Click it and Unblock the Notifications
రాహుల్ది కీలక పాత్ర..
రెండో టెస్ట్లో భారత్ గెలవడంతో అందరూ బౌలర్లపై ప్రశంసలు కురిపిస్తున్నారు. కానీ బ్యాటింగ్లో అంతకుమించిన పాత్ర పోషించిన కేఎల్ రాహుల్ కూడా ఈ ప్రశంసలకు అర్హుడే. ఎందుకంటే మూడేళ్ల కిందట టెస్ట్ల్లో అతను కీలక ప్లేయర్. కానీ ఈ సిరీస్కు ముందు ప్లేస్ కోసం కళ్లు కాయలు కాచేలా ఎదురు చూసిన ఆటగాడు. ఎందుకంటే శుభ్మన్ గిల్, మయాంక్ అగర్వాల్, పృథ్వీషా వంటి ఆటగాళ్ల నుంచి విపరీతమైన పోటీ ఉండటంతో ఓ దశలో ఆడే చాన్స్ దక్కుతుందని ఎవరూ ఊహించలేదు.
కానీ గిల్, మయాంక్ గాయాల బారిన పడటం, పృథ్వీ లేట్గా రావడంతో రాహుల్కు అవకాశం వచ్చింది. ఈ అవకాశాన్ని సద్వినియోగం చేసుకున్న ఈ కర్ణాటక బ్యాట్స్మన్ గతంతో పోలిస్తే బ్యాటింగ్లో చాలా రాటుదేలాడు. దాని ఫలితమే లార్ట్స్లో సెంచరీ.
సూపర్ టెక్నిక్..
ఒకప్పుడు రాహుల్ షాట్స్ కొట్టడానికి ఎక్కువగా ఇష్టపడేవాడు. దీనివల్ల త్వరగా ఔటయ్యేవాడు. దీంతో టెస్ట్లకు పనికిరాడనే ముద్ర కూడా పడింది. కానీ ఇప్పుడు అతని లక్ష్యం మారింది. తనదైన డిఫెన్స్తో పాటు, క్రమశిక్షణ కలిగిన బ్యాటింగ్తో ఆకట్టుకుంటున్నాడు. 'గతంలో నేను పరుగుల గురించే ఎక్కువగా ఆలోచించా.
దానివల్ల ఎక్కువ షాట్స్ కొట్టేవాడ్ని. ఆ క్రమంలో త్వరగా ఔట్ కావడంతో ఒత్తిడి పెరిగేది. కానీ ఇప్పుడు నా బ్యాటింగ్ను ఆస్వాదిస్తున్నా. బౌలర్లు మంచి మైండ్సెట్తో గుడ్ స్పెల్స్ వేస్తే నేను నా టెక్నిక్, డిఫెన్స్ను నమ్ముకుంటున్నా. ఇది మంచి ఫలితాన్నిచ్చింది. నా దృష్టంతా నాకు ఇచ్చిన బాధ్యతపైనే. వ్యక్తిగత గోల్స్ను పక్కన బెట్టేశా. దీనివల్ల ఆటపై ఏకాగ్రత పెరిగింది.'అని రాహుల్ చెప్పుకొచ్చాడు.
తెలివిగా బ్యాటింగ్ చేస్తూ..
అండర్సన్ బౌలింగ్లో ఎక్కువ బాల్స్ను వదిలేస్తున్న రాహుల్.. బాడీకి క్లోజ్గా వచ్చే బంతులను డెడ్ డిఫెన్స్తో అడ్డుకున్నాడు. స్ట్రయిక్ రేట్ పట్టించుకోకుండా బంతిని ఎదుర్కొనేందుకు అవసరమైన స్ట్రయిక్ పాయింట్స్పైనే ఎక్కువ ఫోకస్ పెడుతున్నాడు. వైట్బాల్ ఫార్మాట్లో రాహుల్ 360 డిగ్రీ ప్లేయర్. ఓపెనర్గా మిడిల్, డెత్ ఓవర్లలోనూ బ్యాటింగ్ చేసే సత్తా ఉంది.
