విరాట్ కోహ్లీ పెట్టిన బిక్షే.. వేరే ఏ జట్టు అయినా పక్కనపెట్టేసేది: మహమ్మద్ సిరాజ్

కోహ్లీ వల్లనే ఇదంతా..

ఈ సీజన్ నేపథ్యంలో హిందూస్తాన్ టైమ్స్‌కు ఇచ్చిన ఇంటర్వ్యూలో సిరాజ్.. విరాట్ కోహ్లీకి స్పెషల్ థ్యాంక్స్ చెప్పాడు.'ఆర్‌సీబీ తరఫున నేను ఆడిన సీజన్లలో 2018 అత్యంత చెత్తది. ఆ సీజన్‌లో నేను దారుణంగా విఫలమయ్యాను. మరే జట్టు అయినా నాపై వేటు వేసి తప్పించేది. కానీ విరాట్ కోహ్లీ నాకు అండగా నిలిచాడు. ఈ రోజు నేను ఈ స్థాయిలో ఉన్నానంటే దానికి కారణం విరాట్ భాయ్. నా బౌలింగ్ మెరుగవ్వడానికి.. ఆత్మవిశ్వాసం పెరగడానికి కోహ్లీనే కారణం. నా కెరీర్ సక్సెస్‌ పూర్తి క్రెడిట్ అతనిదే. ఒక్క మాటలో చెప్పాలంటే విరాట్ కోహ్లీ పెట్టిన బిక్షే నా ప్రస్తుత జీవితం. కోహ్లీ లేకుండా నేను ఇదంతా సాధించేవాడినే కాదు.

కోహ్లీ లాంటి కెప్టెన్ బౌలర్లకు కావాలి..

విరాట్ కోహ్లీ లాంటి కెప్టెన్ ఉండటం బౌలర్లకు చాలా అవసరం. మైదానంలో విరాట్ దూకుడు, ఎనర్జీ చూసిన తర్వాత బౌలర్‌కు కూడా ఉత్సాహం పెరుగుతుంది. ఏ బౌలర్‌రైనా తన శక్తిని కోల్పోతే అతను కోహ్లీ వైపు ఒక్కసారి చూస్తే సరిపోతుంది. వెయ్యి ఏనుగుల బలం వచ్చి చేరుతుంది. కోహ్లీ చాలా భిన్నమైన వ్యక్తి.'అని సిరాజ్ చెప్పుకొచ్చాడు. తన తండ్రి మరణించినప్పుడు కోచ్ రవిశాస్త్రి అండగా నిలిచాడు. తనను ఎంతో ఎంకరేజ్ చేశాడని సిరాజ్ తెలిపాడు.

రవి సర్ మాటలు..

'మా నాన్న మరణించినప్పుడు రవి సర్ అండగా నిలిచాడు. నాతో ప్రత్యేకంగా మాట్లాడిన రవి సర్..'మియాన్.. ఈ పర్యటనలో నువ్వు ఐదు వికెట్లు ఘనత సాధించాలని మీ నాన్న కోరుకున్నాడు.'అని చెప్పాడు. ఆ మాటలకు నేను ఎంతో భావోద్వేగానికి గురయ్యాను. ఇక కఠిన క్వారంటైన్‌లో ఉండటంతో ఏం జరుగుతుందో అర్థం కాలేదు. అయితే క్వారంటైన్ నేపథ్యంలో భారత్‌కు వెళ్లడం కంటే ఇక్కడే ఉండి నా తండ్రి కలను నేరవేర్చాలనుకున్నాను. అదే నేను అతనికిచ్చే నివాళులని భావించాను. ఆ సిరీస్‌లో నేను మా నాన్న కలను నేరవేర్చడంతో మరింత స్ట్రాంగ్ అయ్యాను. 'అని సిరాజ్ గుర్తు చేసుకున్నాడు.