Ranji Trophy 2022: విఫలమైన మంత్రిగారు.. రసవత్తరంగా సెమీస్ పోరు!

ఇంకా 254 పరుగులు..

చివరి రోజు ఆటలో విజయం కోసం ఆ జట్టుకు ఇంకా 254 పరుగులు కావాలి. మధ్యప్రదేశ్‌ గెలవాలంటే మరో ఆరు వికెట్లు తీయాలి. అంతకుముందు ఓవర్‌నైట్‌ స్కోరు 163/2తో రెండో ఇన్నింగ్స్‌ కొనసాగించిన మధ్యప్రదేశ్‌.. ప్రత్యర్థి స్పిన్నర్లు షాబాజ్‌ అహ్మద్‌ (5/79), ప్రదీప్త (4/65) దెబ్బకు 281 పరుగులకు ఆలౌటైంది. ఓవర్‌నైట్‌ బ్యాటర్లు రజత్‌ పటీదర్‌ ( 149 బంతుల్లో 11 ఫోర్లతో 79), కెప్టెన్‌ ఆదిత్య శ్రీవాస్తవ ( 225 బంతుల్లో 6 ఫోర్లతో 82) మూడో వికెట్‌కు 151 పరుగులు జోడించారు. వీరి నిష్క్రమణ తర్వాత ఆ జట్టు ఇన్నింగ్స్‌ పేకమేడలా కూలిపోయింది.

విఫలమైన మంత్రిగారు..

తొలి ఇన్నింగ్స్‌లో సెంచరీతో మెరిసిన బెంగాల్ క్రీడల శాఖ మంత్రి, వెటరన్ ప్లేయర్ మనోజ్ తివారీ(7) రెండో ఇన్నింగ్స్‌లో విఫలమయ్యాడు. కార్తీకేయ బౌలింగ్‌లో క్యాచ్ ఔట్‌గా వెనుదిరిగాడు. తొలి ఇన్నింగ్స్‌లో 54 పరుగులకే 5 వికెట్లు కోల్పోయి కష్టాల్లో ఉన్న జట్టును షెహ్‌బాజ్ అహ్మద్(116)తో కలిసి మనోజ్ తివారీ(102) ఆదుకున్నాడు. ఈ ఇద్దరు ఆరో వికెట్‌కు 193 పరుగుల భాగస్వామ్యాన్ని అందించి జట్టును ఆదుకున్నారు. దాంతో తొలి ఇన్నింగ్స్‌లో బెంగాల్ 273 పరుగులకు కుప్పకూలింది. దాంతో మధ్య‌ ప్రదేశ్‌కు 68 పరుగుల ఆధిక్యం లభించింది. ఈ ఆధిక్యంతో పాటు రెండో ఇన్నింగ్స్‌లో 281 పరుగులు చేయడంతో బెంగాల్ ముందు 350 పరుగుల లక్ష్యం నమోదైంది.

662 పరుగుల ఆధిక్యంలో ముంబై..

41 సార్లు రంజీ ఛాంపియన్‌ ముంబయి మరోసారి ఈ టోర్నీలో ఫైనల్‌కు చేరువైంది. సెమీస్‌లో ఉత్తరప్రదేశ్‌పై పూర్తి ఆధిపత్యం ప్రదర్శిస్తున్న ఆ జట్టు ప్రస్తుతం 662 పరుగుల భారీ ఆధిక్యంలో ఉంది. యశస్వి జైశ్వాల్‌ (181; 372 బంతుల్లో 23×4, 1×6) వరుసగా రెండో మ్యాచ్‌లోనూ శతకాన్ని అందుకోగా.. అర్మాన్‌ జాఫర్‌ (127; 259 బంతుల్లో 15×4, 2×6) సెంచరీతో సత్తా చాటాడు. ఓవర్‌నైట్‌ స్కోరు 133/1తో శుక్రవారం రెండో ఇన్నింగ్స్‌ కొనసాగించిన ముంబయి.. వీళ్లిద్దరి శతకాల సాయంతో 449/4తో నాలుగో రోజు ఆట ముగించింది. సర్ఫరాజ్‌ ఖాన్‌ (23 బ్యాటింగ్‌), శామ్స్‌ ములాని (10 బ్యాటింగ్‌) క్రీజులో ఉన్నారు. మరో రోజు ఆట మాత్రమే మిగిలి ఉన్న నేపథ్యంలో ముంబయి ఫైనల్‌ చేరడం ఖాయమనిపిస్తోంది.