PAK vs ENG: లాలిపాప్ క్యాచ్‌లు వదిలేసిన బాబర్ ఆజామ్.. ఫిక్సింగ్ చేశాడంటూ ఫ్యాన్స్ ఫైర్! (వీడియో)

రెండు లాలిపాప్ క్యాచ్‌లు..

కెప్టెన్ బాబర్ ఆజామ్ రెండు సులువైన క్యాచ్‌లను వదిలేసాడు. చేతులోకి వచ్చిన బంతిని అందుకోలేకపోయాడు. ఇఫ్తికర్ వేసిన 12 ఓవర్‌ ఐదో బంతికి ఇంగ్లండ్ బ్యాటర్ హారీ బ్రూక్ ఇచ్చిన క్యాచ్‌ను ఎక్స్‌ట్రా కవర్‌లో ఫీల్డింగ్ చేస్తున్న బాబర్ అందుకోలేకపోయాడు. ఈ క్యాచ్ పట్టుంటే బ్రూక్ 11 పరుగులకే వెనుదిరిగేవాడు. ఆ తర్వాత హ్యారీస్ రౌఫ్ వేసిన 16 ఓవర్‌లో మరోసారి హారీ బ్రూక్ ఇచ్చిన సునాయస క్యాచ్‌ను బాబర్ చేజార్చాడు. ఈ ఓవర్ మూడో బంతిని బ్రూక్ భారీ షాట్ కొట్టగా.. మిడాఫ్‌లో గాల్లోకి లేచింది.

అక్కడే ఫీల్డింగ్ చేసిన బాబర్.. అందుకోలేకపోయాడు. ఈ క్యాచ్ పట్టినా బ్రూక్ ఇన్నింగ్స్ 26 పరుగులకే ముగిసేది. ఇక హ్యారీస్ రౌఫ్ వేసిన 19వ ఓవర్‌లో తొలి బంతిని డేవిడ్ మలాన్ భారీ షాట్ ఆడే ప్రయత్నం చేశాడు. కానీ మిస్ టైమ్ కావడంతో మిడ్ వికెట్‌లో గాల్లోకి లేచింది. అక్కడే ఉన్న మమమ్మద్ వసీం అందుకోలేకపోయాడు.

అమ్ముడుపోయారు..

ఈ మూడు క్యాచ్‌లు వదిలేయడంతో పాటు పరుగులను ఆపడంలోనూ విఫలమయ్యారు. గతంలో పాక్ ఆటగాళ్లు చేసిన తప్పిదాలనే మళ్లీ పునరావృతం చేస్తున్నారు. ఈ అవకాశాలతో చెలరేగిన ఇంగ్లండ్ బ్యాటర్లు భారీ స్కోర్ చేసారు. మూడు సులువైన క్యాచ్‌లు వదిలేయడంపై అభిమానులు ఆగ్రహం వ్యక్తం చేస్తున్నారు. ఈ మ్యాచ్ పక్కా ఫిక్సింగ్ చేశారని, ముఖ్యంగా బాబర్ ఆజామ్ డబ్బులకు అమ్ముడుపోయాడంటూ మండిపడుతున్నారు. పీసీబీ వెంటనే విచారణ జరపాలని డిమాండ్ చేస్తున్నారు. ఇంత దారుణమైన ఫీల్డింగ్ ఎక్కడ చూడలేదని ఆగ్రహం వ్యక్తం చేస్తున్నారు. ప్రస్తుతం బాబర్ క్యాచ్ డ్రాప్స్‌కు సంబంధించిన వీడియోలు నెట్టింట వైరల్‌ అవుతున్నాయి.

దంచికొట్టిన మలాన్..

ఈ మ్యాచ్‌లో ముందుగా బ్యాటింగ్ చేసిన ఇంగ్లండ్ నిర్ణీత 20 ఓవర్లలో 3 వికెట్లకు 209 పరుగులు చేసింది. డేవిడ్ మలాన్(47 బంతుల్లో 8 ఫోర్లు, 3 సిక్స్‌లతో 78 నాటౌట్) అజేయ హాఫ్ సెంచరీతో చెలరేగగా.. హెర్రీ బ్రూక్(29 బంతుల్లో ఫోర్, 4 సిక్స్‌లతో 46 నాటౌట్) కీలక ఇన్నింగ్స్ ఆడారు. పాక్ ఫీల్డర్ల తప్పిదాల కారణంగా ఈ ఇద్దరూ నాలుగో వికెట్‌కు ఏకంగా 109 పరుగుల అజేయ భాగస్వామ్యాన్ని నెలకొల్పారు. పాకిస్థాన్ బౌలర్లలో మహమ్మద్ హస్నైన్ ఒక వికెట్ తీయగా.. మిగతా బౌలర్లు విఫలమయ్యారు. మరో రెండు వికెట్లు రనౌట్ ద్వారా వచ్చాయి.

క్రిస్ వోక్స్ తీన్మార్..

అనంతరం లక్ష్యచేధనకు దిగిన పాకిస్థాన్ నిర్ణీత 20 ఓవర్లలో 8 వికెట్లకు 142 పరుగులు మాత్రమే చేసి ఘోర పరాజయం చవిచూసింది. పాక్ జట్టులో షాన్ మసూద్(43 బంతుల్లో 4 ఫోర్లు, సిక్స్‌తో 56) ఒక్కడే హాఫ్ సెంచరీతో పోరడగా.. మిగతా బ్యాటర్లు దారుణంగా విఫలమయ్యారు. రిజ్వాన్(1), బాబర్ ఆజామ్(4) ఘోరంగా విఫలమవ్వడంతో పాక్‌కు పరాజయం తప్పలేదు. ఇంగ్లండ్ బౌలర్లలో క్రిస్ వోక్స్ మూడు వికెట్లు తీయగా.. డేవిడ్ విల్లే రెండు వికెట్లు పడగొట్టాడు. రీస్ టోప్లీ, ఆదిల్ రషీద్, సామ్ కరన్ చెరొక వికెట్ తీసారు.