మీ రక్షణకు మీరే కెప్టెన్.. జాగ్రత్తగా ఉండి మహమ్మారిని తరిమికొట్టండి: విరాట్ కోహ్లీ

మీరే మీకు రక్షణ..

ప్రతీ ఒక్కరు ఓ కెప్టెన్‌లా తమ కుటుంబాలకు రక్షణగా నిలవాలని ఆర్‌సీబీ కెప్టెన్ విరాట్ కోహ్లీ ప్రజలను కోరాడు. 'హాయ్.. నేను విరాట్ కోహ్లీ. ఒక కెప్టెన్​గా నేను ముందుండి నడిపిస్తాను. నా చుట్టూ ఉన్నవాళ్లకు సహకరిస్తాను. మీరందరు కూడా నాలాగే చేయాలని కోరుతున్నా. చేతులను శుభ్రపరచుకోండి. అవసరమైతేనే బయటకు వెళ్లండి. అన్ని వేళలా మాస్కులు ధరించండి. మీరు ఆరోగ్యంగా ఉండటంతో మీ కుటుంబంతో పాటు చుట్టు పక్కలవారికి రక్షణగా ఉండండి'అని విరాట్ కోహ్లీ విజ్ఞప్తి చేశాడు.

మీరే సూపర్ హీరో

ఈ ఆపత్కాలంలో రక్షించడానికి ఏ సూపర్ హీరో రాడని, ఎవరికి వారే సూపర్ హీరోలా తమ కుటుంబాలను కాపాడుకోవాలని, ఈ వైరస్ నుంచి బయటపడాలని ఏబీ డివిలియర్స్ పిలుపునిచ్చాడు. 'హాయ్.. నేను ఏబీ డివిలియర్స్. ఆపత్కాలంలో సూపర్​హీరో కోసం ఎదురుచూడలేం. మీరే సూపర్​హీరోగా మారాలి. మహమ్మారి వేళ ఇంట్లో ఉండటం ద్వారానే సురక్షితంగా ఉండగలం. అత్యవసరమైతే బయటకు వెళ్లవద్దు. వెళ్తే తప్పనిసరిగా మాస్క్ ధరించండి. భౌతిక దూరంతో పాటు సానిటైజర్స్‌ను వాడండి. అందరం కలిసికట్టుగా దీని నుంచి బయటపడదాం.'అని ఏబీడీ పేర్కొన్నాడు.

కోవిడ్‌ను జయించాలి..

కావాల్సిన ఎంటర్‌టైన్‌మెంట్ అందించాడనికి తామున్నామని, అందరూ జాగ్రత్తగా ఉండి కరోనాను జయించాలని మ్యాక్స్‌వెల్ కోరాడు. 'మీకు వినోదం, సంతోషాన్ని ఇవ్వడమే మా ప్రాధాన్యం. బదులుగా, అందరూ జాగ్రత్తగా ఉండి, కొవిడ్​ను జయించాలని కోరుతున్నా.'అని మ్యాక్స్​వెల్ పేర్కొన్నాడు. దేశంలో వరుసగా మూడవ రోజు మూడు లక్షలకు పైగా పాజిటివ్‌ కేసులు నమోదయ్యాయి. శనివారం విడుదల చేసిన గణాంకాల ప్రకారం శుక్రవారం భారత్‌లో రికార్డు స్థాయిలో 3,46,786 కొత్త పాజిటివ్‌ కేసులు నమోదయ్యాయి.