IPL 2024: తొండాటకు చెక్.. కొత్త టెక్నాలజీకి బీసీసీఐ శ్రీకారం!

ఐపీఎల్ 2024 సీజన్‌లో అంపైర్ల తప్పిదాలను తగ్గించేందుకు భారత క్రికెట్ నియంత్రణ మండలి(బీసీసీఐ) కొత్త టెక్నాలజీని అందుబాటులోకి తెచ్చినట్లు తెలుస్తోంది. స్మార్ట్ రిప్లే సిస్టమ్‌ ద్వారా క్రికెట్ టెక్నాలజీలో అప్‌గ్రేడ్ తీసుకురానుంది. అప్‌కమింగ్ ఐపీఎల్ సీజన్‌లో ఈ టెక్నాలజీని ప్రవేశపెట్టనుంది.

ఈ స్మార్ట్ రిప్లే సిస్టమ్ ద్వారా అంపైర్ల తప్పిదాలకు చెక్ పెట్టవచ్చు. అత్యంత వేగంగా కచ్చితమైన నిర్ణయాలు తీసుకునేందుకు అంపైర్లకు ఈ టెక్నాలజీ ఉపయోగపడనుంది. అయితే ఈ విషయంపై బీసీసీఐ నుంచి అధికారిక ప్రకటన రావాల్సింది. ప్రముఖ క్రికెట్ వెబ్‌సైట్ ప్రకారం.. క్రికెట్ టెక్నాలజీలో ఇది ఓ విప్లవమని చెప్పవచ్చు. ముఖ్యంగా మైదానంలో అంపైర్లు కచ్చితమైన నిర్ణయాలు తీసుకునేందుకు ఉపయోగపడుతోంది.

స్మార్ట్ రిప్లే సిస్టమ్ అంటే..?
స్మార్ట్ రిప్లే సిస్టమ్ ప్రకారం.. టీవీ అంపైర్ నేరుగా హాక్ ఐ ఆపరేటర్స్ ద్వారా ఇన్‌పుట్స్ తీసుకుంటాడు. మైదానం చుట్టూ పెట్టే ఎనిమిది హైస్పీడ్ హాక్ ఐ కెమెరాల నుంచి బ్రాడ్ కాస్టర్ డైరెక్టర్‌తో సంబంధం లేకుండా రీప్లేలను టీవీ అంపైర్ పరిశీలించవచ్చు. తద్వారా టీవీ అంపైర్‌కు కావాల్సిన సాక్ష్యాలను అత్యంత వేగంగా సేకరించే వీలు ఉంటుంది.

ప్రస్తుతం కొనసాగుతున్న టెక్నాలజీ ప్రకారం టీవీ అంపైర్‌.. హాక్ ఐ ఆపరేటర్స్ మధ్య బ్రాడ్ కాస్ట్ డైరెక్టర్ ఉంటాడు. టీవీ అంపైర్‌కు కావాల్సిన యాంగిల్స్‌ను బ్రాడ్‌కాస్ట్ డైరెక్టర్‌ను కోరితే అతను హాక్‌ఐ ఆపరేటర్స్ సాయంతో అంపైర్‌కు అందిస్తాడు. అయితే స్మార్ట్ రిప్లే సిస్టమ్ ద్వారా బ్రాడ్‌కాస్టర్‌‌తో సంబంధం లేకుండానే హాక్ ఐ ఆపరేటర్స్ నుంచి కావాల్సిన యాంగిల్స్‌లో విజువల్స్‌ను టీవీ అంపైర్ తీసుకోవచ్చు.

ఈ పద్దతి ద్వారా చాలా వేగంగా స్ప్లిట్ స్క్రీన్ విజువల్స్ చూడవచ్చు. తద్వారా కచ్చితమైన నిర్ణయం తీసుకునే అవకాశం టీవీ అంపైర్‌కు లభిస్తోంది. స్టంపౌట్స్, రనౌట్స్, క్యాచెస్, ఎల్బీల విషయంలో ఈ టెక్నాలజీ అంపైర్లకు ఉపయోగకరంగా ఉండనుంది.