అయితే లార్డ్స్ వచ్చేసరికి అతను పూర్తి భిన్నంగా ఆడాడు. ఈ స్కిల్స్ను అలాగే కొనసాగిస్తే .. రెగ్యులర్ ఓపెనర్లు వచ్చినా అతని ప్లేస్కు డోకా ఉండకపోవచ్చు. ఇక రాహుల్ జోరుతో తాజా సిరీస్లో మయాంక్ అగర్వాల్, పృథ్వీ షా బెంచ్కే పరిమితం కానున్నారు.
10వ బ్యాట్స్మన్గా..
వాస్తవానికి ఈ సిరీస్లో కేఎల్ రాహుల్ ఫస్ట్ చాయిస్ ఓపెనరే కాదు.. అనూహ్యంగా దక్కిన అవకాశాన్ని ఈ కర్ణాటక బ్యాట్స్మన్ రెండు చేతులా అందిపుచ్చుకున్నాడు. 250 బంతుల్లో 12 ఫోర్లు, ఓ సిక్స్తో 129 రన్స్ చేసిన రాహుల్.. రోహిత్ శర్మతో కలిసి తొలి వికెట్కు 126 పరుగులు... కోహ్లీతో కలిసి 117 పరుగుల కీలక భాగస్వామ్యాలను నెలకొల్పాడు.
పరిస్థితులపై ఓ అంచనాకు వచ్చాక బ్యాటు ఝులిపించిన ఈ కన్నడ డైనమైట్.. తన కెరీర్లో ఆరో సెంచరీని ఖాతాలో వేసుకున్నాడు. ఈ క్రమంలో లార్డ్స్ మైదానంలో సెంచరీ చేయడం ద్వారా వినూ మన్కడ్, గుండప్ప విశ్వనాథ్, దిలీప్ వెంగ్సర్కార్, రవిశాస్త్రి, మహమ్మద్ అజారుద్దీన్, సౌరవ్ గంగూలీ, అగర్కార్, రాహుల్ ద్రవిడ్, రహానే తర్వాత పదో భారత క్రికెటర్గా రాహుల్.. ఆనర్స్ బోర్డులో పేరు దక్కించుకున్నాడు. భారత క్రికెట్ దిగ్గజాలు సచిన్, కోహ్లీకే ఈ ఘనత సాధ్యంకాలేదు.
19 స్థానాలు ఎగబాకి..
ఈ అసాధారణ ఇన్నింగ్స్తో రాహుల్ టెస్ట్ల్లో తన ర్యాంకును మెరుగుపరుచుకున్నాడు. ఐసీసీ సోమవారం విడుదల చేసిన ర్యాంకింగ్స్లో ఏకంగా 19 స్థానాలు ఎగబాకి 37వ ప్లేస్లో నిలిచాడు. గత వారం రాహుల్ 56వ ప్లేస్లో ఉన్నాడు. ఈ మ్యాచ్లో సెంచరీ చేయడం అతనికి కలిసొచ్చింది. రాహుల్ సూపర్ ఇన్నింగ్స్కు బౌలర్ల అసాధారణ ప్రదర్శన కూడా తోడవ్వడంతో లార్డ్స్ టెస్ట్లో భారత్ 151 పరుగుల తేడాతో ఇంగ్లండ్ను చిత్తు చేసింది. ఈ మ్యాచ్లో టాస్ ఓడి తొలుత బ్యాటింగ్ చేసిన భారత్ 364 పరుగులు చేయగా.. ఇంగ్లండ్ 391 రన్స్ చేసి 27 పరుగుల ఆధిక్యాన్ని అందుకుంది.
సెకండ్ ఇన్నింగ్స్లో 194 పరుగులకే 7 వికెట్లు కోల్పోయి కష్టాల్లో పడ్డ భారత జట్టును మహమ్మద్ షమీ, జస్ప్రీత్ బుమ్రా 9వ వికెట్కు అజేయంగా 89 పరుగులు జోడించి గట్టెక్కించారు. దాంతో కోహ్లీసేన 298/8 వద్ద డిక్లేర్ చేసింది. ఆ తర్వాత 272 పరుగుల లక్ష్యంతో బరిలోకి దిగిన ఇంగ్లండ్ భారత బౌలర్ల ధాటికి 120 పరుగులకే కుప్పకూలి చిత్తయింది. మూడో టెస్ట్ ఆగస్టు 25 నుంచి లీడ్స్ వేదికగా ప్రారంభం కానుంది.
Continue with Google