ఇది ఊహించిందే.. ఈ విజయ ఉత్సాహంతో టెస్ట్ సిరీస్‌లో చెలరేగుతాం: కేఎల్ రాహుల్

ఇషాన్‌దార్ ఇన్నింగ్స్..

'మా జట్టు నుంచి ఈ ప్రదర్శన ఊహించినదే. విరాట్ కోహ్లీ, ఇషాన్ కిషన్ అసాధారణ బ్యాటింగ్‌తో విజయాన్నందించారు. మేం ఆరంభించిన తీరుతో ఈ స్కోర్ చేస్తామనుకోలేదు. కానీ ఇషాన్ అసాధారణ బ్యాటింగ్‌తో వచ్చిన అవకాశాన్ని రెండు చేతులతో అందిపుచ్చుకున్నాడు. అద్భుతంగా బ్యాటింగ్ చేశాడు. విరాట్ కూడా తన అనుభవాన్ని ఉపయోగించి ఆడాడు. ఇషాన్‌ను అద్భుతంగా గైడ్ చేశాడు. బ్యాటింగ్ విభాగం చెలరేగితే బౌలర్లు కూడా వికెట్లు తీయగలుగుతారు.

టెస్ట్ సిరీస్‌లోనూ..

అయితే వికెట్ బౌలింగ్‌కు సహకరించకున్నా.. మేం అవకాశాలు సృష్టించుకున్నాం. మా ప్రదర్శన పట్ల చాలా సంతోషంగా ఉన్నాం. ఓ జట్టుగా మేం నేర్చుకుంటున్నాం. మరింత మెరుగయ్యేందుకు ప్రయత్నిస్తున్నాం. దురదృష్టవశాత్తు తొలి రెండు మ్యాచ్‌ల్లో మాకు అనుగుణంగా ఫలితం సాధించలేకపోయాం. ఈ విజయ ఉత్సాహాన్ని టెస్ట్ సిరీస్‌లో కూడా కొనసాగించాలనుకుంటున్నాం'అని కేఎల్ రాహుల్ చెప్పుకొచ్చాడు.

409 పరుగుల భారీ స్కోర్..

ఈ మ్యాచ్‌లో ముందుగా బ్యాటింగ్ చేసిన టీమిండియా నిర్ణీత 50 ఓవర్లలో 8 వికెట్లకు 409 పరుగులు చేసింది. అనంతరం లక్ష్యచేధనకు దిగిన బంగ్లాదేశ్ 34 ఓవర్లలో 182 పరుగులకు కుప్పకూలి ఘోర పరాజయం చవిచూసింది. షకీబ్ అల్ హసన్(43) మినహా అంతా విఫలమయ్యారు. భారత బౌలర్లలో శార్దూల్ ఠాకూర్ మూడు వికెట్లు తీయగా.. అక్షర్ పటేల్, ఉమ్రాన్ మాలిక్ రెండేసి వికెట్లు పడగొట్టారు. మహమ్మద్ సిరాజ్, కుల్దీప్ యాదవ్, వాషింగ్టన్ సుందర్ తలో వికెట్ తీసారు. ఇషాన్ కిషన్ చేసిన 210 పరుగులను కూడా బంగ్లాదేశ్ బ్యాటర్లు చేయలేకపోయారు.