అక్కడే మారిపోయా.. మా నాన్న మరణం తర్వాత రవి సర్ మద్దతు మరవలేనిది: సిరాజ్

రవి సర్ ఎంకరేజ్ చేశాడు..

'ఆస్ట్రేలియా పర్యటన సందర్భంగా మా నాన్నను కోల్పోయిన నాకు రవిసర్, బౌలింగ్ కోచ్ భరత్ అరుణ్ సర్ అండగా నిలిచారు. రవి సర్ నా దగ్గరకు వచ్చి 'మీ నాన్న ఆశీస్సులు నీకుంటాయి. నీవు టెస్ట్ మ్యాచ్ ఆడటమే కాకుండా ఐదు వికెట్లు తీస్తావ్'అని చెప్పాడు. బ్రిస్బెన్ మ్యాచ్‌లో ఐదు వికెట్లు తీసిన తర్వాత రవి సర్ నాతో ఇదే అన్నాడు. 'ఐదు వికెట్లు తీస్తావని ముందే చెప్పానుగా'అని గుర్తు చేశాడు. ఇలా ఇద్దరు కోచ్‌లు ప్రోత్సహించడంతో నా ఆత్మవిశ్వాసం అమాంతం పెరిగిపోయింది.'అని సిరాజ్ చెప్పుకొచ్చాడు.

కోహ్లీ భయ్యాకు రుణపడి ఉంటా..

ఇక విరాట్ కోహ్లీ భయ్యా ఇచ్చిన మద్దతు గురించి ఎంత చెప్పినా తక్కువేనని, అతనికి తాను జీవితాంతం రుణపడి ఉంటానన్నాడు. 'విరాట్ భాయ్ ఎప్పుడూ అండగా నిలిచాడు. ఐపీఎల్‌లో గత రెండు సీజన్లు రాణించకున్నా.. నాకు మరో అవకాశం ఇస్తూ ఆర్‌సీబీ తరఫున రిటైన్ చేసుకున్నాడు. నా సామర్థ్యం, బౌలింగ్‌పై పూర్తి విశ్వాసం వ్యక్తం చేస్తూ నన్ను ప్రోత్సహించాడు. నా సక్సెస్ ప్రతీ అడుగులో అతని పాత్ర ఉంది. నీకు సామర్థ్యం ఉంది.. ఏ వికెట్‌పై అయినా ఆడగల సత్తా ఉంది. ఎలాంటి బ్యాట్స్‌మెన్ అయినా పెవిలియన్‌ పంపించగలవని విరాట్‌ భయ్యా ఎప్పుడూ నన్ను వెన్నుతట్టి ప్రోత్సహిస్తుంటాడు.'అని సిరాజ్ చెప్పుకొచ్చాడు.

అదే నా బెస్ట్ మూమెంట్..

'ఆస్ట్రేలియా పర్యటన నా కెరీర్‌లోనే అత్యుత్తమ సందర్భం. అది నన్నెంతో మార్చింది. బౌలింగ్ పట్ల పూర్తిగా నా వైఖరిని మార్చేసింది. ప్రస్తుత భారత జట్టులో భాగమవ్వడం గొప్ప అనుభూతి. స్వదేశమైనా విదేశమైనా.. ఎక్కడైన టీమ్ మిండియా ఎవరినైనా ఓడించగలదు. ఇలాంటి పటిష్టమైన జట్టులో చోటుకోసం పోటీ ఉండటం వ్యక్తిగతంగా నేను ఆస్వాదిస్తున్నా. సీనియర్లంతా చాలా మంచివారు. విలువైన సలహాలు ఇస్తుంటారు. పేస్ బౌలింగ్ కళ నేర్చుకొనేందుకు ఇవి ఉపయోగపడుతున్నాయి. టెస్ట్ చాంపియన్‌షిప్ ఫైనల్స్‌లో చోటు దొరుకుతుందో లేదో నిజంగా నాకు తెలియదు. మెరుగ్గా బౌలింగ్ చేసేందుకు అవకాశం దొరికితే ఆడేందుకు సిద్దంగా ఉన్నాను'అని సిరాజ్ తెలిపాడు.

ఇంగ్లండ్‌కు పయనం..

న్యూజిలాండ్‌తో వరల్డ్‌ టెస్టు చాంపియన్‌షిప్‌ (డబ్ల్యూటీసీ) ఫైనల్, ఆపై ఇంగ్లండ్‌తో ఐదు టెస్టు మ్యాచ్‌ల సిరీస్‌... సుమారు మూడున్నర నెలల పాటు సాగే ఈ పర్యటన కోసం భారత క్రికెట్‌ జట్టు బుధవారం అర్థరాత్రి ప్రత్యేక విమానంలో బయలుదేరింది. జూన్ 18 నుంచి 23 వరకు సౌతాంప్టన్ వేదికగా ఈ మెగా ఫైనల్ జరగనుండగా.. ఆగస్టు 4 నుంచి సెప్టెంబర్ 14వరకు ఇంగ్లండ్‌తో ఐదు టెస్ట్ మ్యాచ్‌ల సిరీస్ జరగనుంది. ఇక ఇంగ్లండ్ పిచ్‌లు సిరాజ్ కలిసిరానున్నాయి. ఈ క్రమంలో అతనికి తుది జట్టులో చోటు దక్కే అవకాశాలు ఎక్కువగా ఉన్నాయి. పైగా ఐపీఎల్‌లో అతను మెరుగ్గా బౌలింగ్ చేశాడు.