Gambhir vs Afridi:దటీజ్ క్రికెట్.. శతృవులు.. మిత్రులయ్యారు! (వీడియో)

గంభీర్‌కు బంతి తగలడంతో..

భారత ఇన్నింగ్స్ సందర్భంగా 11వ ఓవర్‌లో అబ్దుల్ రజాక్ వేసిన బౌలింగ్‌లో గంభీర్ ముందుకు జరిగి బ్యాక్‌వార్డ్ పాయింట్ దిశగా స్వీప్ షాట్ ఆడే ప్రయత్నం చేయగా.. బంతి మిస్సై అతని ముఖానికి బలంగా తాకింది. ఇది గమనించిన అఫ్రిది.. గంభీర్ దగ్గరకు వచ్చి అంతా ఓకేనా.. ఏమైనా గాయాలు అయ్యాయా? అని ఆరా తీసాడు. దానికి అలాంటిదేం లేదని గంభీర్ బదులిచ్చాడు.

మిస్బా ఉల్ హక్ హాఫ్ సెంచరీ..

ఈ మ్యాచ్‌లో షాహిద్ అఫ్రిది సారథ్యం వహించిన ఏషియన్ లయన్స్ 9 పరుగులతో గెలుపొందింది. ముందుగా బ్యాటింగ్ చేసిన ఏషియన్ లయన్స్ నిర్ణీత 20 ఓవర్లలో 6 వికెట్లకు 165 పరుగులు చేసింది. మిస్బా ఉల్ హక్(50 బంతుల్లో 2 ఫోర్లు, 4 సిక్స్‌లతో 73) హాఫ్ సెంచరీతో రాణించగా.. ఉపుల్ తరంగా(39 బంతుల్లో 2 సిక్స్‌లతో 40) విలువైన పరుగులు చేశాడు. ఇండియా మహారాజాస్ బౌలర్లలో స్టువర్ట్ బిన్నీ, పర్విందర్ అవన రెండేసి వికెట్లు తీయగా.. ఇర్ఫాన్ ఫటాన్, అశోక్ దిండా తలో వికెట్ పడగొట్టారు.

గంభీర్ పోరాడినా..

అనంతరం లక్ష్యచేధనకు దిగిన ఇండియా మహరాజాస్ నిర్ణీత 20 ఓవర్లలో 8 వికెట్లకు 156 పరుగులు చేసి ఓటమిపాలైంది. గౌతమ్ గంభీర్(39 బంతుల్లో 7 ఫోర్లతో 54) ఒక్కడే హాఫ్ సెంచరీతో రాణించగా.. మిగతా బ్యాటర్లు విఫలమయ్యారు. మురళీ విజయ్(25), మహమ్మద్ కైఫ్(22), ఇర్ఫాన్ పఠాన్(19) పర్వాలేదనిపించారు. ఏషియన్ లయన్స్ బౌలింగ్‌లో సోహైల్ తన్వీర్ మూడు వికెట్లు తీయగా.. ఇసురు ఉడానా, తిలకరత్నే దిల్షాన్, తిసారా పెరీరా, అబ్దుల్ రజాక్ తలో వికెట్ తీసారు.

ప్రేమను పంచేందుకు...

మ్యాచ్ అనంతరం షాహిద్ అఫ్రిది మాట్లాడుతూ.. ప్రేమను పంచేందుకే క్రికెట్ ఆడుతున్నామని తెలిపాడు. షాహిద్ అఫ్రిది త్వరలోనే మైదానంలోకి వస్తాడని, తనతో సహా మరికొంతమంది ఆటగాళ్లు రెస్ట్ తీసుకుంటే బరిలోకి దిగుతాడని చమత్కరించాడు. గంభీర్ మాట్లాడుతూ.. మిస్బా ఉల్ హక్ అద్భుతంగా ఆడాడని, సోహైల్ తన్వీర్, పెరీరా సూపర్ బౌలింగ్‌తో మా ఓటమిని శాసించారని కొనియాడాడు.