2 నిమిషాల్లో 26 సిక్సర్లు.. లాక్‌డౌన్‌లో అలా చేయడాన్ని మిస్సవుతున్నా: రోహిత్

క్రికెట్​ను మిస్సవుతున్నా:

లాక్‌డౌన్‌తో క్రికెట్​ను తానెంతో మిస్సవుతున్నానని​ రోహిత్ శర్మ మరోసారి చెప్పాడు. ఇన్‌స్టాగ్రామ్‌ వేదికగా గురువారం ఓ వీడియో (గతంలో సిక్సర్లు కొట్టిన వీడియో) పంచుకున్న హిట్‌మ్యాన్‌.. లాక్‌డౌన్‌ వేళ సిక్సుల మోత మోగించడం కుదరట్లేదని పేర్కొన్నాడు. 'ఇలా చేయడాన్ని మిస్సవుతున్నా' అంటూ వీడియోకి క్యాప్షన్ రాశాడు. 2 నిమిషాల ఒక సెకను ఉన్న ఈ వీడియోలో ఏకంగా 26 సిక్సర్లు ఉండటం విశేషం. దీనికి అభిమానులు సైతం అధిక సంఖ్యలో స్పందిస్తున్నారు. హిట్​మ్యాన్ క్లాసిక్​ సిక్సర్లు చూడడం చాలా మిస్సవుతున్నానని ఓ అభిమాని కామెంట్ చేయగా.. రోహిత్ కళాత్మకమైన ఆటను మళ్లీ చూసేందుకు వేచిచూస్తున్నానని మరో అభిమాని కామెంట్ చేశాడు.

నాలుగు నెలలుగా ఇంటికే పరిమితం:

రోహిత్‌ శర్మ మైదానంలో బ్యాటింగ్‌ చేస్తుంటే అభిమానులు అతడి సిక్సుల కోసం ఎదురుచూస్తుంటారు. బౌలర్‌ ఎవరైనా సునాయాసంగా బంతిని బౌండరీ దాటించగల సమర్థుడు. అలాంటి క్రికెటర్‌ నాలుగు నెలలుగా ఇంటికే పరిమితమయ్యాడు. కివీస్ పర్యటన సందర్భంగా ఫిబ్రవరిలో గాయం కావడంతో ఆ పర్యటన మధ్యలోనే ఇంటికి చేరుకున్న రోహిత్.. తర్వాత మైదానంలో అడుగుపెట్టలేదు. ఐపీఎల్‌లోనైనా అలరిస్తాడనుకుంటే అది వాయిదా పడింది. దీంతో అభిమానులకు నిరీక్షణ తప్పలేదు.

యువరాజ్‌ మరికొంత కాలం ఆడాల్సింది:

అంతకుముందు ట్వీట్‌లో టీమిండియా మాజీ క్రికెటర్‌ యువరాజ్‌ సింగ్‌ మరికొంత కాలం ఆడాల్సిందని వైస్‌ కెప్టెన్‌ రోహిత్‌ శర్మ అభిప్రాయపడ్డాడు. యువరాజ్‌ అంతర్జాతీయ క్రికెట్‌కు వీడ్కోలు పలికి బుధవారంకు ఏడాది పూర్తైంది. ఈ సందర్భంగా రోహిత్‌ తన సీనియర్‌ని గుర్తుచేసుకున్నాడు. అందులో ఇద్దరి మధ్యా అద్భుతమైన జ్ఞాపకాలున్నాయని చెప్పాడు. అలాగే యువీ మరికొంత కాలం ఆడాల్సి ఉండేదని ఆశాభావం వ్యక్తం చేశాడు. లాక్​డౌన్ వల్ల దాదాపు మూడు నెలలుగా ఇంటికే పరిమితమైన రోహిత్​.. కుటుంబంతో సంతోషంగా గడుపుతున్నాడు. ఫిట్​నెస్​ను కాపాడుకునేందుకు కసరత్తులు చేస్తున్నాడు.

భారత్‌-శ్రీలంక పర్యటన వాయిదా!!