గబ్బా రమ్మన్నాడు.. వెళ్లాక చేతులెత్తేశాడు.. ఆసీస్‌ కెప్టెన్‌పై అశ్విన్‌ సెటైర్లు

చెత్త కీపింగ్‌తో..

'రెండో ఇన్నింగ్స్‌లో రిషభ్ పంత్‌(89 నాటౌట్)ను స్టంపింగ్‌ చేసే అవకాశాన్ని పైన్‌ వదిలేశాడు. దాంతో పైన్‌ను ఇష్టపడటం మొదలెట్టాను. మమ్మల్ని గబ్బాకు రమ్మని పిలిచాడు. తీరా వెళితే అక్కడ స్టంపింగ్‌ చేసే అవకాశాన్ని వదిలేశాడు. అలా అతనే మాకు సిరీస్‌ను కట్టబెట్టాడు. 2-1 తేడాతో మేం గెలుపొందడానికి కృషి చేశాడని చెప్పను కానీ, పరోక్షంగా సాయం మాత్రం చేశాడు' అని అశ్విన్‌ సరదాగా పేర్కొన్నాడు.

సినిమా డైలాగ్స్‌తో

'ఆసీస్ సారథి టిమ్‌ పైన్‌.. సినిమాల్లో డైలాగ్స్‌ చెప్పినట్లుగా మూడో టెస్టులో గబ్బాకి రా.. చూసుకుందాం అని సవాలు విసిరాడు. అదే సమయంలో ఆఖరి టెస్టుకు నేను, బుమ్రా, జడేజా, విహారి దూరమయ్యాం. బౌలింగ్‌లో అనుభవజ్ఞులు ఎవరూ లేరు. ఆసీస్‌ బౌలర్లు టెస్టుల్లో వెయ్యి వికెట్లు పైగా తీస్తే.. మన బౌలర్లు 13 వికెట్లు తీశారు. అయినా జట్టుగా పోరాడి విజయం సాధించాం. ప్రపంచ నంబర్‌ వన్‌ బౌలర్ కమిన్స్‌ బౌలింగ్‌లో శార్దూల్‌ సిక్సర్‌తో ఖాతా తెరవడం సూపర్‌. అంతేగాక లాంగ్‌ఆన్‌లో సిక్సర్‌తో అతడు 50 పరుగులు చేశాడు'' అని అశ్విన్‌ తెలిపాడు.

అద్బుత పోరాటం..

ఇక సిడ్నీ వేదికగా మూడో టెస్టులో అశ్విన్‌(39 నాటౌట్), హనుమ విహారి(23 నాటౌట్)తో కలిసి ఓటమి వైపు వెళ్తున్న మ్యాచ్‌ను డ్రాగా ముగించిన విషయం తెలిసిందే. ఒకవైపు విపరీతమైన వెన్నునొప్పి బాధిస్తున్నా.. అశ్విన్‌ ఎంతో నిబద్ధతతో ఆడాడు. వీరిద్దరూ 259 బంతులు ఎదుర్కొని చివరి వరకూ క్రీజులో పాతుకుపోయారు. తాము ఔటైతే టెయిలెండర్ల వికెట్లు పడతాయనే ఉద్దేశంతో మ్యాచ్‌ను డ్రా దిశగా తీసుకెళ్లారు. ఈ నేపథ్యంలోనే సిడ్నీ టెస్టును డ్రా చేయడంతో అశ్విన్‌పై ప్రశంసల జల్లు కురిసింది.

అశ్విన్ X పైన్

ఆరోజే పైన్‌ స్లెడ్జింగ్‌ చేయడంతో అశ్విన్ దీటుగా బదులిచ్చాడు. 'గబ్బాకు రా చూసుకుందాం' అని పైన్‌ అంటే.. 'నువ్వు భారత్‌కు వస్తే అదే నీ ఆఖరి సిరీస్‌' అంటూ అశ్విన్‌ సైతం సవాల్‌ చేశాడు. ఈ వీడియో వైరల్‌గా మారింది. ఈ విషయంపై ఆస్ట్రేలియా కెప్టెన్‌ తర్వాత బహిరంగ క్షమాపణలు చెప్పాడు. తాను అలా చేయాల్సింది కాదన్నాడు. ఇక గబ్బాలో తమకు ఓటమేలేదన్న అహంకారంతో పైన్ ఈ వ్యాఖ్యలు చేశాడు. తీరా భారత యువ ఆటగాళ్లు ఆసీస్ గబ్బా కోటను బద్దలు కొట్టారు. విజయానంతరమే అశ్విన్.. పైన్‌, ఆసీస్ మాజీ క్రికెటర్లకు తనదైన శైలిలో చురకలంటించాడు.