ట్రెంట్ బౌల్ట్ ట్రెండ్ సెట్టింగ్ క్యాచ్.. ఒంటి చేత్తో సూపర్ మ్యాన్‌లా.. చూస్తే వావ్ అనాల్సిందే!(వీడియో)

ఇంతకేం జరిగిందంటే..

బంగ్లాదేశ్ ఇన్నింగ్స్ ఏడో ఓవర్‌లో ఈ స్టన్నింగ్స్ క్యాచ్ ఘటన చోటు చేసుకుంది. ఆ ఓవర్ ఆఖరి బంతిని మాట్ హెన్రీ ఔట్ సైడ్ ఆఫ్ షార్ట్ బాల్‌గా సంధించగా.. బంగ్లా బ్యాట్స్‌మన్ లిటన్ దాస్ లెగ్‌సైడ్ పుల్ షాట్ ఆడబోయాడు. కానీ బంతి బ్యాట్ ఎడ్జ్ తీసుకొని థర్డ్ మ్యాన్ దిశగా గాల్లోకి లేచింది. ఆ దిశలో ఫీల్డింగ్ చేస్తున్న ట్రెంట్ బౌల్ట్ పరుగెత్తుకుంటూ వచ్చి బంతిని సూపర్ డైవ్‌తో ఒంటిచేత్తో అందుకున్నాడు. ఈ స్టన్నింగ్ క్యాచ్‌తో లిటన్ దాస్(21) నిరాశగా పెవిలియన్ చేరాడు.

చెలరేగిన మిచెల్, కాన్‌వే..

ఈ మ్యాచ్‌లో టాస్ గెలిచి తొలుత బ్యాటింగ్ చేసిన న్యూజిలాండ్.. బంగ్లా ముందు 319 పరుగుల భారీ లక్ష్యాన్ని ఉంచింది. డేవన్ కాన్వే(110 బంతుల్లో 17 ఫోర్లతో 126), డార్లీ మిచెల్(92 బంతుల్లో 9 ఫోర్లు, 2 సిక్స్‌లతో 100 నాటౌట్) శతకాలతో చెలరేగారు. 120 పరుగులకే 4 వికెట్లు కోల్పోయి కష్టాల్లో పడ్డ జట్టును.. 159 పరుగుల భారీ భాగస్వామ్యంతో గట్టెక్కించి భారీ స్కోర్‌లో కీలక పాత్ర పోషించారు. దాంతో కివీస్ నిర్ణీత 50 ఓవర్లలో 6 వికెట్లకు 318 పరుగులు చేసింది. బంగ్లా బౌలర్లలో రుబెల్ హుస్సేన్ మూడు వికెట్లు తీయగా.. ముస్తాఫిజుర్ రెహ్మాన్, టస్కిన్ అహ్మద్, సౌమ్య సర్కార్ తలో వికెట్ ఖాతాలో వేసుకున్నారు.

ఓటమి అంచున బంగ్లా..

ఇక 319 పరుగుల భారీ లక్ష్యంతో బరిలోకి దిగిన బంగ్లాదేశ్ 102 పరుగులకే 8 వికెట్లు కోల్పోయి ఓటమి ముంగిట నిలిచింది. మహ్మదుల్లా(35 బ్యాటింగ్) పోరాడుతుండగా.. లిటన్ దాస్(21), ముస్తాఫికర్ రెహ్మాన్(21)తో సహా అంతా విఫలమయ్యారు. మ్యాన్ హెన్రీ ఇప్పటికే 4 వికెట్లు ఖాతాలో వేసుకోగా.. జేమ్స్ నీషమ్ 3, కైల్ జేమీసన్ ఓ వికెట్ తీశారు. బంగ్లా విజాయానికి ఇంకా 200కు పైగా పరుగులు చేయాల్సి ఉండగా.. కివీస్ రెండు వికెట్ల దూరంలో నిలిచింది. ఇప్పటికే ఈ మూడు వన్డేల సిరీస్‌ను కైవసం చేసుకున్న కివీస్.. ఈ గెలుపుతో క్లీన్ స్వీప్ చేయనుంది.