వైరల్ వీడియో: జస్ప్రీత్‌ బుమ్రా ఒకేఒక్కడు.. ఆరుగురిలా బౌలింగ్‌!!

ఆరుగురిలా బౌలింగ్‌

ముంబై ఇండియన్స్‌ పేసర్‌ జస్ప్రీత్‌ బుమ్రా ప్రాక్టీస్‌ సెషన్‌లో ఓ ప్రత్యేకమైన నైపుణ్యాన్ని ప్రదర్శించాడు. మాజీ, ప్రస్తుత అంతర్జాతీయ బౌలర్లలో ఆరుగురి బౌలింగ్‌ యాక్షన్‌ను చేసి చూపించాడు. ఈ వీడియోను ముంబై ప్రాంచైజీ ట్విట్టర్ వేదికగా పంచుకొని ఎవరెవరి బౌలింగ్‌ను అతడు అనుకరించాడో గుర్తుపట్టమని అభిమానులను అడిగింది. దీనికి స్పందించిన ముంబై అభిమానులు అనేక మంది అంతర్జాతీయ బౌలర్ల పేర్లను కామెంట్లలో పేర్కొంటున్నారు.

కుంబ్లే బౌలింగ్‌ను దించేశాడుగా

మునాఫ్ పటేల్, గ్లెన్ మెక్‌గ్రాత్, మిచెల్ స్టార్క్, కేదార్ జాదవ్, శ్రేయాస్ గోపాల్ మరియు అనిల్ కుంబ్లేలా జస్ప్రీత్‌ బుమ్రా ప్రాక్టీస్‌ సెషన్‌లో బౌలింగ్ చేశాడు. అందరిలోకెల్ల అనిల్ కుంబ్లే బౌలింగ్‌ను బుమ్రా అచ్చం దించేశాడు. కుంబ్లే లానే బౌలింగ్‌ చేసి అందరిని ఆశ్చర్యపరిచాడు. ప్రస్తుతం ఈ వీడియో సోషల్ మీడియాలో ఆకట్టుకుంటోంది. తమకు తెలిసిన బౌలర్ల పేర్లను ఫాన్స్ పోస్ట్ చేస్తున్నారు. అయితే కొందరు సరైన సమాధానాలే చెప్పినా.. మరికొందరు మాత్రం తప్పుగా చెపుతున్నారు.

డిఫెండింగ్‌ ఛాంపియన్స్‌ హోదాలో

గతేడాది ముంబై ఇండియన్స్‌ జట్టు నాలుగోసారి విజేతగా నిలిచిన సంగతి తెలిసిందే. దీంతో ఈసారి డిఫెండింగ్‌ ఛాంపియన్స్‌ హోదాలో బరిలోకి దిగనుంది. మరోవైపు ఆటగాళ్ల ఆరోగ్య భద్రత విషయమై ఆ ఫ్రాంఛైజీ గట్టి చర్యలు తీసుకుంటోంది. ప్రతీ ఒక్కరికీ ప్రత్యేకమైన ఉంగరాలు అందించింది. అందరూ కచ్చితంగా వాటిని ధరించాల్సి ఉంటుంది. దాంతో ఎవరైనా అనారోగ్యం బారిన పడినా, కరోనా లక్షణాలు లేకుండా వైరస్‌ బారిన పడినా శరీరంలో చోటుచేసుకునే మార్పులను గమనించి వెంటనే అప్రమత్తం చేస్తుంది. దాంతో వారి ఆరోగ్యంపై శ్రద్ధ తీసుకునే వీలు కలుగుతుంది.

'అభిమానులారా ఆందోళన అవసరం.. కష్టాల్లోనూ నెట్టుకొచ్చిన కెప్టెన్ మనకు ఉన్నాడు'