అతని వల్లే టెస్ట్ క్రికెట్‌కు క్రేజ్: రవి శాస్త్రి

టీమిండియా స్టార్ బ్యాటర్ విరాట్ కోహ్లీపై మాజీ హెడ్ కోచ్ రవి శాస్త్రి ప్రశంసల జల్లు కురిపించాడు. కోహ్లీ కారణంగానే టెస్ట్ క్రికెట్‌కు ఆదరణ పెరిగిందన్నాడు. కోహ్లీ దూకుడు.. నిలకడైన ఆటతోనే ప్రేక్షకులు మళ్లీ సంప్రదాయ క్రికెట్‌ను చూడటం మొదలు పెట్టారని, కోహ్లీ సారథ్యంలోని భారత జట్టును చూసేందుకు జనాలు ఎదురు చూసేవారని తెలిపాడు. టెస్ట్ క్రికెట్‌కు కోహ్లీ కంటే గొప్ప ప్రచారకర్త లేడని అభిప్రాయపడ్డాడు.

ఇటీవలే విరాట్ కోహ్లీ టెస్ట్ క్రికెట్‌కు వీడ్కోలు పలికిన విషయం తెలిసిందే. కోహ్లీ నిర్ణయం యావత్ క్రికెట్ ప్రపంచాన్ని షాక్‌కు గురి చేసింది. మరో 2-3 ఏళ్లు ఆడుతాడనుకున్న కోహ్లీ ఇలా ఎందుకు వీడ్కోలు పలికాడో ఎవరికి అర్థం కాలేదు. కోహ్లీ కూడా రిటైర్మెంట్‌కు గల కారణాన్ని వెల్లడించలేదు. సంతోషంగా.. సంతృప్తిగా ఆట నుంచి వైదొలుగుతున్నట్లు తన రిటైర్మెంట్ ప్రకటనలో పేర్కొన్నాడు.

ఐపీఎల్ 2025 సీజన్‌లో భాగంగా రాయల్ ఛాలెంజర్స్ బెంగళూరు(ఆర్‌సీబీ), కోల్‌కతా నైట్‌రైడర్స్ మధ్య శనివారం బెంగళూరు వేదికగా జరగాల్సిన మ్యాచ్‌కు వర్షం అంతరాయం కలిగించింది. ఈ మ్యాచ్‌కు ఆర్‌సీబీ ఫ్యాన్స్.. విరాట్ కోహ్లీ టెస్ట్ జెర్సీలను ధరించి వచ్చారు. కోహ్లీకి ఘన వీడ్కోలు పలకాలని భావించారు. కానీ కుండపోత వర్షం వారి ప్రణాళికలను దెబ్బతీసింది. మరోవైపు మైదానంలోని స్క్రీన్‌పై విరాట్ కోహ్లీ టెస్ట్ గణంకాలను ప్రదర్శించారు.

ఐపీఎల్‌లో కామెంటేటర్‌గా వ్యవహరిస్తున్న రవి శాస్త్రి.. విరాట్ కోహ్లీ టెస్ట్ గణంకాలపై మాట్లాడుతూ అతనిపై ప్రశంసల జల్లు కురిపించాడు.'విరాట్ కోహ్లీ తన ఆటతో టెస్ట్‌ క్రికెట్‌కు ఆదరణ పెరిగేలా చేశాడు. కోహ్లీ సారథ్యంలోని భారత టెస్ట్ టీమ్‌ను చూడటానికి జనాలు ఎదురు చూసేవారు. టెస్ట్ క్రికెట్‌‌కు కోహ్లీ కంటే గొప్ప అంబాసిడర్ లేడు.'అని రవిశాస్త్రి చెప్పుకొచ్చాడు.

అంతకుముందు ఓ ఇంటర్వ్యూలో.. రిటైర్మెంట్ ప్రకటించే వారం ముందు కోహ్లీ తనతో మాట్లాడాడని రవిశాస్త్రి తెలిపాడు. మానసికంగా అలసిపోవడంతోనే కోహ్లీ రిటైర్మెంట్ ప్రకటించాడని తెలిపాడు. 'కోహ్లీ తన రిటైర్మెంట్ నిర్ణయాన్ని ప్రకటించడానికి వారం రోజుల ముందు నాతో మాట్లాడాడు. ఆటలో రాణించాల్సినంత రాణించాననే స్పష్టతతో కోహ్లీ ఉన్నాడు. రిటైర్మెంట్ ప్రకటించినందుకు కోహ్లీలో ఎలాంటి బాధ లేదు. చాలా సంతోషంగా ఆటకు వీడ్కోలు పలికాడు. అతని నిర్ణయం నన్ను షాక్‌కు గురి చేసింది. అతనిలో మరో రెండు, మూడేళ్లు ఆడే సత్తా ఉంది. శారీరకంగా కూడా ఫిట్‌గా ఉన్నాడు. కానీ మానసికంగా బాగా అలసిపోయాడు.

సాధారణంగా ఓ ఆటగాడు తన బాధ్యతను పూరి చేసి ప్రశాంతంగా ఉంటాడు. కోహ్లీ మాత్రం జట్టు బరిలోకి దిగినప్పుడు.. అన్ని వికెట్లు తానే తీయాలి, అన్ని క్యాచ్‌లు తానే పట్టాలి, అన్ని నిర్ణయాలు తానే తీసుకోవాలి అన్నట్లు వ్యవహరిస్తాడు. ఆట తీవ్రత ఆ స్థాయిలో ఉంటే మానసికంగా అలసిపోక తప్పదు.'అని రవిశాస్త్రి చెప్పుకొచ్చాడు.