సచిన్ కొడుకని అర్జున్ టెండూల్కర్‌ను తీసుకోలేదు: ముంబై ఇండియన్స్ హెడ్ కోచ్

అర్జున్‌కు ఉన్న అర్హత..?

అయితే కేవలం సచిన్ కొడుకనే ముంబై అర్జున్‌ను జట్టులోకి తీసుకుందని, క్రికెట్‌లో నెపోటిజం ఎక్కువైపోయిందని చాలా మంది విమర్శించారు. అర్జున్‌ను ముంబై తీసుకుంటుందని ముందే ఊహించామని, అసలు అతనికి ఏం అర్హత ఉందని వేలంలో కొనుగోలు చేశారని చాలా మంది నెటిజన్లు ట్రోల్ చేశారు. సయ్యద్ ముస్తాక్ అలీ ట్రోఫీలో దారుణంగా విఫలమయ్యాడని, అతని కంటే బాగా రాణించిన పేసర్లు ఎందరో ఉన్నా వారికి అవకాశం దక్కలేదని కామెంట్ చేశారు. రైతు ఆందోళనల విషయంలో అంతర్జాతీయ సెలబ్రిటీలు చేసిన ట్వీట్లపై సచిన్‌ స్పందించిన తీరు, అర్జున్‌ ఐపీఎల్‌ అరంగేట్రాన్ని ముడిపెడుతూ కొంత మంది నెటిజన్లు ట్రోల్‌ చేశారు.

టాలెంటెడ్ బౌలర్ కావడంతోనే..

ఈ నేపథ్యంలో ముంబై టీమ్‌మేనేజ్‌మెంట్ అర్జున్ ఎంపికను సమర్థించుకుంది. ఈ విమర్శలకు హెడ్ కోచ్ జయవర్ధనే క్లారిటీ ఇచ్చే ప్రయత్నం చేశాడు.. ''అర్జున్‌ టెండూల్కర్‌పై సచిన్‌ కుమారుడు అనే అతిపెద్ద ట్యాగ్‌ ఉండటం సహజం. అయితే అదృష్టవశాత్తూ అతడు బ్యాట్స్‌మన్‌ కాకుండా, బౌలర్‌ అయ్యాడు. నిజానికి అర్జున్‌ బౌలింగ్‌ తీరు పట్ల సచిన్‌ ఎంతో గర్వపడతారు. అయితే మేం కేవలం బౌలింగ్‌ నైపుణ్యాల ఆధారంగానే అతడిని ఎంపిక చేసుకున్నాం. ఇంతవరకు ముంబై తరఫున ఆడిన అర్జున్‌, ఇప్పుడు ముంబై ఇండియన్స్‌కు ఆడబోతున్నాడు. ఆట పట్ల తనకున్న శ్రద్ధ అమోఘం. తనపై ఒత్తిడి పడకుండా చూసుకోవడమే మా బాధ్యత. మిగతాది అతనే చూసుకుంటాడు'' అని తెలిపాడు.

కోచ్‌లు చెప్పడంతోనే..

అర్జున్‌ను తీసుకోవడంపై ముంబై టీమ్‌ యజమాని ఆకాశ్‌ అంబానీ సైతం ఓ వీడియోలో స్పష్టతినిచ్చే ప్రయత్నం చేశాడు. 'అర్జున్‌ నైపుణ్యాల గురించి మా కోచింగ్ సిబ్బంది మహేల జయవర్ధనె, జహీర్ ‌ఖాన్‌ ముందే చెప్పారు. సచిన్‌ తనయుడు ఎడమ చేతి వాటం ఫాస్ట్‌బౌలర్‌, బ్యాట్స్‌మన్‌ అని వివరించారు. ప్రపంచ క్రికెట్‌లో ఇలా ఎక్కువ మంది లేరని చెప్పారు. ఇతర యువ ఆటగాళ్లలాగే అర్జున్‌ కూడా ఈ స్థాయికి చేరుకున్నాడు. జట్టులో ఆటగాళ్లకు తగిన స్వేచ్ఛ ఇచ్చి వారిలోని అత్యుత్తమ నైపుణ్యాలను బయటకు తెస్తాం. అయితే అదంతా ఆయా ఆటగాళ్లు కష్టపడటంపైనే ఆధారపడి ఉంటుంది. అందుకోసం తగిన ఏర్పాట్లు తాము చేస్తాం. భవిష్యత్‌లో అర్జున్‌ కూడా ఇతరుల్లాగే మెరుగైన క్రికెటర్‌గా తయారవుతాడు' అని ఆకాశ్‌ అంబానీ ఆశాభావం వ్యక్తం చేశారు.

టీమ్‌మేనేజ్‌మెంట్‌కు థ్యాంక్స్..

వేలంలో తనను కొనుగోలు చేసిన ముంబై ఇండియన్స్‌కు అర్జున్‌ టెండూల్కర్ ధన్యవాదాలు తెలిపాడు. 'చిన్నప్పటి నుంచి నాకు ముంబై ఇండియన్స్ జట్టంటే ఎంతో ఇష్టం. ఈ సందర్భంగా నాపై నమ్మకం ఉంచిన కోచ్‌లకు, జట్టు యాజమాన్యానికి, ఇతర సిబ్బందికి కృతజ్ఞతలు తెలుపుతున్నా. ఈ జట్టుతో కలిసి ఆడేందుకు ఎంతో ఆసక్తిగా ఎదురుచూస్తున్నా' అని అర్జున్‌ పేర్కొన్నాడు. ఇక ఆ జట్టు క్రికెట్‌ ఆపరేషన్స్‌ హెడ్‌ జహీర్‌ఖాన్‌ సైతం అర్జున్‌ నెట్స్‌లో కఠినంగా శ్రమిస్తాడని, అతనొక అంకిత భావం గల యువ ఆటగాడు అని కితాబిచ్చాడు.