SA vs ENG: అందుకే మార్క్‌వుడ్, టెంబా బవుమా ఆడటం లేదు

ఐసీసీ ఛాంపియన్స్ ట్రోఫీ 2025లో భాగంగా సౌతాఫ్రికాతో జరుగుతున్న తమ ఆఖరి లీగ్ మ్యాచ్‌లో ఇంగ్లండ్‌ టాస్ గెలిచి బ్యాటింగ్ ఎంచుకుంది. పిచ్ కండిషన్స్ నేపథ్యంలోనే ఈ నిర్ణయం తీసుకున్నానని ఇంగ్లండ్ కెప్టెన్ జోస్ బట్లర్ తెలిపాడు. 'మేం ముందుగా బ్యాటింగ్ చేయాలనుకుంటున్నాం. పిచ్ చూడటానికి బాగుంది. కొన్ని పగుళ్లు కూడా కనిపిస్తున్నాయి. ఇదే వికెట్‌పై జరిగిన సౌతాఫ్రికా, అఫ్గానిస్థాన్ మ్యాచ్‌ను చూశాం. ఆ మ్యాచ్ ఫలితం ఆధారంగానే ముందుగా బ్యాటింగ్ తీసుకున్నాను.

ఇంగ్లండ్ కెప్టెన్సీ బాధ్యతల నుంచి తప్పుకోవడానికి ఇదే సరైన సమయం అనిపించింది. ఈ నిర్ణయం తీసుకోవడానికి మరింత సమయం తీసుకోవాలనుకోలేదు. ఇది చాలా సులువైన నిర్ణయం. అందుకే నేను కెప్టెన్సీ వదులుకున్నాను. ఈ రోజు మేం మెరుగైన ప్రదర్శన చేస్తామని ఆశిస్తున్నా. అయితే కెప్టెన్సీ బాధ్యతల నుంచి తప్పుకోవడం బాధగానే ఉంది. దేశానికి ప్రాతినిథ్యం వహించడంతో పాటు నాయకత్వం వహించడం ఏ ఆటగాడికైనా గొప్ప గౌరవమే. కెప్టెన్‌గా నాకు మధుర జ్ఞాపకాలు ఉన్నాయి. గాయంతో మార్క్ వుడ్ ఈ మ్యాచ్‌కు దూరం కాగా.. సకీబ్ మహ్మూద్ జట్టులోకి వచ్చాడు.'అని జోస్ బట్లర్ తెలిపాడు.

Photo Credit: Twitter

మరోవైపు ఛేజింగ్ చేసే అవకాశం దక్కడంపై సంతోషంగా ఉన్నామని సౌతాఫ్రికా తాత్కలిక కెప్టెన్ ఎయిడెన్ మార్క్‌రమ్ తెలిపాడు. రెగ్యులర్ కెప్టెన్ టెంబా బవుమా అనారోగ్యంతో ఈ మ్యాచ్‌కు దూరమవడంతో మార్క్‌రమ్ జట్టును నడిపిస్తున్నాడు. 'ఛేజింగ్ చేసే అవకాశం రావడం పట్ల మేం సంతోషంగా ఉన్నాం. ఎందుకంటే ఈ టోర్నీలో ఇప్పటి వరకు మేం ఛేజింగ్ చేయలేదు. బలమైన ఇంగ్లండ్‌ జట్టుపై ఛేజింగ్ చేయాలనుకుంటున్నాం. ఈ మ్యాచ్‌కు అనారోగ్యంతో టోనీ, టెంబా బవుమా దూరమయ్యారు. దురదృష్టవశాత్తు ఈ ఇద్దరూ తాజా మ్యాచ్ ఆడటం లేదు. కానీ తదుపరి మ్యాచ్‌ల్లోపు వారు కోలుకుంటారని ఆశిస్తున్నాం.

ఈ ఇద్దరి స్థానాల్లో స్టబ్స్, క్లాసెన్ జట్టులోకి వచ్చారు. మంచి టెక్నిక్ ఉన్న స్టబ్స్ ఓపెనింగ్ చేస్తాడు. మా గత మ్యాచ్ వర్షంతో తుడిచిపెట్టుకుపోయింది. మేం కొన్ని ట్రైనింగ్ సెషన్స్‌తోనే ఈ మ్యాచ్‌కు సిద్దమయ్యాం.'అని ఎయిడెన్ మార్క్‌రమ్ చెప్పుకొచ్చాడు. వరుసగా రెండు పరాజయాలతో ఇంగ్లండ్‌ సెమీస్ రేసు నుంచి తప్పుకోగా.. సౌతాఫ్రికా సెమీస్‌కు అడుగు దూరంలో నిలిచింది. ఈ మ్యాచ్‌లో విజయం సాధించినా.. తక్కువ మార్జిన్‌తో ఓడినా సౌతాఫ్రికా సెమీస్ చేరుతోంది. చిత్తుగా ఓడితే మాత్రం అఫ్గాన్‌కు అవకాశం దక్కుతుంది.

తుది జట్లు:
ఇంగ్లండ్: ఫిలిప్ సాల్ట్, బెన్ డకెట్, జేమీ స్మిత్(కీపర్), జో రూట్, హ్యారీ బ్రూక్, జోస్ బట్లర్(కెప్టెన్), లియామ్ లివింగ్‌స్టోన్, జేమీ ఓవర్టన్, జోఫ్రా ఆర్చర్, ఆదిల్ రషీద్, సాకిబ్ మహమూద్

సౌతాఫ్రికా : ట్రిస్టన్ స్టబ్స్, ర్యాన్ రికెల్టన్, రాస్సీ వాన్ డెర్ డస్సెన్, ఐడెన్ మార్క్రామ్(కెప్టెన్), హెన్రిచ్ క్లాసెన్(కీపర్), డేవిడ్ మిల్లర్, వియాన్ ముల్డర్, మార్కో జాన్సెన్, కేశవ్ మహరాజ్, కగిసో రబడ, లుంగి ఎన్గిడి