ఇదెక్కడి ఫీల్డింగ్ రా.. మార్నస్ మామ!(వీడియో)

ఆస్ట్రేలియా స్టార్ బ్యాటర్ మార్నస్ లబుషేన్ క్రికెట్ చరిత్రలోనే అత్యంత విచిత్రమైన ఫీల్డింగ్ సెట్ చేశాడు. ఆస్ట్రేలియా దేశవాళీ క్రికెట్ టోర్నీ షెఫీల్డ్ షీల్డ్ 2024-25లో క్వీన్స్‌ల్యాండ్ జట్టుకు సారథ్యం వహిస్తున్న లబుషేన్.. వెస్టర్న్ ఆస్ట్రేలియాతో జరుగుతున్న మ్యాచ్‌లో కనీవినీ ఎరుగని ఫీల్డ్ సెట్ చేశాడు.

ఈ మ్యాచ్‌లో బౌలర్‌గా అవతారమెత్తిన లబుషేన్.. తాను బౌలింగ్ చేసే సమయంలో ప్రధాన అంపైర్ వెనుకాలే ఫీల్డర్‌నిపెట్టి అందర్నీ ఆశ్చర్యపరిచాడు. ఇందుకు సంబంధించిన వీడియో నెట్టింట వైరల్‌గా మారగా.. నెటిజన్లు ఫన్నీ కామెంట్స్ చేస్తున్నారు. 'ఇదెక్కడి ఫీల్డింగ్ రా.. మార్నస్ మామ'అంటూ అడుగుతున్నారు.

ఈ మ్యాచ్ తొలి రోజు ఆట 66వ ఓవర్‌లో ఈ ఘటన చోటు చేసుకుంది. ఈ ఓవర్ వేసే ముందు తన సహచర ఆటగాడిని పిలిచిన లబుషేన్.. అంపైర్ వెనుకాలే నిల్చోమని చెప్పాడు. ఇది చూసిన ఓ కామెంటేటర్.. 'ఇలాంటి ఫీల్డింగ్ ఎప్పుడూ చూడలేదు'అని పేర్కొన్నాడు. సరిగ్గా అంపైర్ వెనుకాలే నిల్చున్నాడని గుర్తించిన లబుషేన్.. అతన్ని ప్యాంట్‌తో లాగి మరి సరిచేయడం గమనార్హం.

ఈ మ్యాచ్‌లో ముందుగా బ్యాటింగ్ చేసిన వెస్టర్న్ ఆస్ట్రేలియా తొలి ఇన్నింగ్స్‌లో 465 పరుగులు చేసింది.కెప్టెన్ సామ్ వైట్‌మన్(102), జోష్ ఇంగ్లీస్(122) సెంచరీలతో రాణించగా.. కూపర్ కొన్నోల్లీ(79), కామెరూన్ గన్నన్(53) హాఫ్ సెంచరీలతో సత్తా చాటారు. క్వీన్స్ లాండ్ బౌలర్లలో మిచెల్ నెసర్(5/68) ఐదు వికెట్లు తీయగా.. లబుషేన్(2/5), మ్యాట్ రేన్‌షా(2/43) రెండేసి వికెట్లు పడగొట్టారు.

అనంతరం తొలి ఇన్నింగ్స్‌ ప్రారంభించిన క్వీన్ లాండ్ 46 ఓవర్లు ముగిసే సరికి 3 వికెట్లకు 161 పరుగులు చేసింది. మార్నస్ లబుషేన్(96 బంతుల్లో 12 ఫోర్లు, సిక్స్‌తో 77) శతకం చేజార్చుకున్నాడు.