KL Rahul: నా ఆటలో మార్పుకు కారణమదే.. ఆ ఇద్దరి బౌలింగ్‌లో ఆడటం కష్టమే కానీ నాకు ఇష్టం!

పరిస్థితులకు తగ్గట్లు షాట్స్..

మూడో రోజు ఆట అనంతరం మీడియాతో మాట్లాడిన రాహుల్ తనలో వచ్చిన మార్పుకు గల కారణాన్ని వెల్లడించాడు.'బ్యాటింగ్ చేసేటప్పుడు నా మదిలో చాలా ఆలోచనలు ఉంటాయి. టెస్ట్​ క్రికెట్​లో ప్రతి బంతిని ఎదుర్కోనేందుకు నేను రెండు, మూడు రకాల షాట్లు ఉపయోగిస్తాను. పరిస్థితులకు తగ్గట్లు ఏ షాట్ ఆడాలనేది ఎంచుకుంటాను. గత పర్యటన వైఫల్యం తర్వాత నేను తెలుసుకున్నది ఇదే. మంచి బౌలర్లను ఎదుర్కొనేటప్పుడు, బంతి స్వింగ్ అయినప్పుడు భిన్నమైన షాట్లు ఆడగలగాలి. గత పర్యటన(2018)లో విఫలమైన్నప్పటి నుంచి షాట్ల ఎంపికపై బాగా దృష్టి పెట్టి ప్రాక్టీస్​ చేశాను.

బెంచ్‌పై కూర్చున్నా..

మైదానం బయట కూర్చునేటప్పుడు కూడా లోపల బాగా ఆడే బ్యాట్స్​మెన్​ ఆటను గమనిస్తూ మెలకువలు నేర్చుకుంటున్నాను. ఏ ఫార్మాటైనా షాట్లు ఎంపిక అనేది చాలా ముఖ్యం. ఈ రోజు నేను చాలా సంతోషంగా ఉన్నాను. నా జట్టుకు మంచి స్కోర్​ను అందించాను. టీమ్​ కోసం ఏదైనా చేసేందుకు సిద్ధం. టీమ్​ మేనేజ్​మెంట్​ ఏ స్థానంలో ఆడమన్నా అడేందుకు సిద్ధంగా ఉన్నాను. ఇంగ్లండ్​లో ఆడటం సవాల్​ లాంటిది. వారిది ప్రపంచస్థాయి​ బౌలింగ్​. ముఖ్యంగా అండర్సన్​, స్టువర్ట్ బ్రాడ్​ ఎన్నో నైపుణ్యాలున్న బౌలర్లు. ఇద్దరూ ఇప్పటికే 600 వికెట్ల మార్క్‌ను ధాటేసారు. వారి బౌలింగ్‌ ఎదుర్కోవడం సవాల్‌తో కూడుకున్న పనే.

నాకు భలే ఇష్టం..

భిన్నమైన వాతావరణం కలిగిన ఇంగ్లండ్‌లో ఆడేందుకు నేనెప్పుడు ఇష్టపడుతాను. ఇక ఈ టెస్ట్ వికెట్‌ బాగుంది. ఆడటానికి కష్టమవుతుందని చెప్పడం లేదు. కానీ ఇలాంటి పరిస్థితుల్లో అండర్సన్, బ్రాడ్ వంటి బౌలర్లను ఎదుర్కోవడాన్ని మరే బ్యాట్స్‌మన్‌కు నచ్చకపోయినా నేను మాత్రం ఇష్టపడుతా. జట్టులో ఏ పాత్ర పోషించేందుకైనా నేను సిద్దం. గత రెండేళ్లుగా నేను నేర్చుకుంది ఇదే. గతంలో నన్ను డబుల్ రోల్ పోషించమన్నారు. నేను సంతోషంగా ఆ బాధ్యతలు నిర్వర్తించాను. ఇప్పుడు ఓపెనర్‌గా నాకు దక్కిన మరో అవకాశం ఇది. దాన్ని సాధ్యమైనంత వరకు అందిపుచ్చుకుంటాను'అని రాహుల్ చెప్పుకొచ్చాడు.

రాణించిన జడేజా..

ఓవర్‌నైట్‌ స్కోరు 125/4తో మూడో రోజైన శుక్రవారం తొలి ఇన్నింగ్స్‌ కొనసాగించిన భారత్‌ 278 వద్ద ఆలౌటైంది. ఓవర్‌నైట్‌ బ్యాట్స్‌మన్‌ కేఎల్‌ రాహుల్‌ (84) మరో 27 రన్స్‌ జోడించగా... ఆల్‌రౌండర్‌ రవీంద్ర జడేజా (86 బంతుల్లో 8 ఫోర్లు, సిక్సర్‌తో 56) అర్ధ సెంచరీతో చెలరేగాడు. బుమ్రా 28, పంత్‌ 25 పరుగులు చేశారు. రాబిన్‌సన్‌ 5, అండర్సన్‌ 4 వికెట్లు తీశారు. అనంతరం రెండో ఇన్నింగ్స్‌ ప్రారంభించిన ఇంగ్లండ్‌ వర్షంతో ఆట నిలిపివేసే సమయానికి 25/0 స్కోరు చేసింది. వర్షం కారణంగా చివరి సెషన్‌ రద్దు చేశారు. అంతకుముందు తొలి ఇన్నింగ్స్‌లో ఇంగ్లండ్‌ 183 స్కోరు వద్ద ఆలౌటైంది.