Ravi Shastri: గంగూలీతో విభేదాల్లేవ్.. ఆ రోజు ఆలస్యమయ్యాడు బస్సు ఆగలేదంతే!

న్యూఢిల్లీ: టీమిండియా మాజీ కెప్టెన్, భారత క్రికెట్ నియంత్రణ మండలి(బీసీసీఐ) ప్రెసిడెంట్ సౌరవ్ గంగూలీ‌తో తనకు ఎలాంటి విభేదాలు లేవని టీమ్ హెడ్ కోచ్ రవిశాస్త్రి తెలిపాడు. తాజాగా ఓ ఇంటర్వ్యూలో పాల్గొన్న రవిశాస్త్రి ముందు దాదాతో ఉన్న మనస్పర్థల గురించి ప్రస్తావించగా.. అలాంటివేమి లేవన్నాడు. అంతేకాకుండా సౌరవ్ గంగూలీ తన సారథ్యంలో ఆడాడని, చాలా కలిసే క్రికెట్ ఆడామని చెప్పుకొచ్చాడు. భారత క్రికెట్‌లో రవిశాస్త్రి, సౌరవ్ గంగూలీకి ఏ మాత్రం పడదని ప్రతీ ఒక్కరికి తెలిసిందే.

పైగా అవకాశం దొరికినప్పుడల్లా ఈ ఇద్దరు ఒకరిపై ఒకరు విమర్శలు చేసుకుంటూనే ఉంటారు. వార్తల్లో నిలుస్తుంటారు. ఒకరోజు ఆలస్యంగా వచ్చినందుకు జట్టు ప్రయాణం చేసే బస్సులో గంగూలీని రవిశాస్త్రి ఎక్కనివ్వలేదని, అప్పుడే ఈ ఇద్దరి మధ్య వైరం మొదలైందనే ప్రచారం జరిగింది. ఇదే విషయం గురించి దాదాను మీడియా ప్రశ్నించగా "అలాంటిదేమీ లేదు. అయినా మీరు రవిశాస్త్రిని ఉదయాన్నే ఇంటర్వ్యూ చేయొద్దు. సాయంత్రం చేయండి'అని వెటకారంగా బదులిచ్చాడు.

తాజాగా ఈ విషయం గురించి రవి శాస్త్రిని అడగగా.. "గంగూలితో నాకు మనస్పర్థలు లేవు. ఎవరికోసం బస్సు ఆగదు. అది ఎవరైన సరే. ఆ రోజు గంగూలీ ఉన్నాడంతే" అని సమాధానమిచ్చాడు. 'బీసీసీఐ అధ్యక్షుడిగా దాదా మీకు వ్యతిరేకమా?' అని అడగగా.. "అలాంటిదేం లేదు. అతను ఇంగ్లండ్​లో ఉన్నప్పుడు తనతో మాట్లాడా. దాదా ఆటను చాలా చూశాను. మేమిద్దరం ఒకే జట్టు(టాటా స్టీల్​)కు ఆడాం. ఆ జట్టుకు నేను కెప్టెన్​గా వ్యవహరించినప్పుడు నా సారథ్యంలో అతను ఆడాడు. చాలా కాలం కలిసే ఉన్నాం'అని శాస్త్రి చెప్పుకొచ్చాడు. మీడియాకు ఇలాంటి స్టోరీస్​ (బేల్​ పూరి, చాట్​ స్టోరీలు) అంటే చాలా ఇష్టమని, దానిమీద చక్కగా మసాలా జల్లుతారని, తాను కూడా ఇలాంటివి ఇష్టపడతానని మీడియాపై శాస్త్రి వ్యంగ్యస్త్రాలు సంధించాడు.

టీ20 ప్రపంచకప్ తర్వాత రవిశాస్త్రి కోచ్ పదవి గడువు ముగియనుంది. ఆ పదవిలో కొనసాగేందుకు అతను సుముఖంగా లేడు. దాంతో బ్యాటింగ్ కోచ్ విక్రమ్ రాథోడ్ టీమిండియా హెడ్ కోచ్‌గా బాధ్యతలు చేపట్టే అవకాశం ఉంది.