తెలుగోళ్ల విధ్వంసం.. జైకొట్టిన పాక్ ఫ్యాన్స్.. షాక్‌లో పాకిస్తాన్ మీడియా!

న్యూజిలాండ్ జట్టుతో జరిగిన రెండో టీ20 మ్యాచ్‌లో భారత యువ ప్లేయర్లు తిలక్ వర్మ, నితీష్ కుమార్ రెడ్డిలు అసాధారణ ఇన్నింగ్స్‌లతో జట్టును గెలిపించిన తీరుకు సరిహద్దుల అవతల ఉన్న పాకిస్తాన్ క్రికెట్ అభిమానులు, మాజీ క్రీడాకారులు ఫిదా అయ్యారు. క్రైస్ట్‌చర్చ్ వేదికగా జరిగిన ఈ ఉత్కంఠ పోరులో ఓ దశలో భారత్ 70 పరుగులకే 5 వికెట్లు కోల్పోయి తీవ్ర కష్టాల్లో పడింది. ఆ సమయంలో క్రీజులోకి వచ్చిన తిలక్ వర్మ, నితీష్ కుమార్ రెడ్డిల జోడీ 69 పరుగుల భాగస్వామ్యాన్ని నెలకొల్పి భారత్ కు అద్భుత విజయాన్నిఅందించారు. ఈ అద్భుత ప్రదర్శనతో భారత్‌లోనే కాకుండా పాకిస్తాన్‌లోనూ ఈ ఇద్దరు తెలుగు ఆటగాళ్లకు భారీగా అభిమానులు ఏర్పడ్డారు.

తిలక్ క్లాస్.. నితీష్ మాస్.. తెలుగు కుర్రాళ్ల ఆటకు డీకే ఫిదా!

ఈ మ్యాచ్‌లో భారత్ ఓ దశలో 112 పరుగులకే 6 వికెట్లు కోల్పోయి ఓటమి అంచున నిలిచింది. చివరి 18 బంతుల్లో విజయం కోసం 48 పరుగులు చేయాల్సిన పరిస్థితి ఏర్పడింది. మ్యాచ్ భారత్ చేతుల్లోంచి దాదాపుగా జారిపోయిందని అందరూ భావించారు. అయితే తిలక్ వర్మ(51 నాటౌట్), నితీష్ కుమార్ రెడ్డి(26) సమయోచితంగా, నిర్భయంగా బ్యాటింగ్ చేస్తూ ఒత్తిడిని జయించి మరో 2 బంతులు మిగిలి ఉండగానే జట్టును విజయతీరాలకు చేర్చారు.

ఈ విజయం సాధించగానే సోషల్ మీడియా వేదికగా పాకిస్తాన్ క్రికెట్ విశ్లేషకులు, యూట్యూబర్లు, మాజీ ప్లేయర్లు భారత్‌పై ప్రశంసల వర్షం కురిపించారు. భారత్ కాకుండా వేరే ఏ జట్టు అయినా 70 పరుగులకే 5 వికెట్లు కోల్పోతే అక్కడ నుంచి గెలవడం అసాధ్యమని పాక్ అభిమానులు అభిప్రాయపడ్డారు. గతంలో పాకిస్తాన్‌పై 33 పరుగులకే 4 వికెట్లు కోల్పోయినప్పుడు కూడా భారత్ ఇలాగే పుంజుకుని గెలిచిన విషయాన్ని వారు గుర్తు చేసుకున్నారు.

Also Read

IND vs NZ: వారి వల్లే ఓడిపోయే మ్యాచ్‌లో గెలిచాం: శ్రేయస్ అయ్యర్

తిలక్ వర్మ ఒత్తిడిలో ఆడిన ఇన్నింగ్స్‌ను చూసిన పాకిస్తాన్ అభిమానులు ఆయనను 'చేజ్ మాస్టర్' విరాట్ కోహ్లీతో పోల్చారు. విరాట్ కోహ్లీ క్లిష్ట సమయాల్లో జట్టును ఎలా గెలిపించేవాడో, తిలక్ వర్మ బ్యాటింగ్‌లో కూడా అదే నిబద్ధత కనిపించిందని కొనియాడారు. అలాగే తిలక్ వర్మకు చక్కటి సహకారం అందిస్తూ గేమ్‌ఛేంజర్‌గా నిలిచిన నితీష్ కుమార్ రెడ్డి ప్రశాంతతను, సమయస్ఫూర్తిని కూడా వారు ఎంతగానో మెచ్చుకున్నారు.

పాకిస్తాన్ క్రీడా మీడియా కూడా ఈ విజయంపై తీవ్ర ఆశ్చర్యాన్ని వ్యక్తం చేసింది. మ్యాచ్ న్యూజిలాండ్ వైపు మొగ్గు చూపిన సమయంలో చివరి 18 బంతుల్లో 48 పరుగులు చేయడం ఓ అద్భుతమని ప్రశంసించింది. భారత క్రికెట్ వ్యవస్థ, యువ ఆటగాళ్ల ధైర్యవంతమైన ఆట తీరును చూసి పాక్ క్రికెట్ వర్గాలు ప్రశంసించకుండా ఉండలేకపోయాయి. ఈ విజయంతో న్యూజిలాండ్ జట్టుపై భారత్ తన ఆధిపత్యాన్ని మరింత బలపరుచుకోగా.. సరిహద్దులు దాటి అభిమానులను సంపాదించుకున్న తిలక్, నితీష్ కుమార్ రెడ్డిల భాగస్వామ్యం ఈ మ్యాచ్‌కే ప్రధాన ఆకర్షణగా నిలిచింది.