KKR vs GT: శంకరన్న విధ్వంసం.. 5 సిక్సర్లతో వీరవిహారం!

కోల్‌కతా: ఐపీఎల్ 2023 సీజన్‌లో గుజరాత్ టైటాన్స్ జోరు కొనసాగుతోంది. కోల్‌కతా నైట్‌రైడర్స్‌తో శనివారం జరిగిన మ్యాచ్‌లో సమష్టిగా చెలరేగిన గుజరాత్ టైటాన్స్ 7 వికెట్ల తేడాతో గెలుపొందింది. విజయ్ శంకర్(24 బంతుల్లో 2 ఫోర్లు, 5 సిక్సర్లతో 51 నాటౌట్) విధ్వంసకర బ్యాటింగ్‌తో చెలరేగగా.. డేవిడ్ మిల్లర్(18 బంతుల్లో 2 ఫోర్లు, 2 సిక్సర్లతో 34) మెరుపు మెరిపించాడు.

ఈ మ్యాచ్‌లో ముందుగా బ్యాటింగ్ చేసిన కేకేఆర్ నిర్ణీత 20 ఓవర్లలో 7 వికెట్లకు 179 పరుగులు చేసింది. ఓపెనర్ రెహ్మానుల్లా గుర్బాజ్(39 బంతుల్లో 5 ఫోర్లు, 7 సిక్స్‌లతో 81) హాఫ్ సెంచరీతో రాణించగా.. ఆండ్రీ రస్సెల్ (19 బంతుల్లో 2 ఫోర్లు, 3 సిక్సర్లతో 34) మెరుపులు మెరిపించాడు. గుజరాత్ టైటాన్స్ బౌలర్లలో మహమ్మద్ షమీ మూడు వికెట్లు తీయగా.. జోష్ లిటిల్, నూర్ అహ్మద్ రెండేసి వికెట్లు పడగొట్టారు.

అనంతరం గుజరాత్ టైటాన్స్ 17.5 ఓవర్లలోనే 3 వికెట్లు కోల్పోయి 180 పరుగులు చేసి సునాయస విజయాన్నందుకుంది. విజయ్ శంకర్, మిల్లర్‌కు తోడుగా శుభ్‌మన్ గిల్(35 బంతుల్లో 8 ఫోర్లతో 49) రాణించాడు. కేకేఆర్ బౌలర్లలో హర్షిత్ రాణా, ఆండ్రీ రస్సెల్, సునీల్ నరైన్ తలో వికెట్ తీసారు.

గుజరాత్ విజయానికి చివరి 37 బంతుల్లో 73 పరుగులు అవసరమవ్వగా.. శంకర్, మిల్లర్ ధాటికి 24 బంతుల్లోనే మ్యాచ్ ముగిసింది. 14వ ఓవర్‌లో 9 పరుగులు పిండుకున్న ఈ జోడీ.. 15వ ఓవర్‌లో 18, 16వ ఓవర్‌లో 13, 17వ ఓవర్‌లో 24, 18వ ఓవర్‌లో 14 పరుగులు చేసి విజయ లాంఛనాన్ని పూర్తి చేసింది. ఈ ఇద్దరూ 4వ వికెట్‌కు అజేయంగా 87 పరుగులు జోడించారు.

అంతకుముందు ఓపెనర్ వృద్ది మాన్ సాహా(10) విఫలమైనా.. శుభ్‌మన్ గిల్, హార్దిక్ పాండ్యా(20 బంతుల్లో 2 ఫోర్లు, సిక్స్‌తో 26) జట్టును ఆదుకున్నారు. ఈ ఇద్దరూ రెండో వికెట్‌కు 50 పరుగులు జోడించారు. ఈ విజయంతో గుజరాత్ టైటాన్స్ పాయింట్స్ టేబుల్‌లో అగ్రస్థానాన్ని కైవసం చేసుకుంది. ఈ సీజన్‌లో ఇప్పటి వరకు అత్యధిక విజయాలు నమోదు చేసిన జట్టుగా నిలిచింది.

అంతేకాకుండా ప్రత్యర్థి ఇలాఖలో నాలుగు విజయాలు నమోదు చేసింది. కేకేఆర్‌ను కోల్‌కతాలో.. ఢిల్లీని ఢిల్లీలో.. పంజాబ్‌ను మొహాలీ, లక్నోను లక్నోలో ఓడించింది.