IND vs NZ: ఆ మెచ్యూరిటీ మా ఆటగాళ్లకు ఉంది: శ్రేయస్ అయ్యర్

ఐదు టీ20ల సిరీస్‌లో భాగంగా న్యూజిలాండ్‌తో జరుగుతున్న మూడో టీ20లో భారత్ టాస్ గెలిచి బౌలింగ్ ఎంచుకుంది. పిచ్ కండిషన్స్ నేపథ్యంలోనే ఈ నిర్ణయం తీసుకున్నానని టీమిండియా టీ20 కెప్టెన్ శ్రేయస్ అయ్యర్ అన్నాడు. తుది జట్టులో ఎలాంటి మార్పులు చేయలేదని, విన్నింగ్ కాంబినేషన్‌తో బరిలోకి దిగుతున్నామని చెప్పాడు. తుది జట్టులో అవకాశం రాకపోయినా అర్థం చేసుకునేంత మెచ్యూరిటీ తమ ఆటగాళ్లకు ఉందని అయ్యర్ తెలిపాడు.

'మేం ముందుగా బౌలింగ్ చేస్తాం. కొన్ని విషయాల్లో మేం ఇంకా మెరుగవ్వాలి. ఈ మైదానం సైజు, పరిస్థితులు భిన్నంగా ఉన్నాయి. కాబట్టి వీలైనంత వేగంగా ఇక్కడి పరిస్థితులకు అలవాటు పడితే మా జట్టుకు మంచిది. తుది జట్టులో అవకాశం రాకపోయినా దాన్ని అర్థం చేసుకునేంత పరిణతి మా ఆటగాళ్లకు ఉంది. ఈ రోజు కూడా మేం విన్నింగ్ కాంబినేషన్‌తోనే బరిలోకి దిగుతున్నాం.'అని శ్రేయస్ అయ్యర్ పేర్కొన్నాడు. ఈ సిరీస్‌లో వరుసగా మూడు మ్యాచ్‌ల్లో అయ్యర్ టాస్ గెలిచాడు. ఈ మూడు సార్లు బౌలింగే ఎంచుకోవడం గమనార్హం.

మరోవైపు తమ తుది జట్టులో మూడు మార్పులు చేశామని న్యూజిలాండ్ కెప్టెన్ మిచెల్ సాంట్నర్ అన్నాడు. 'ఈ పిచ్ చూడటానికి బాగా కనిపిస్తోంది. మంచి పేస్, బౌన్స్ ఉండే అవకాశం ఉంది. గాలి కూడా అంతగా లేకపోవడం కలిసొచ్చే అంశం. మేం ఇప్పటివరకు ఆడిన మైదానాలతో పోల్చితే ఈ స్టేడియం డైమన్షన్స్ కాస్త భిన్నంగా ఉంటాయి. భారత్ చాలా బలమైన జట్టు. వారి ముందు ఎలాంటి పొరపాటు కూడా చేయకూడదు. ఈ మ్యాచ్ కోసం మేం జట్టులో మూడు మార్పులు చేశాం. మ్యాట్ హెన్రీ, లాకీ ఫెర్గూసన్, నాథన్ స్మిత్‌ల స్థానాల్లో మాథ్యూ ఫిషర్, కైల్ జేమిసన్, ఆడమ్ మిల్నేలు ఆడుతున్నారు.'అని సాంట్నర్ తెలిపాడు.

తుది జట్లు:

న్యూజిలాండ్:

టిమ్ సీఫెర్ట్ (కీపర్), ఫిన్ అలెన్, డారిల్ మిచెల్, గ్లెన్ ఫిలిప్స్, బెవాన్ జేకబ్స్, మైఖేల్ బ్రేస్‌వెల్, మిచెల్ సాంట్నర్ (కెప్టెన్), కైల్ జేమిసన్, ఆడమ్ మిల్నే, జేకబ్ డఫీ, మాథ్యూ ఫిషర్.

భారత జట్టు:

సంజూ శామ్సన్ (కీపర్), అభిషేక్ శర్మ, వైభవ్ సూర్యవంశీ, శ్రేయస్ అయ్యర్ (కెప్టెన్), తిలక్ వర్మ, నితీష్ కుమార్ రెడ్డి, నమన్ ధీర్, అక్షర్ పటేల్, భువనేశ్వర్ కుమార్, అర్ష్‌దీప్ సింగ్, ప్రిన్స్ యాదవ్.