Shoaib Akthar: ఈ రూల్స్ అప్పుడు ఉంటేనా సచిన్ లక్ష పరుగులు చేసేవాడు!

న్యూఢిల్లీ: ప్రస్తుతం క్రికెట్‌లో రూల్స్ తమ తరంలో ఉండి ఉంటే భారత క్రికెట్ దిగ్గజం సచిన్ టెండూల్కర్ లక్షకు పైగా పరుగులు చేసేవాడని పాకిస్థాన్ మాజీ పేసర్ షోయబ్ అక్తర్ అన్నాడు. ఐసీసీ తీసుకొస్తున్న నిబంధనలు బ్యాట్స్‌మెన్‌కు అనుకూలంగా ఉంటున్నాయన్నాడు. ఈ నిబంధనల వల్ల ఆట సహజత్వాన్ని కోల్పోతుందని విమర్శించాడు. ఈ తరం క్రికెట్‌లోలా రెండు కొత్త బంతులు, డీఆర్‌ఎస్‌లు ఉంటే సచిన్ మరిన్నీ పరుగులు చేసేవాడని అభిప్రాయపడ్డాడు.

'మీకు రెండు కొత్త బంతులు ఉన్నాయి. నిబంధనలను కఠినం చేశారు. ఈ మధ్య కాలంలో బ్యాట్స్‌మన్‌కు అనుకూలంగా నిబంధనలను రూపొందించారు. ఇప్పుడు మూడు రివ్యూలు ఇస్తున్నారు. సచిన్ టెండూల్కర్​.. వసీం అక్రమ్​, వకార్​ యూనిస్​, షేన్​ వార్న్​, బ్రెట్​ లీ, ముత్తయ్య మురళీధరన్​ వంటి భీకర బౌలర్లను ఎంతో సమర్థవంతంగా ఎదుర్కొన్నాడు. అందుకే అతన్ని నేను టఫ్​ బ్యాట్స్‌మన్ అంటాను. ఇప్పుడున్న నిబంధనలు మా రోజుల్లో ఉండి ఉంటే అతను సులువుగా లక్ష పరుగులకు పైగా చేసేవాడు.' అని అక్తర్ చెప్పుకొచ్చాడు.

క్రికెట్ పూర్తిగా బ్యాటింగ్​ ఆధారిత ఆటగా మారిపోయిందని, కొత్త నిబంధనల వల్ల బౌలర్లకు నష్టం జరుగుతుందని అక్తర్ అభిప్రాయపడ్డాడు​. ఇదే విషయమై మాజీ కోచ్​ రవిశాస్త్రి మాట్లాడుతూ.. 'బ్యాట్​, బంతి మధ్య ఆసక్తికర పోరు ఉండాలి. వన్డేల్లో రెండు కొత్త బంతులు ఉండటం బౌలర్లకు కష్టంగా మారింది. టెస్టుల్లో మూడు రివ్యూలు ఉండటం ఆమోద యోగ్యం కాదు'అని తెలిపాడు.