రోడ్డు ప్రమాదంతో జీవితం విలువ తెలిసింది: రిషభ్ పంత్

నా ఆలోచన విధానమే మారింది..

'ప్రస్తుతం నా పరిస్థితి మెరుగ్గా ఉంది. చాలా వేగంగా కోలుకుంటున్నాను. ఆ దేవుని దయతో పాటు మెడికల్ టీమ్ సహకారంతో అతి త్వరలోనే నేను పూర్తిగా కోలుకుంటానని, ఫిట్ అవుతానని ఆశిస్తున్నా. ప్రస్తుతం నా చుట్టూ ఉన్న పరిస్థితుల గురించి చెప్పడం నాకు కష్టంగా ఉంది. అయితే రోడ్డు ప్రమాదం తర్వాత నా జీవితాన్ని భిన్నమైన దృక్కోణంతో చూస్తున్నాను. చిన్న చిన్న పనులను కూడా ఆస్వాదిస్తున్నాను. ఉరకుల పరుగుల జీవితంలో చాలా మంది ఈ చిన్న చిన్న విషయాలను ఆస్వాదించలేకపోతున్నారు. రోడ్డు ప్రమాదం తర్వాత నేను చేసే ప్రతీ పనిలో ఆనందాన్ని వెతుక్కుంటున్నా.

బ్రష్ చేయడాన్ని ఆస్వాదిస్తున్నా..

చివరకు బ్రష్ చేయడాన్ని, సూర్యని కింద కూర్చోవడం వంటి పనులను ఆస్వాదిస్తున్నా. మన లక్ష్యాలను సాధించే క్రమంలో ఇలాంటి చిన్న విషయాలను పెద్దగా పట్టించుకోం. కానీ రోడ్డు ప్రమాదం తర్వాత జీవితంలో ప్రతీ రోజు గొప్పదనే విషయం నాకు తెలిసొచ్చింది. ప్రతీ క్షణాన్ని ఆస్వాదించాలని నిర్ణయించుకున్నాను. అది పాజిటీవ్ అయినా నెగటీవ్ అయినా మనకు అనుకూలంగా మార్చుకోవాలని డిసైడ్ అయ్యా.

షెడ్యూల్ ప్రకారం నా రోజు వారి పనులను ఫాలో అవుతున్నా.

రోజంతా.. ఫిజియోథెరపినే..

ఉదయం లేవగానే ఫిజియోథెరపిస్ట్ సాయంతో తొలి ఫిజియోథెరపి సెషన్‌లో పాల్గొంటున్నా. ఆ తర్వాత కాస్త విరామం తీసుకొని రిఫ్రెష్ అయ్యి సెకండ్ సెషన్‌కు సిద్దమవుతున్నా. సెకండ్ సెషన్ త్వరగా ప్రారంభించి ఎంత నొప్పిని భరించగలుగుతున్నాననే విషయాన్ని గ్రహిస్తున్నా. సాయంత్రం చివరి సెషన్‌తో నా రోజును ముగిస్తున్నా. ఈ మధ్య‌లో మెడికల్ టీమ్ సూచనల మేరకు పండ్లు, పానియాలు తీసుకుంటున్నా. సూర్యని కింద కొంత సేపు కూర్చునే ప్రయత్నం చేస్తున్నా. ఈ విధానం నేను పూర్తిగా కోలుకునేవరకు సాగనుంది.

డియర్ ఫ్యాన్స్..

నేను కోలుకోవాలని చాలా మంది మెసేజ్‌లు చేశారు. నాకు ఇంత మంది శ్రేయోభిలాషులు ఉండటం అదృష్టంగా భావిస్తున్నా. నా అభిమానులను నేను కోరేది ఒక్కటే. భారత జట్టు, ఢిల్లీ క్యాపిటల్స్‌కు మద్దతుగా ఉండాలని విజ్ఞప్తి చేస్తున్నా. మీ ప్రేమను ఇలానే పంపిస్తూనే ఉండండి. వాటికి తర్వలోనే రెట్టింపుగా ప్రేమను తిరిగిస్తా. నా ఆటతో మిమ్మల్ని సంతోష పరుస్తా.'అని పంత్ చెప్పుకొచ్చాడు.