మార్కో మామ అద్భుతం.. సన్‌రైజర్స్‌కు మరో విజయం!

సౌతాఫ్రికా20 లీగ్‌లో సన్‌రైజర్స్ ఈస్టర్న్ కేప్ వరుసగా రెండో విజయాన్ని నమోదు చేసింది. హ్యాట్రిక్ పరాజయాల అనంతరం విజయాల బాట పట్టిన సన్‌రైజర్స్ అదే జోరును కొనసాగిస్తోంది. ఆదివారం రాత్రి డర్బన్ సూపర్ జెయింట్స్‌తో జరిగిన మ్యాచ్‌లో సన్‌రైజర్స్ 6 వికెట్ల తేడాతో గెలుపొందింది.

మార్కో జాన్సెస్(2/23) సంచలన బౌలింగ్‌తో సన్‌రైజర్స్ విజయంలో కీలక పాత్ర పోషించాడు. ఈ మ్యాచ్‌లో ముందుగా బ్యాటింగ్ చేసిన డర్బన్ సూపర్ జెయింట్స్ నిర్ణీత 20 ఓవర్లలో 8 వికెట్లకు 115 పరుగులే చేసింది. కేన్ విలియమ్సన్(45 బంతుల్లో 3 ఫోర్లతో 44) ఒక్కడే రాణించగా.. చివర్లో నవీన్ ఉల్ హక్(15 బంతుల్లో 4 ఫోర్లు, సిక్స్‌తో 30 నాటౌట్) మెరుపులు మెరిపించాడు.

సన్‌రైజర్స్ ఈస్టర్న్ కేప్ బౌలర్లలో మార్కో జాన్సెన్, రిచర్డ్ గ్లీసన్, ఓట్‌నీల్ బార్ట్‌మన్, లియమ్ డాసన్ తలో రెండు వికెట్లు తీసారు. అనంతరం లక్ష్యచేదనకు దిగిన సన్‌రైజర్స్ ఈస్టర్న్ కేప్ 15.2 ఓవర్లలో 4 వికెట్లకు 117 పరుగులు చేసి గెలుపొందింది. కెప్టెన్ ఎయిడెన్ మార్క్‌రమ్(20 బంతుల్లో 2 ఫోర్లు, 2 సిక్స్‌లతో 31 నాటౌట్), డేవిడ్ బెడింగ్‌హామ్(20 బంతుల్లో 4 ఫోర్లు, సిక్స్‌తో 39) రాణించారు. ఈ గెలుపుతో సన్‌రైజర్స్ ఈస్టర్న్ కేప్ పాయింట్స్ టేబుల్‌లో నాలుగో స్థానంలో నిలిచింది.

డిఫెండింగ్ ఛాంపియన్ అయిన సన్‌రైజర్స్ ఈస్టర్న్ కేప్.. ఈ సీజన్‌లో పేలవ ఆరంభాన్ని అందుకుంది. ఎట్టకేలక విజయాల బాట పట్టడంతో సన్‌రైజర్స్ అభిమానులు సంతోషం వ్యక్తం చేస్తున్నారు. ఇదే జోరును కొనసాగించి ముచ్చటగా మూడో టైటిల్‌‌ను గెలుచుకోవాలని ఆకాంక్షిస్తున్నారు.

సౌతాఫ్రికా 20 లీగ్‌లో ఐపీఎల్ ఫ్రాంచైజీలు భాగమైన విషయం తెలిసిందే. ఈ టోర్నీలో మొత్తం 6 జట్లు తలపడుతుండగా.. ఈ ఆరు టీమ్స్ ఐపీఎల్ ఫ్రాంచైజీలకు చెందినవే. సన్‌రైజర్స్, ఢిల్లీ క్యాపిటల్స్, ముంబై ఇండియన్స్, చెన్నై సూపర్ కింగ్స్, లక్నో సూపర్ జెయింట్స్‌తో పాటు రాజస్థాన్ రాయల్స్‌కు సంబంధించిన జట్లు ఉన్నాయి.

ఈ క్రమంలోనే సౌతాఫ్రికా 20 లీగ్‌ను మినీ ఐపీఎల్‌లా పరిగణిస్తారు. ఇక ప్రతీ మ్యాచ్‌కు హాజరయ్యే సన్‌రైజర్స్ హైదరాబాద్ ఓనర్ కావ్య మారన్.. ఈ సారి మాత్రం ఇంకా సౌతాఫ్రికా 20 లీగ్‌లో కనిపించలేదు.