SRH vs RCB: 8 ఏళ్లు చాలా ఎక్కువ.. కోహ్లీని కెప్టెన్సీ నుంచి తప్పించాలి: గంభీర్

అశ్విన్‌ని చూడండి:

తాజాగా ఈఎస్‌పీఎన్‌ క్రిక్‌ఇన్ఫోతో గౌతమ్‌ గంభీర్‌ మాట్లాడుతూ... 'ఒక్క ఐపీఎల్ టైటిల్ కూడా గెలవకుండా 8 ఏళ్లు కొనసాగడం చాలా ఎక్కువ. రవిచంద్రన్‌ అశ్విన్‌ని చూడండి. కింగ్స్ ఎలెవన్ పంజాబ్‌కు రెండేళ్లే కెప్టెన్‌గా ఉన్నాడు. ఫలితం అనుకూలంగా లేకపోవడంతో తప్పించారు. మనం ఎలాగైతే రోహిత్ శర్మ‌, ఎంఎస్ ధోనీ గురించి మాట్లాడతామో.. విరాట్ కోహ్లీ కూడా అంతే. ధోనీ చెన్నైకి మూడు సార్లు, రోహిత్‌ ముంబైకి నాలుగుసార్లు టైటిల్స్‌ అందించారు. అందుకే ప్రాంచైజీలు వారిని ఇన్నేళ్లుగా కొనసాగిస్తున్నారు. వారి సారథ్యం కూడా బాగుంది' అని చెప్పాడు.

రోహిత్‌ రాణించకపోయి ఉంటే:

'ఒకవేళ రోహిత్‌ శర్మ ఇలాగే (విరాట్ కోహ్లీలా బెంగళూరు జట్టుకు టైటిల్ అందించకపోవడం) ఎనిమిదేళ్లు రాణించకపోయి ఉంటే.. అతడిని కూడా తొలగించేవారే. ఒక్కొక్కరికీ ఒక్కో రూల్ ఉండదు. ఇక్కడ అందరూ సమానమే. మొత్తంగా ఎవరికైనా విజయాలే కావాలి. ఏ సమస్య ఉన్నా, ఏ బాధ్యత అయినా కెప్టెన్‌ నుంచే మొదలవ్వాలి. అది జట్టు యాజమాన్యం లేదా ఇతర సిబ్బంది నుంచి కాదు. ఒక కెప్టెన్‌గా గెలిచినప్పుడు ఎలాగైతే క్రెడిట్‌ దక్కుతుందో.. ఓటమిపాలైనప్పుడు కూడా అలాగే విమర్శలు ఎదుర్కోవాలి' అని టీమిండియా మాజీ ఓపెనర్ గౌతమ్ గంభీర్‌ పేర్కొన్నాడు.

8 ఏళ్లు చాలా ఎక్కువ:

'మేము ప్లేఆఫ్స్‌కు అర్హత సాధించాం, ప్లేఆఫ్స్‌కు వెళ్ళడానికి మేము అర్హులం అని మీరు చెప్పవచ్చు. కానీ ఖచ్చితంగా కాదు. వాస్తవానికి బెంగళూరుకు ప్లేఆఫ్స్‌కు వెళ్లే అర్హత లేదు. నాలుగు వరుస ఓటముల తర్వాత ఆర్సీబీ ప్లేఆఫ్ చేరే అర్హతను కోల్పోయింది. ముంబైతో జరిగిన మ్యాచ్‌లో ఆర్సీబీ అదృష్టంగా కొద్దీ సూపర్‌ ఓవర్‌లో గెలిచింది. 8 ఏళ్లు చాలా ఎక్కువ. విరాట్ కోహ్లీ అనుభవజ్ఞుడైన్నది ఇక్కడ విషయం కాదు. అతడు భారత జట్టుకు సారథి కావొచ్చు.. మరేదైనా కావచ్చు. కానీ మనకు ఫలితాలు కావాలి. ఆట అంటేనే ఫలితాలు' అని గౌతమ్ గంభీర్‌ అన్నాడు.

డివిలియర్స్ కూడా రాణించకపోతే:

'బెంగళూరు ఎక్కువగా కోహ్లీ, డివిలియర్స్‌పైనే ఆధారపడుతోంది. ఈ సీజన్లో ఆర్సీబీ పూర్తిగా విఫలం కాకుండా.. డివిలియర్స్ కొన్ని మ్యాచ్ విన్నింగ్ ఇన్నింగ్స్ ఆడాడు. డివిలియర్స్ కూడా రాణించకపోతే.. బెంగళూరు పరిస్థితి ఎలా ఉండేది?. బెంగళూరు గెలిచిన ఏడు మ్యాచ్‌ల్లో రెండు మూడు మ్యాచ్‌లను డివిలియర్స్ గెలిపించాడు. కానీ కలిసికట్టుగా ఆ జట్టు ఏం చేయలేదు. ఈ విషయంలో గత ఏడాది లాగే ఆడింది. డివిలియర్స్ ఒక్కడి వల్లే ఆర్సీబీ ప్లేఆఫ్ చేరగలిగింది. కానీ ఐపీఎల్‌లో బలమైన జట్టుగా ఉండటానికి ఇదొక్కటే సరిపోదు' అని గంభీర్ చెప్పుకొచ్చాడు. .

SRH vs RCB: ఇప్పుడే చెప్పడం తొందరపాటే.. అయినా చెప్పేస్తున్నా: వార్నర్