WTC 2025 విజయం.. చిన్ని పిల్లాడిలా ఏడ్చిన సౌతాఫ్రికా ఆటగాడు! (వీడియో)

సౌతాఫ్రికా కల నెరవేరింది. 27 ఏళ్ల నిరీక్షణకు తెరపడింది. అందని ద్రాక్షగా ఉన్న ఐసీసీ టైటిల్ ఎట్టకేలకు దక్కింది. వరల్డ్ టెస్ట్ ఛాంపియన్‌షిప్ 2023-25 ఫైనల్లో సౌతాఫ్రికా విజేతగా నిలిచింది. ప్రఖ్యాత లార్డ్స్ మైదానం వేదికగా శనివారం ముగిసిన ఫైనల్లో సమష్టిగా రాణించిన సౌతాఫ్రికా 5 వికెట్ల తేడాతో ఆస్ట్రేలియాను ఓడించింది. ఈ గెలుపుతో సౌతాఫ్రికా ఆటగాళ్ల ఆనందానికి హద్దే లేకుండా పోయింది. ఈ శతాబ్దంలో సౌతాఫ్రికాకు దక్కిన తొలి ఐసీసీ టైటిల్ ఇదే కావడంతో ఆ జట్టు ఆటగాళ్లు తీవ్ర భావోద్వేగానికి గురయ్యారు. ఉబికి వస్తున్న దు:ఖాన్ని ఆపుకోలేకపోయారు. ముఖ్యంగా సౌతాఫ్రికా స్పిన్నర్ కేశవ్ మహరాజ్ కన్నీటి పర్యంతమయ్యాడు. ఏడుస్తూనే అధికారిక బ్రాడ్‌కాస్టర్‌తో మాట్లాడాడు.

'ఈ విజయం చాలా ప్రత్యేకమైనది. ఇక్కడ ఉన్నవారికే కాదు.. దేశ ప్రజలందరికి ఈ టైటిల్ అందుకోవడం గర్వకారణం. గత ఐదు రోజులుగా దేశం మొత్తం చూపిన ఐకమత్యం అద్భుతం. ఒక జట్టుగా.. గర్వించదగ్గ దేశంగా ఈ విజయానికి మేం కృతజ్ఞులం. నేను బ్యాటింగ్ చేసి ఉంటే ఈ భావోద్వేగం అదుపులో ఉండేదేమో. మాకు అండగా నిలిచిన ప్రతీ ఒక్కరికి ధన్యవాదాలు. కష్ట సమయాల్లో కూడా మేం బలంగా పోరాడాం. రాబోయే గొప్ప విజయాలకు ఇది ఒక మైలు రాయి అవతుందని ఆశిస్తున్నా'అని కేశవ్ మహరాజ్ కన్నీటి పర్యంతమయ్యాడు.

213/2 ఓవర్‌ నైట్‌ స్కోర్‌తో నాలుగు రోజు ఆటను ప్రారంభించిన సౌతాఫ్రికా.. 85 ఓవర్లలో 5 వికెట్లకు 283 పరుగులు చేసి గెలుపొందింది. మార్క్‌రమ్(207 బంతుల్లో 14 ఫోర్లతో 136) శతకంతో సఫారీ విజయంలో కీలక పాత్ర పోషించగా.. టెంబా బవుమా(134 బంతుల్లో 5 ఫోర్లతో 66), డేవిడ్ బెడింగ్‌హమ్(49 బంతుల్లో ఫోర్‌తో 21 నాటౌట్) అతనికి అండగా నిలిచారు. ఆస్ట్రేలియా బౌలర్లలో మిచెల్ స్టార్క్ మూడు వికెట్లు తీయగా.. ప్యాట్ కమిన్స్, జోష్ హజెల్‌వుడ్ చెరో వికెట్ పడగొట్టారు.

సంక్షిప్త స్కోర్లు:

ఆసీస్ తొలి ఇన్నింగ్స్: 212 ఆలౌట్
సౌతాఫ్రికా తొలి ఇన్నింగ్స్: 138 ఆలౌట్
ఆసీస్ రెండో ఇన్నింగ్స్: 207 ఆలౌట్
సౌతాఫ్రికా రెండో ఇన్నింగ్స్: 83.4 ఓవర్లలో 282/5