IPL 2026 Final: అహ్మదాబాద్‌లో అతనికి అదిరిపోయే రికార్డ్.. దబిడి దిబిడే!

ఐపీఎల్ 2026 సీజన్ ఫైనల్ ముంగిట రాయల్ ఛాలెంజర్స్ బెంగళూరు(ఆర్‌సీబీ)అభిమానులను ఓ అంశం తీవ్ర ఆందోళనకు గురిచేస్తోంది. ఫైనల్ జరిగే అహ్మదాబాద్‌లో గుజరాత్ టైటాన్స్ కెప్టెన్ శుభ్‌మన్ గిల్‌కు అదిరిపోయే రికార్డ్ ఉంది. ఈ మైదానంలో అడుగుపెట్టిన ప్రతిసారీ గిల్ పరుగుల మోత మోగించాడు.

ఫైనల్లో ఆర్‌సీబీ హాట్ ఫేవరేట్‌గా బరిలోకి దిగుతున్నప్పటికీ.. శుభ్‌మన్ గిల్ రూపంలో వారికి పెద్ద సవాల్ ఎదురు కానుంది. అహ్మదాబాద్‌లో శుభ్‌మన్ గిల్ రికార్డ్స్ చూస్తేనే ఈ విషయం స్పష్టమవుతోంది.

నరేంద్ర మోడీ స్టేడియంలో ఇప్పటి వరకు శుభ్‌మన్ గిల్ 1,500 పరుగులకు పైగా సాధించి సత్తా చాటాడు. టీ20, వన్డే, ఐపీఎల్ సహా అన్ని ఫార్మాట్లలోనూ ఈ మైదానంలో అతని బ్యాటింగ్ తిరుగులేనిది. ముఖ్యంగా, అతను 165.56 స్ట్రైక్ రేట్‌తో పరుగులు చేశాడు. ఇందులో నాలుగు సెంచరీలతో పాటు 7 హాఫ్ సెంచరీలు ఉన్నాయి.

ప్రపంచంలోనే అతిపెద్దదైన ఈ క్రికెట్ స్టేడియంలో గిల్‌కు బౌండరీలపై మంచి స్పష్టత ఉంది. శుభ్‌మన్ గిల్ ఈ అద్భుతమైన ఫామ్ గుజరాత్ టైటాన్స్ జట్టుకు, భారత జట్టుకు అహ్మదాబాద్‌ మైదానంలో పెద్ద బలంగా నిలుస్తుంది. గుజరాత్ జట్టుకు గిల్, సాయి సుదర్శన్, బట్లర్ కీలక బ్యాటర్లు. ఆర్‌సీబీ తమ రెండో కప్ సాధించాలంటే.. వీరిని వీలైనంత త్వరగా ఔట్ చేయాలి.