చివరి బంతి వరకు: ఐపీఎల్‌లో అద్భుతం, RR vs SRH మ్యాచ్ హైలెట్స్

రాజస్థాన్‌పై హైదరాబాద్ ఘన విజయం

ఇదిలా ఉంటే ఈ మ్యాచ్‌లో సన్‌రైజర్స్‌ హైదరాబాద్‌ 11 పరుగుల తేడాతో రాజస్థాన్ రాయల్స్‌పై విజయం సాధించింది. హైదరాబాద్‌ తక్కువ స్కోరు చేసినప్పటికీ, బౌలర్లు మరోసారి జట్టు విజయంలో కీలకపాత్ర పోషించారు. టాస్ గెలిచి తొలుత బ్యాటింగ్ చేసిన హైదరాబాద్‌ నిర్ణీత 20 ఓవర్లలో 7 వికెట్ల నష్టానికి 151 పరుగులు చేసింది. కెప్టెన్‌ కేన్‌ విలియమ్సన్‌ (43 బంతుల్లో 63; 7 ఫోర్లు, 2 సిక్స్‌లు), అలెక్స్‌ హేల్స్‌ (39 బంతుల్లో 45; 4 ఫోర్లు) రాణించారు.

సిక్సర్లతో వేగం పెంచిన కేవ్ విలియమ్సన్

ఆరంభంలోనే ధావన్‌ (6) స్వల్ప స్కోరుకే వెనుదిరిగిన తర్వాత, మూడో ఓవర్‌ నుంచి 14వ (13.3) ఓవర్‌ వరకూ పది ఓవర్ల పాటు సన్‌రైజర్స్‌ బ్యాటింగ్‌ జోరు కొనసాగింది. ఆ తర్వాత క్రీజులో కుదురుకున్న అలెక్స్ హేల్స్‌ బౌండరీలతో విరుచుకపడగా, మరోవైపు కెప్టెన్ కేన్‌ విలియమ్సన్‌ చూడచక్కని సిక్సర్లతో వేగం పెంచాడు. ఉనాద్కట్‌ వేసిన 12వ ఓవర్లో కేన్‌ రెచ్చిపోయాడు. 4, 6, 4, 2, 4, 1లతో ఏకంగా 21 పరుగులు రాబట్టాడు.

32 బంతుల్లో కేన్ విలియమ్సన్ హాఫ్ సెంచరీ

దీంతో 32 బంతుల్లో హాఫ్ సెంచరీని పూర్తి చేసుకున్నాడు. ఆ తర్వాత ఆర్చర్‌ బౌలింగ్‌లో లాంగాఫ్‌లో మరో సిక్సర్‌ బాదాడు. ఇలా సాఫీగా... భారీ స్కోరు దిశగా సాగిపోతున్న ఈ ఇన్నింగ్స్‌ ఈ ఇద్దరు పెవిలియన్‌ చేరడంతో కీలక భాగస్వామ్యానికి తెరపడింది. రెండో వికెట్‌కు 92 పరుగులు జోడించాక... 14వ ఓవర్లో కృష్ణప్ప గౌతమ్‌ బౌలింగ్‌లో మొదట హేల్స్, ఇష్‌ సోధి వేసిన మరుసటి ఓవర్లో విలియమ్సన్‌ ఔటయ్యారు.

డెత్‌ ఓవర్లలో 4 వికెట్లు కోల్పోయి 42 పరుగులు

ఆ తర్వాత క్రీజులోకి వచ్చిన షకీబ్‌ (6), యూసుఫ్‌ పఠాన్‌ (2), రషీద్‌ ఖాన్‌ (1) తక్కువ స్కోరుకే పెవిలియన్ కు చేరారు. దీంతో కీలకమైన డెత్‌ ఓవర్లలో 4 వికెట్లు కోల్పోయిన సన్‌రైజర్స్‌ కేవలం 42 పరుగులే చేయగలిగింది. గౌతమ్‌ 2, ఉనాద్కట్, ఇష్‌ సోధి చెరో వికెట్‌ తీశారు. రాజస్థాన్ బౌలర్‌ జోఫ్రా ఆర్చర్‌ (3/26) కట్టడి చేశాడు.

విలియమ్సన్‌కు మ్యాన్ ఆఫ్ ద మ్యాచ్ అవార్డు

అనంతరం లక్ష్యఛేదనకు దిగిన రాజస్థాన్‌ రాయల్స్‌ 20 ఓవర్లలో 6 వికెట్లు కోల్పోయి 140 పరుగులకే పరిమితమైంది. కెప్టెన్‌ రహానే (53 బంతుల్లో 65; 5 ఫోర్లు, 1 సిక్స్‌), సంజూ శామ్సన్‌ (30 బంతుల్లో 40; 3 ఫోర్లు, 1 సిక్స్‌) దూకుడుగా ఆడినప్పటికీ జట్టును గెలిపించడంలో విఫలమయ్యారు. సన్ రైజర్స్ హైదరాబాద్ బౌలర్లలో సిద్ధార్థ్‌ కౌల్‌ 2 వికెట్లు తీశాడు. హైదరాబాద్ కెప్టెన్ కేన్ విలియమ్సన్‌కు మ్యాన్ ఆఫ్ ద మ్యాచ్ అవార్డు లభించింది.