ఒక్క సెంచరీ చేయని మైకేల్ వాన్‌కు కోహ్లీ గురించి మాట్లాడే అర్హత లేదు: పాక్ క్రికెటర్

పోలికే అనవసరం..

వన్డే ఫార్మాట్‌లో ఒక్కటంటే ఒక్క సెంచరీ కూడా నమోదు చేయలేని వాన్‌ అర్ధరహితమైన చర్చలకు తెరలేపుతూ తన స్థాయిని దిగజార్చుకుంటున్నాడంటూ చురకలంటించాడు. 86 వన్డేల్లో ఓపెనర్‌గా బరిలోకి దిగి ఒక్క శతకం కూడా నమోదు చేయలేని ఆటగాడు చర్చల్లో పాల్గొనేందుకు అనర్హుడని పేర్కొన్నాడు. అంతర్జాతీయ క్రికెట్‌లో 70 శతకాలు నమోదు చేసి అత్యధిక శతకాలు సాధించిన ఆటగాళ్ల జాబితాలో సచిన్‌, పాంటింగ్‌ తర్వాత మూడో స్థానంలో నిలిచిన కోహ్లీని ఇతర క్రికెటర్లతో పోల్చడాన్ని పాక్ వెటరన్ ఓపెనర్ తప్పుబట్టాడు.

కోహ్లీని మించిన ఆటగాడు లేడు..

'అధిక జనాభ గల దేశానికి కోహ్లీ ప్రాతినిథ్యం వహిస్తున్నాడు. అతని టాప్ పెర్ఫామెన్స్‌తో వరల్డ్ బెస్ట్ బ్యాట్స్‌మన్‌గా నిలిచాడు. అంతర్జాతీయ క్రికెట్‌లో ఇప్పటికే అతను 70 సెంచరీలు నమోదు చేశాడు. ఈ తరంలో మరే ఆటగాడు కూడా విరాట్‌లా ఇన్ని సెంచరీలు చేయలేదు. అంతేకాకుండా సుదీర్ఘకాలం అతను తన సూపర్బ్ బ్యాటింగ్‌తో ఆధిపత్యం చెలాయిస్తున్నాడు. టాప్ ర్యాంకుల్లో కొనసాగుతున్నాడు. ప్రస్తుత తరం క్రికెటర్లలో కోహ్లీకి మించిన ఆటగాడు లేడు. ఇందుకు అతని గణాంకాలే నిదర్శనం. రికార్డుల పరంగా చూసినా కోహ్లీ ఎవ్వరికీ అందనంత ఎత్తులో ఉన్నాడు. అలాంటప్పుడు అతన్ని సమకాలీకులతో పోల్చడం సమంజసం కాదు.

ఒక్క సెంచరీ లేదు..

ఇంగ్లండ్‌ కెప్టెన్‌గా మంచి ట్రాక్‌ రికార్డు కలిగిన వాన్.. గొప్ప బ్యాట్స్‌మన్ అయితే కాదు. అతను మంచి టెస్ట్ బ్యాట్స్‌మన్ అయినప్పటికీ వన్డేల్లో ఒక్క సెంచరీ కూడా చేయలేదు. ఓపెనర్‌ అయిన అతను కనీసం ఒక్క సెంచరీ చేయలేకపోయాడు. అలాంటి వ్యక్తికి ఆల్‌ టైమ్‌ గ్రేట్‌ బ్యాట్స్‌మెన్లలో ఒకరైన కోహ్లీ గురించి మాట్లాడే అర్హత లేదు. ఇదంతా పనికి రాని చర్చ'అని సల్మాన్ బట్ ఆగ్రహం వ్యక్తం చేశాడు. వన్డే ఫార్మాట్‌లో ఒక్క సెంచరీ కూడా సాధించని వాన్‌.. టెస్టుల్లో మాత్రం 18 శతకాలు నమోదు చేశాడు. 1999 నుంచి 2007 మధ్యకాలంలో అతను 82 టెస్టుల్లో 5719 పరుగులు సాధించాడు.

నీలా.. స్పాట్ ఫిక్సింగ్ చేయలేదు..

ఇక సల్మాన్ బట్ వ్యాఖ్యలపై మైకేల్ వాన్ కూడా ఘాటుగానే బదులిచ్చాడు. తాను ఒక సెంచరీ చేయకపోయినా.. ఫిక్సింగ్ మాత్రం చేయలేదని సల్మాన్ బట్‌ను విమర్శించాడు. ఆజ్‌తక్ బంగ్లా ట్విటర్ రియాక్షన్‌లో మైకేల్ వాన్ మాట్లాడుతూ.. 'ఆ హెడ్‌లైన్ గురించి ఐడియా లేదు. కానీ సల్మాన్ నా గురించి మాట్లాడాడు. అది ఒకే. అతని అభిప్రాయాన్ని చెప్పాడు. కానీ అతను 2010లో మ్యాచ్ ఫిక్సింగ్ చేసినప్పుడు ఇలాంటి క్లియర్ మైండ్‌సెట్‌తో ఉంటే బాగుండేది.'అని వాన్ సెటైర్స్ పేల్చాడు. స్పాట్‌ ఫిక్సింగ్‌ వివాదంతో ఐదేళ్ల నిషేదానికి గురైన సల్మాన్‌ బట్‌.. పాక్‌ తరఫున 33 టెస్టులు, 78 వన్డేలు, 24 టీ20 మ్యాచ్‌లు ఆడాడు.