PAK vs ENG: మళ్లీ విఫలమైన బాబర్ ఆజామ్.. షాన్ మసూద్ భారీ శతకం!

పాకిస్థాన్ మాజీ కెప్టెన్ బాబర్ ఆజామ్ పేలవ ఫామ్ కొనసాగుతోంది. సొంతగడ్డపై ఇంగ్లండ్‌తో సోమవారం ప్రారంభమైన టెస్ట్ సిరీస్‌లోనూ బాబర్ ఆజామ్ శుభారంభాన్ని అందుకోలేకపోయాడు. బ్యాటింగ్‌కు అనుకూలంగా ఉన్న వికెట్‌పై కూడా దారుణంగా విఫలమయ్యాడు. 71 బంతుల్లో 5 ఫోర్లతో 30 పరుగులే చేసి ఇంగ్లండ్ పేసర్ క్రిస్ వోక్స్ బౌలింగ్‌లో వెనుదిరిగాడు.

ముల్తాన్ వేదికగా జరుగుతున్న ఈ మ్యాచ్‌లో టాస్ గెలిచి బ్యాటింగ్‌కు దిగిన పాకిస్థాన్ తొలి రోజు ఆట ముగిసే సమయానికి తొలి ఇన్నింగ్స్‌లో 86 ఓవర్లలో 4 వికెట్లకు 328 పరుగులు చేసింది. కెప్టెన్ షాన్ మసూద్(177 బంతుల్లో 13 ఫోర్లు, 2 సిక్స్‌లతో 151), ఓపెనర్ అబ్దుల్లా షఫీక్(184 బంతుల్లో 10 ఫోర్లు, 2 సిక్స్‌లతో 102) శతకాలతో రాణించారు.

క్రీజులో సౌద్ షకీల్(35 బ్యాటింగ్)తో పాటు నసీమ్ షా(0 బ్యాటింగ్) ఉన్నాడు. ఇంగ్లండ్ బౌలర్లలో గస్ అట్కిన్సన్ రెండు వికెట్లు తీయగా.. క్రిస్ వోక్స్, జాక్ లీచ్ తలో వికెట్ పడగొట్టారు.

శుభారంభం లేకున్నా..
ఈ మ్యాచ్‌లోనూ పాకిస్థాన్‌కు శుభారంభం దక్కలేదు. ఓపెనర్ సయీమ్ ఆయుబ్(4) దారుణంగా విఫలమయ్యాడు. అట్కిన్సన్ బౌలింగ్‌లో కీపర్ క్యాచ్‌గా వెనుదిరిగాడు. దాంతో క్రీజులోకి వచ్చిన షాన్ మసూద్‌తో మరో ఓపెనర్ అబ్దుల్లా ఆచితూచి ఆడుతూ.. ఇన్నింగ్స్‌ను ముందుకు నడిపించాడు.

ఈ ఇద్దరూ ఓపికగా ఆడుతూ ఇంగ్లండ్ బౌలర్ల సహనానికి పరీక్షగా నిలిచారు. వేగంగా ఆడిన షాన్ మసూద్ 57 బంతుల్లో హాఫ్ సెంచరీ పూర్తి చేసుకోగా.. అబ్దుల్లా షఫీక్ 77 బంతుల్లో హాఫ్ సెంచరీ సాధించాడు. దాంతో పాకిస్థాన్ 122/1 స్కోర్‌తో లంచ్ బ్రేక్ వెళ్లింది.

షాన్ మసూద్, అబ్దుల్లా శతకం..
సెకండ్ సెషన్‌లో ఈ జోడీ అదే జోరును కొనసాగించింది. భారీ సిక్స్‌లు బాదిన షాన్ మసూద్ 102 బంతుల్లో శతకం పూర్తి చేసుకోగా.. అబ్దుల్లా ఆచితూచి ఆడుతూ సెంచరీ దిశగా సాగాడు. 233/1 స్కోర్‌తో పాకిస్థాన్ టీ బ్రేక్‌కు వెళ్లింది. మూడో సెషన్ ఆరంభంలోనే అబ్దుల్లా 165 బంతుల్లో శతకం పూర్తి చేసుకోగా.. షాన్ మసూద్ 166 బంతుల్లో 150 పరుగుల మార్క్‌ను అందుకున్నాడు.

క్రీజులో పాతుకుపోయిన ఈ జోడీని అట్కిన్సన్ విడదీసాడు. అబ్దుల్లాను క్యాచ్‌ ఔట్‌గా పెవిలియన్ చేర్చి రెండో వికెట్‌కు నమోదైన 253 పరుగుల భాగస్వామ్యానికి తెరదించాడు. ఆ వెంటనే డబుల్ సెంచరీ దిశగా సాగుతున్న షాన్ మసూద్‌ను జాక్ లీచ్ రిటర్న్ క్యాచ్‌తో బోల్తా కొట్టించాడు. బాబార్ ఆజామ్(30) విఫలమవ్వగా.. పాక్ మేనేజ్‌మెంట్ నసీమ్ షాను నైట్‌ వైచ్‌మన్‌గా పంపించింది.