PAK vs CAN: హాఫ్ సెంచరీతో కెనడా ఓపెనర్ ఒంటరి పోరాటం!

టీ20 ప్రపంచకప్ 2024లో భాగంగా పాకిస్థాన్‌తో జరుగుతున్న లీగ్ మ్యాచ్‌లో కెనడా 107 పరుగుల స్వల్ప లక్ష్యాన్ని నమోదు చేసింది. న్యూయార్క్‌లో నాసౌ కౌంటీ క్రికెట్ మైదానం వేదికగా జరుగుతున్న ఈ మ్యాచ్‌లో ముందుగా బ్యాటింగ్ చేసిన కెనడా నిర్ణీత 20 ఓవర్లలో 7 వికెట్లకు 106 పరుగులు చేసింది.

కెనడా ఓపెనర్ ఆరోన్ జాన్సన్(44 బంతుల్లో 4 ఫోర్లు, 4 సిక్స్‌లతో 52) ఒక్కడే హాఫ్ సెంచరీతో రాణించాడు. కెప్టెన్ సాద్ బిన్ జఫర్(21 బంతుల్లో ఫోర్‌తో 10), కలీమ్ సనా(14 బంతుల్లో సిక్స్‌తో 13 నాటౌట్) మినహా అంతా సింగిల్ డిజిట్‌కే పరిమితమయ్యారు.

పాకిస్థాన్ బౌలర్లలో మహమ్మద్ అమీర్(2/13), హ్యారీస్ రౌఫ్(2/26) నిప్పులు చెరగగా.. షాహిన్ షా అఫ్రిది, నసీమ్ షా తలో వికెట్ తీసారు.

టాస్ ఓడి బ్యాటింగ్‌కు దిగిన కెనడాకు ఆదిలోనే గట్టి షాక్ తగిలింది. పాక్ బౌలర్లు నిప్పులు చెరగడంతో కెనడా బ్యాటర్లు పెవిలియన్‌కు క్యూ కట్టారు. ఓ వైపు వికెట్లు కోల్పోతున్నా.. మరోవైపు ఓపెనర్ ఆరోన్ జాన్సన్ తనదైన శైలిలో పరుగులు రాబట్టాడు. ఈ క్రమంలో 39 బంతుల్లో హాఫ్ సెంచరీ పూర్తి చేసుకున్నాడు. క్రీజులో పాతుకుపోయిన అతన్ని నసీమ్ షా క్లీన్ బౌల్డ్ చేయడంతో 6వ వికెట్‌గా వెనుదిరిగాడు.