పాకిస్థాన్‌ను తక్కువ చేయవద్దు.. అది మమ్మల్ని అవమానించడమే: ఇంగ్లండ్ కెప్టెన్ జో రూట్

తీవ్ర సంక్షోభాన్ని ఎదుర్కొంటున్న పాకిస్థాన్ జట్టుకు ఇంగ్లండ్ కెప్టెన్ జో రూట్ అండగా నిలిచాడు. రెండు పరాజయాల నేపథ్యంలో పాకిస్థాన్‌ను అగౌరవ పర్చవద్దని మాజీ క్రికెటర్లకు సూచించాడు. అలా చేస్తే తమను కూడా అవమానించినట్లేనని అభిప్రాయపడ్డాడు.

పాకిస్థాన్ తమకు గట్టి పోటీ ఇచ్చిందని, కానీ ఆ జట్టు కంటే తాము మెరుగైన ప్రదర్శన చేశామని చెప్పాడు. పిచ్ కండిషన్స్‌ను త్వరగా అర్థం చేసుకోవడంతోనే భారీ విజయాలు సొంతమయ్యామని తెలిపాడు.

వాడితోనే పాకిస్థాన్‌ జట్టు నాశనం.. నా జీతం కూడా ఇవ్వలేదు: మాజీ కోచ్ జేసన్ గెలెస్పీ

కోచ్‌లతో పాటు ఏడుగురిపై వేటు..

మూడు టెస్ట్‌ల సిరీస్ కోసం ఇంగ్లండ్ పర్యటనకు వెళ్లిన పాకిస్థాన్ జట్టు వరుసగా రెండు మ్యాచ్‌ల్లో ఓటమిపాలైంది. తొలి టెస్ట్‌లో ఇన్నింగ్స్ 103 పరుగుల తేడాతో చిత్తయిన పాకిస్థాన్.. రెండో టెస్ట్‌లో 194 పరుగుల తేడాతో ఘోర పరాజయాన్ని మూటగట్టుకుంది. ఈ నాలుగు ఇన్నింగ్స్‌ల్లో పాకిస్థాన్ కనీసం 200 పరుగులు కూడా చేయలేకపోయింది.

ఈ వరుస పరాజయాల నేపథ్యంలో పాకిస్థాన్ క్రికెట్ బోర్డు(పీసీబీ) కఠిన చర్యలు తీసుకుంది. హెడ్ కోచ్ సర్ఫరాజ్ అహ్మద్, బౌలింగ్ కోచ్ ఉమర్ గుల్‌తో పాటు ఏడుగురి ఆటగాళ్లను జట్టు నుంచి తొలగించింది. మహమ్మద్ రిజ్వాన్, ఇమామ్ ఉల్ హక్ వంటి సీనియర్ ఆటగాళ్లపై కూడా వేటు వేసింది. వారి స్థానాల్లో కొత్త ఆటగాళ్లకు అవకాశం కల్పించింది. ఈ క్రమంలో పాకిస్థాన్ జట్టుపై తీవ్ర విమర్శలు వచ్చాయి.

చెత్త టీమ్ కాదు..

ఇంగ్లండ్ మాజీ క్రికెటర్ స్టువర్ట్ బ్రాడ్ అయితే పాకిస్థాన్ జట్టు చెత్త టీమ్ అని, ఆ టీమ్ చేతిలో ఓడిపోవడం కన్నా సిగ్గు చేటు మరొకటి ఉండదని ఘాటు వ్యాఖ్యలు చేశాడు. పాకిస్థాన్, ఇంగ్లండ్ మధ్య ఆఖరి టెస్ట్ బర్మింగ్‌హామ్ వేదికగా నేటి(బుధవారం) సాయంత్ర ప్రారంభం కానుంది. ఈ మ్యాచ్ నేపథ్యంలో మీడియా సమావేశంలో పాల్గొన్న జోరూట్.. పాకిస్థాన్‌కు అండగా నిలిచాడు. పాకిస్థాన్ జట్టును చెత్త టీమ్‌గా అభివర్ణించవద్దని మాజీ క్రికెటర్లను కోరాడు.

'పాకిస్థాన్ మాకు గట్టి సవాల్ విసిరిందనడంలో ఎలాంటి సందేహం లేదు. వారు పోరాడలేదని చెప్పడం పాకిస్థాన్ జట్టుతో పాటు మమ్మల్ని అవమానించడమే. మేం చాలా బాగా ఆడటం, పిచ్ కండిషన్స్‌ను త్వరగా అర్థం చేసుకోవడంతోనే పాకిస్థాన్‌పై ఆధిపత్యం చెలాయించాం. ఒక జట్టు అత్యుత్తమమైనదని, మరొకటి అత్యంత అధ్వాన్నమైనదని చెప్పడం సరికాదు.

Also Read

సెంచరీది ఏం ఉందన్నా.. ఎలాగోలా మ్యాచ్ గెలిచాం: జోరూట్

పాక్‌లో ప్రతిభ కలిగిన ఆటగాళ్లు..

ఒక జట్టు చాలా బాగా ఆడినంత మాత్రానా మరో జట్టు సరిగ్గా ఆడలేదని అర్థం కాదు. గత రెండు మ్యాచ్‌ల్లో ఏం జరిగిందనేది ముఖ్యం కాదు. ఈ వారం కొత్త సవాల్ ఎదురుకానుంది. పాకిస్థాన్ జట్టులో చాలా ప్రతిభావంతులైన ఆటగాళ్లు ఉన్నారు. వారిని ఎదుర్కోవడానికి మేం సిద్దంగా ఉన్నాం.'అని జోరూట్ చెప్పుకొచ్చాడు. భారత కాలమానం ప్రకారం సాయంత్రం 3.30 గంటలకు ఈ మ్యాచ్ మొదలవ్వనుంది.

మరోవైపు జట్టులోని మార్పులకు సంబంధించి కెప్టెన్‌గా తనకు ఎలాంటి సమాచారం లేదని పాకిస్థాన్ కెప్టెన్ బాబర్ ఆజామ్ అన్నాడు. ఆఖరి టెస్ట్‌లో మెరుగైన ప్రదర్శన చేసి విజయం సాధించేందుకు తమ సాయశక్తులా ప్రయత్నిస్తామని చెప్పుకొచ్చాడు.