MI vs RCB: ఇదెక్కడి షాట్ రా.. మ్యాక్సీ మామ! (వీడియో)

ముంబై: ఐపీఎల్ 2023 సీజన్‌లో భాగంగా ముంబై ఇండియన్స్‌తో జరుగుతున్న మ్యాచ్‌లో రాయల్ చాలెంజర్స్ బెంగళూరు(ఆర్‌సీబీ) బిగ్ హిట్టర్ గ్లేన్ మ్యాక్స్‌వెల్(33 బంతుల్లో 8 ఫోర్లు, 4 సిక్స్‌లతో 68) విధ్వంసకర హాఫ్ సెంచరీతో చెలరేగాడు. 16 పరుగులకే 2 వికెట్లు కోల్పోయి పీకల్లోతు కష్టాల్లో ఉన్న జట్టును మ్యాక్సీ.. కెప్టెన్ ఫాఫ్ డుప్లెసిస్‌తో కలిసి ఆదుకున్నాడు.

మూడో వికెట్‌కు 120 పరుగుల భాగస్వామ్యాన్ని అందించాడు. తనకే సాధ్యమైన 360 డిగ్రీల ఆటతో అభిమానులను ఆకట్టునుకున్నాడు. 8 ఫోర్లు, 4 సిక్స్‌లతో ముంబై బౌలర్లకు చుక్కలు చూపించాడు. తన ట్రేడ్ మార్క్ రివర్స్ స్వీప్, స్వీప్ షాట్లతో సిక్స్‌లు బాది అభిమానులను అలరించాడు.

ముఖ్యంగా క్రిస్ జోర్డాన్ వేసిన ఇన్నింగ్స్ 11వ ఓవర్‌‌లో ఐదో బంతిని మ్యాక్సీ సిక్స్‌గా మలిచిన తీరు ఈ సీజన్‌కే హైలైట్‌గా చెప్పవచ్చు. గతంలో ఎప్పుడూ చూడని వైవిధ్యమైన షాట్‌తో అలరించాడు. జోర్డాన్ వేసిన ఔట్‌సైడ్ ఆఫ్ ఫుల్ లెంగ్త్ బాల్‌ను మ్యాక్స్‌వెల్ రివర్స్ స్కూప్ షాట్‌తో థర్డ్ మ్యాన్ దిశగా ఆడి సిక్సర్‌గా మలిచాడు.

ఈ వినూత్నమైన షాట్‌కు మైదానంలో ఉన్న ఆటగాళ్లతో పాటు కామెంటేటర్లు, నెటిజన్లు ఫిదా అయ్యారు. ఇదెక్కడి షాట్ రా మ్యాక్సీ మామ అంటూ కామెంట్ చేస్తున్నారు. ఈ సీజన్‌కే ఈ షాట్ హైలైట్ అని, గతంలో ఎప్పుడూ ఇలాంటి షాట్ చూడలేదని మ్యాక్సీని కొడియాడుతున్నారు. ప్రస్తుతం ఈ షాట్‌కు సంబంధించిన వీడియో, ఫొటోలు నెట్టింట వైరల్‌గా మారాయి.

ఈ మ్యాచ్‌లో మ్యాక్సీకి తోడుగా కెప్టెన్ ఫాఫ్ డుప్లెసిస్(41 బంతుల్లో 5 ఫోర్లు, 3 సిక్స్‌లతో 65) విధ్వంసకర హాఫ్ సెంచరీతో చెలరేగాడు. దాంతో ముందుగా బ్యాటింగ్ చేసిన ఆర్‌సీబీ నిర్ణీత 20 ఓవర్లలో 6 వికెట్లకు 199 పరుగులు చేసింది.

చివర్లో దినేశ్ కార్తీక్(18 బంతుల్లో 4 ఫోర్లు, సిక్స్‌తో 30) మెరుపులు మెరిపించాడు. ముంబై బౌలర్లలో జాసన్ బెహ్రెండార్ఫ్(3/36) మూడు వికెట్లు తీయగా.. కామెరూన్ గ్రీన్, క్రిస్ జోర్డాన్, కుమార్ కార్తీకేయ తలో వికెట్ తీసారు.