాయింట్ అదే.. పూరన్ చెలరేగినా..!

శుభారంభం దక్కినా..

203 పరుగుల భారీ లక్ష్యంతో బరిలోకి దిగిన సన్‌రైజర్స్ హైదరాబాద్ ఓపెనర్లు అభిషేక్ శర్మ, కేన్ విలియమ్సన్ శుభారంభం అందించారు. ఆరంభం నుంచే చెన్నై బౌలర్లపై విరుచుకుపడుతూ ధాటిగా ఆడారు. క్రీజులో కుదురుకున్న ఈ జోడీని ముఖేశ్ చౌదరి విడదీసాడు. షార్ట్ పిచ్ బాల్‌తో అభిషేక్ శర్మ‌ను ఔట్ చేశాడు. దాంతో తొలి వికెట్‌కు నమోదైన 58 పరుగుల భాగస్వామ్యానికి తెరపడింది. ఆ మరుసటి బంతికే రాహుల్ త్రిపాఠి(0)ని కూడా చౌదరీ అదే తరహా బంతితో గోల్డెన్ డక్‌గా పెవిలియన్ చేర్చాడు. దాంతో సన్‌రైజర్స్ పవర్ ప్లేలో 2 వికెట్ల నష్టానికి 58 పరుగులు చేసింది.

మ్యాచ్ టర్నింగ్ పాయింట్..

క్రీజులోకి వచ్చిన ఎయిడెన్ మార్క్‌రమ్(17).. మిచెల్ సాంట్నర్ వేసిన 10వ ఓవర్‌లో రెండు భారీ సిక్సర్లతో జోరు కనబర్చాడు. అదే జోరులో మరో భారీ షాట్‌కు ప్రయత్నించిన అంతను బౌండరీ లైన్ వద్ద జడేజాకు చిక్కి వెనుదిరిగాడు. కేన్ మామతో జత కలిసిన నికోలస్ పూరన్ సిక్సర్లతో జోరు కనబర్చాడు. ఆచితూచి ఆడిన ఈ జోడీ ఇన్నింగ్స్‌ను ముందుకు నడపించింది. ప్రిటోరియస్ బౌలింగ్‌లో భారీ షాట్‌కు యత్నించిన కేన్ విలియమ్సన్ ఎల్బీడబ్ల్యూగా వెనుదిరిగాడు. దాంతో 3 పరుగుల వ్యవధిలో కేన్ మామ హాఫ్ సెంచరీ చేజార్చుకున్నాడు. ఇది మ్యాచ్‌కు టర్నింగ్ పాయింట్‌గా మారింది.

పూరన్ చెలరేగినా..

ప్రిటోరియస్ బౌలింగ్‌లో పూరన్ భారీ సిక్సర్‌తో 12 పరుగులు పిండుకున్నాడు. ముఖేష్ చౌదరి వేసిన 18వ ఓవర్‌లో శశాంక్ సింగ్(15) క్యాచ్ ఔటవ్వగా.. ఆ వెంటనే సుంధర్(2) కూడా క్లీన్ బౌల్డ్ అయ్యాడు. దాంతో సన్‌రైజర్స్ విజయానికి 12 బంతుల్లో 50 పరుగులు అవసరమయ్యాయి. ప్రిటోరియస్ వేసిన 19వ ఓవర్‌లో 13 పరుగులు మాత్రమే రావడంతో ఆఖరి ఓవర్‌లో సన్‌రైజర్స్ విజయానికి 36 పరుగులు అవసరమయ్యాయి. ముఖేశ్ చౌదరి వేసిన ఆఖరి ఓవర్‌లో సిక్సర్, ఫోర్ బాదిన పూరన్.. హాఫ్ సెంచరీ పూర్తి చేసుకున్నాడు. మరో రెండు సిక్స్‌లు బాదిన పూరన్ 24 పరుగులు మాత్రమే పిండుకున్నాడు. దాంతో సీఎస్‌కే విజయం లాంఛనమైంది.