Test Rankings: టాప్​-5లోకి అశ్విన్.. రిషభ్‌ పంత్‌కు కెరీర్ బెస్ట్ ర్యాంక్.. 9 స్థానాలు ఎగబాకిన రోహిత్ శర్మ!

దుబాయ్: అంతర్జాతీయ క్రికెట్ మండలి(ఐసీసీ) తాజాగా విడుదల చేసిన టెస్ట్ ర్యాంకింగ్స్‌లో భారత ఆటగాళ్లు రవిచంద్రన్ అశ్విన్, రోహిత్ శర్మ, రిషభ్ పంత్ దుమ్ములేపారు. ఇంగ్లండ్‌తో సెకండ్ టెస్ట్‌లో సెంచరీలతో కదం తొక్కిన రోహిత్​ శర్మ, రవిచంద్రన్​ అశ్విన్​లు తమ స్థానాలను మెరుగుపరుచుకోగా.. వికెట్ కీపర్ రిషభ్ పంత్ కెరీర్ బెస్ట్ ర్యాంక్ అందుకున్నాడు.

బ్యాట్స్‌మెన్ ర్యాకింగ్స్‌లో రోహిత్ శర్మ​ తొమ్మిది స్థానాలు మెరుగుపరుచుకుని 14వ స్థానంలో నిలిచాడు. ఈ జాబితాలో న్యూజిలాండ్​ కెప్టెన్​ కేన్​ విలియమ్సన్ అగ్రస్థానంలో​ కొనసాగుతుండగా.. విరాట్​ కోహ్లీ తన 5వ స్థానాన్ని నిలబెట్టుకున్నాడు. టీమ్​ఇండియా యువ ఆటగాడు రిషభ్​ పంత్​ 11వ స్థానాన్ని పొందాడు. ఇది అతని కెరీర్ బెస్ట్ ర్యాంక్. సెకండ్ ఇన్నింగ్స్​లో సెంచరీ చేసిన ఆల్​రౌండర్​ అశ్విన్​.. బ్యాట్స్​మెన్​​ జాబితాలో ఏకంగా 14 స్థానాలు మెరుగుపరుచుకుని 81వ స్థానంలో నిలిచాడు. 8 వికెట్లతో.. బౌలర్ల జాబితాలో 7వ స్థానం దక్కించుకున్నాడు. ఆల్‌రౌండర్ ర్యాకింగ్స్‌లో మాత్రం 5వ స్థానం సంపాదించాడు​.

బౌలర్ల జాబితాలో ఆస్ట్రేలియా పేసర్​ ప్యాట్​ కమిన్స్​ తన మొదటి స్థానాన్ని నిలబెట్టుకున్నాడు. ఆల్​రౌండర్ల జాబితాలో వెస్టిండీస్​ ఆటగాడు జేసన్​ హోల్డర్​ 407 పాయింట్లతో మొదటి స్థానంలో ఉన్నాడు. ఇక బౌలర్ల జాబితాలో అరంగేట్ర టెస్టులోనే 5 వికెట్ల ఘనత అందుకున్న స్పిన్నర్​ అక్షర్​ పటేల్​ 68వ స్థానంలో, కుల్​దీప్​ యాదవ్​ 50వ స్థానంలో ఉన్నారు. ఇంగ్లండ్ స్పిన్నర్ జాక్‌లీచ్ 6 స్థానాలు మెరుగపరుచుకొని 31వ స్థానంలో నిలిచాడు. బంగ్లాదేశ్‌పై అద్భుత విజయాన్నందుకున్న వెస్టిండీస్ ఆటగాళ్లు కూడా మంచి ర్యాంకులు అందుకున్నారు.