IPL 2023 ఆడకున్నా.. రిషభ్ పంత్‌ను పక్కనే కూర్చోబెట్టుకుంటా: రికీ పాంటింగ్

పంత్ రిప్లేస్‌మెంట్ కోసం చూస్తున్నాం..

'రిషబ్ పంత్ చాలా మొండివాడు. అతనిలో నాకు బాగా నచ్చేది కూడా ఇదే. కొన్ని రోజుల క్రితం ఈ విషయాన్ని అతనికి ఫోన్‌లో చెప్పాను. అతను మాత్రం ఈ టైమ్‌లో కూడా జోకులు వేస్తూ నవ్విస్తున్నాడు. రిషభ్ పంత్ కారు ప్రమాదం గురించి తెలియగానే చాలా భయమేసింది. యాక్సిడెంట్‌కి గురైన కారు స్థితిని చూడగానే ఒళ్లంతా చెమటలు పట్టాయి. రిషభ్ పంత్ చాలా మంచి కుర్రాడు. అతని గురించి తెలిసిన ఎవ్వరైనా, రిషభ్ పంత్‌‌ను ప్రేమిస్తారు, ఇష్టపడతారు..

రిషభ్ పంత్‌లో ఓ అందమైన ప్రపంచం ఉంది. దాన్ని కాపాడాల్సిన బాధ్యత మనందరిపైనా ఉంది. రిషభ్ పంత్ వీలైనంత తొందరగా క్రీజులోకి తిరిగి రావాలని నేను దేవుడిని కోరుకుంటున్నా. రిషబ్ పంత్‌ ప్లేస్‌ని రిప్లేస్ చేయడం చాలా కష్టం.

ఆడకున్నా.. పక్కనే కూర్చోబెట్టుకుంటాం..

రిషభ్ పంత్ వంటి ప్లేయర్లను చెట్టు మీద నుంచి కాయ తెంపినంత ఈజీగా తీసుకురాలేం. అయితే ఇప్పుడు టీమ్‌లో ఉన్న వికెట్ కీపింగ్ బ్యాటర్లే మాకు దిక్కు. వారిలో ఎవరి సత్తాను బట్టి, వారికి అవకాశాలు వస్తాయి.

ఓ కోచ్‌గా డగౌట్‌లో పంత్ నా పక్కనే ఉండాలనుకుంటా. అతను ఫిట్‌గా లేకున్నా.. ఆడకున్నా అతను మా పక్కనే ఉండటాన్ని ఇష్టపడుతాం. ఓ కెప్టెన్‌గా, ఆటగాడిగా అతను ఎంతో సరదాగా ఉంటాడు. ఆటగాళ్లలో స్పూర్తిని నింపుతాడు. తన మాటలతో నవ్వులు పూయిస్తాడు. అతను ప్రయాణించగలిగితే ఐపీఎల్ జరిగినన్ని రోజులు మా డగౌట్‌లో పక్కనే కూర్చోబెట్టుకుంటాం. మార్చి మధ్యలో ఢిల్లీలో కలవాలని అనుకుంటున్నాం. అప్పటికి అతను పూర్తిగా కోలుకుంటాడనే అనుకుంటున్నా'అని పాంటింగ్ చెప్పుకొచ్చాడు.

మోకాలికి సర్జరీ..

గతేడాది డిసెంబర్ 30న రూర్కీ సమీపంలో పంత్ ప్రయాణిస్తున్న కారు ఘోర రోడ్డు ప్రమాదానికి గురైన సంగతి తెలిసిందే. ఈ ప్రమాదంలో తీవ్రంగా గాయపడిన పంత్‌కు స్థానిక ఆస్పత్రిలో ప్రథమ చికిత్స అందించారు. అనంతరం డెహ్రాడూన్‌లోని మ్యాక్స్ ఆస్పత్రికి తరలించారు. అక్కడ చికిత్స చేసిన తర్వాత శస్త్రచికిత్స అవసరం ఉండటంతో అతన్ని ముంబైలోని కోకిలాబెన్ అంబానీ ఆస్పత్రికి తీసుకొచ్చారు. అక్కడే అతనికి పలు ఆపరేషన్లు జరిగాయి. ముఖ్యంగా అతని మోకాళ్లకు శస్త్రచికిత్స జరిగినట్లు తెలుస్తోంది.