స్మృతి మంధాన కీలక నిర్ణయం.. జట్టులోకి స్టార్ క్రికెటర్!

జింబాబ్వే మహిళల జట్టుతో వడోదరలోని బీసీఏ స్టేడియంలో జరుగుతున్న మ్యాచ్‌లో భారత మహిళల జట్టు టాస్ గెలిచి బ్యాటింగ్ ఎంచుకుంది. సిరీస్‌లో ఇప్పటికే ఆధిపత్యాన్ని ప్రదర్శిస్తున్న టీమిండియా ఈ పోరులోనూ భారీ స్కోరు సాధించి పట్టు బిగించాలని భావిస్తోంది. టాస్ గెలిచిన అనంతరం భారత కెప్టెన్ స్మృతి మంధాన మాట్లాడుతూ.. తమ తుది జట్టులో ఓ మార్పు చేసినట్లు వెల్లడించారు. పేసర్ క్రాంతికి విశ్రాంతి కల్పించామని, ఆమె స్థానంలో లెగ్ స్పిన్నర్ వైష్ణవి శర్మను తిరిగి జట్టులోకి తీసుకున్నామని వెల్లడించారు. పిచ్ పరిస్థితుల కంటే క్రాంతికి విశ్రాంతి ఇచ్చి, వైష్ణవికి మరిన్న అవకాశాలు ఇవ్వడమే తమ ప్రధాన ఉద్దేశమని స్పష్టం చేశారు. గత మ్యాచ్‌లో వైష్ణవి అద్భుతంగా బౌలింగ్ చేసిందని, జట్టులో మరో లెగ్ స్పిన్నర్ ఉండటం అదనపు బలాన్ని ఇస్తుందని స్మృతి మంధాన పేర్కొన్నారు.

తెలుగోళ్ల విధ్వంసం.. జైకొట్టిన పాక్ ఫ్యాన్స్.. షాక్‌లో పాకిస్తాన్ మీడియా!

మూడో స్థానంలో షఫాలీ వర్మ కొనసాగింపు
స్టార్ ఓపెన్ షఫాలీ వర్మను మూడో స్థానంలో పంపే వ్యూహాన్ని కొనసాగిస్తున్నట్లు కెప్టెన్ స్మృతి మంధాన వెల్లడించారు. టీ20 సిరీస్ నుంచి షఫాలీ వర్మ అద్భుతమైన ఫామ్‌లో ఉందన్న స్మృతి మంధాన.. గత మ్యాచ్‌లో వేగవంతమైన హాఫ్ సెంచరీ బాదడంతో పాటు బౌలింగ్‌లోనూ కీలక వికెట్లు తీసి జట్టుకు ఉపయోగపడిందని ప్రశంసించారు. ఆమె ఆడే విధ్వంసకర బ్యాటింగ్ కేవలం కొన్ని ఓవర్లలోనే మ్యాచ్ స్వరూపాన్ని మార్చేయగలదని, అందుకే ఈ మ్యాచ్ లోనూ ఆమె మూడో స్థానంలోనే బ్యాటింగ్ కు దిగుతుందని వివరించారు.

బ్యాటింగ్ మెరుగుపరుచుకోవడమే లక్ష్యం: జింబాబ్వే కెప్టెన్
మరోవైపు జింబాబ్వే కెప్టెన్ జోసెఫిన్ ఎన్కోమో మాట్లాడుతూ.. ఈ మ్యాచ్ తమకు అత్యంత కీలకమని పేర్కొన్నారు. తమ జట్టు బ్యాటింగ్‌లో మరింత బాధ్యతాయుతంగా, సానుకూల దృక్పథంతో రాణించాల్సిన అవసరం ఉందన్నారు. ఇన్నింగ్స్ చివరి 5 ఓవర్లలో భారీ స్కోరు సాధించేలా పునాది వేసుకోవడమే తమ ప్రధాన లక్ష్యమని చెప్పారు. ముందుగా బౌలింగ్ చేస్తున్నందున తొలి ఓవర్లలోనే పిచ్‌ను సద్వినియోగం చేసుకుంటూ టీమిండియా ప్రారంభ వికెట్లను తీయడానికి ప్రయత్నిస్తామన్నారు. వడోదర వాతావరణం, తీవ్రమైన వేడి దేశంలో ఉండే పరిస్థితులకే దగ్గరగా ఉన్నందున వాతావరణానికి త్వరగానే అలవాటు పడ్డామని జింబాబ్వే కెప్టెన్ పేర్కొన్నారు.

Also Read

తిలక్ క్లాస్.. నితీష్ మాస్.. తెలుగు కుర్రాళ్ల ఆటకు డీకే ఫిదా!

ఇరు జట్లు:

భారత మహిళల జట్టు: ప్రతీకా రావల్, స్మృతి మంధాన (కెప్టెన్), షఫాలీ వర్మ, హర్మన్‌ప్రీత్ కౌర్, తేజల్ హసబ్నిస్, దీప్తి శర్మ, రిచా ఘోష్ (వికెట్ కీపర్), వైష్ణవి శర్మ, సాయలీ సత్ఘరే, శ్రీ చరణి, జింటిమణి కలితా.

జింబాబ్వే మహిళల జట్టు: మోడెస్టర్ ముపాచిక్వా (వికెట్ కీపర్), లోరిన్ ఫిరి, చిపో ముగేరి-తిరిపానో, బిలవ్డ్ బిజా, జోసెఫిన్ ఎన్కోమో (కెప్టెన్), నియాషా గ్వాంజురా, చియెడ్జా ధురూరూ, మిచెల్ మావుంగా, నోమ్వెలో సిబండా, తెండాయ్ మకుషా, ఒలిండర్ చారే.