పాపం.. గంభీర్‌ను అపార్థం చేసుకుంటారు: అశ్విన్

టీమిండియా హెడ్ కోచ్ గౌతమ్ గంభీర్‌కు మాజీ క్రికెటర్ రవిచంద్రన్ అశ్విన్ అండగా నిలిచాడు. గంభీర్‌ను చాలా మంది తప్పుగా అర్థం చేసుకుంటారని అభిప్రాయపడ్డాడు. ఐర్లాండ్‌‌తో రెండు టీ20ల సిరీస్‌లో టీమిండియా క్లీన్ స్వీప్ కావడం తీవ్ర విమర్శలకు దారితీసింది.

ఏ ఫార్మాట్‌లోనైనా ఐర్లాండ్ చేతిలో భారత్ సిరీస్ కోల్పోవడం ఇదే తొలిసారి. ఈ ఘోర పరాజయం తర్వాత హెడ్ కోచ్ గౌతమ్ గంభీర్ వ్యూహాలపై, టీమ్‌సెలెక్షన్‌పై విమర్శలు వెల్లువెత్తాయి. కొందరు ఆటగాళ్లను కావాలనే పక్కనపెట్టారని, గంభీర్ తన వ్యక్తిగత ఇష్టాయిష్టాల ప్రకారమే జట్టును ఎంపిక చేశాడనే ఆరోపణలు వచ్చాయి.

పంతం నెగ్గించుకున్న గంభీర్..పాపం బుడ్డోడు డ్రింక్స్ బాయ్‌గా..!

అపార్థం చేసుకుంటారు..

అయితే ఈ విమర్శలను రవిచంద్రన్ అశ్విన్ తప్పుబట్టాడు. గంభీర్‌ను చాలా మంది తప్పుగా అర్థం చేసుకుంటున్నారని అభిప్రాయపడ్డాడు. తన యూట్యూబ్ ఛానెల్‌ వేదికగా మాట్లాడిన అశ్విన్.. భేదాభిప్రాయాలు ఉన్నంత మాత్రాన వారిని అసహ్యించుకుంటున్నట్లు కాదని స్పష్టం చేశాడు. భారత క్రికెట్‌లో భిన్నమైన అభిప్రాయాలను గౌరవిస్తూ, వాటిని వ్యక్తిగత ఇష్టాయిష్టాలతో ముడిపెట్టకుండా ఉండటం నేర్చుకోవడానికి మరికొంత సమయం పడుతుందని వ్యాఖ్యానించాడు.

ఆల్‌రౌండర్ల వ్యూహం సరైనదే..

జట్టులో ఎక్కువ మంది ఆల్‌రౌండర్ల‌కు గంభీర్ ప్రాధాన్యత ఇవ్వడాన్ని అశ్విన్ సమర్థించాడు. టెస్టు క్రికెట్‌లో ఈ వ్యూహాన్ని తాను అంగీకరించకపోయినా, టీ20 ఫార్మాట్‌లో మాత్రం ఇది జట్టుకు మంచి కాంబినేషన్‌ ఇస్తుందని తెలిపాడు. లోయరార్డర్‌లో 6 లేదా 7వ స్థానంలో వచ్చే బ్యాటర్ కొన్ని ఓవర్లు బౌలింగ్ చేయగలిగితే జట్టుకు ఎంతో ప్రయోజనకరమని పేర్కొన్నాడు. ఫినిషర్లకు తగినన్ని అవకాశాలు ఇచ్చి ప్రోత్సహించాల్సిన అవసరం ఉందన్నాడు.

అక్కడే తప్పు చేశాం.. ఐర్లాండ్ మా కంటే బాగా ఆడింది: శ్రేయస్ అయ్యర్

ఇంగ్లండ్ పర్యటనపై అంచనాలు

ఇంగ్లండ్ పర్యటనకు వెళ్లిన భారత్ అక్కడ ఐదు టీ20ల సిరీస్ ఆడనుంది. ఈ సిరీస్‌ గురించి మాట్లాడిన అశ్విన్.. ఇంగ్లండ్‌లోని పిచ్‌లు బ్యాటింగ్‌కు అనుకూలిస్తాయని, ఇది భారత బ్యాటర్లకు కలిసివచ్చే అంశమని అభిప్రాయపడ్డాడు. అయితే, భారత బౌలింగ్ విభాగం, ముఖ్యంగా జట్టులో తగినంత మంది స్పిన్నర్లు లేకపోవడం ఆందోళన కలిగించే విషయమన్నాడు. ఒకవేళ ఇంగ్లండ్ గెలవాలనుకుంటే బౌలింగ్‌కు అనుకూలమైన పిచ్‌లను సిద్ధం చేయాల్సి ఉంటుందని పేర్కొన్నాడు. ఐర్లాండ్ ఓటమి తర్వాత రాబోయే ఇంగ్లండ్ సిరీస్ అటు టీమిండియాకు, ఇటు కోచ్ గౌతమ్ గంభీర్‌కు అత్యంత కీలకం కానుంది.