IND vs SL: ఔట్ కాకుండానే పెవిలియన్‌కు రిషబ్ పంత్.. అసలేం జరిగింది?

IND vs SL: కొలంబోలోని సింహళీస్ స్పోర్ట్స్ క్లబ్ వేదికగా భారత్, శ్రీలంక జట్ల మధ్య రెండో టెస్ట్ మ్యాచ్ జరుగుతోంది. రెండో టెస్ట్ మ్యాచ్ తొలి రోజే టీమిండియాకు పెద్ద ఎదురుదెబ్బ తగిలింది. టాస్ గెలిచి బ్యాటింగ్ ఎంచుకున్న భారత జట్టుకు ఓపెనర్లు యశస్వి జైస్వాల్, దేవదత్ పడిక్కల్‌తో పాటు కెప్టెన్ శుభ్‌మన్ గిల్ మంచి శుభారంభాన్ని అందించారు. టీమిండియా పటిష్టమైన స్థితిలో ఉన్న సమయంలో బ్యాటింగ్‌కు వచ్చిన స్టార్ వికెట్ కీపర్-బ్యాటర్ రిషబ్ పంత్ దురదృష్టవశాత్తు గాయపడి.. ఔట్ కాకుండానే మైదానాన్ని వీడాల్సి వచ్చింది.

IND vs PAK : భారత్, పాక్ జట్ల మధ్య మ్యాచ్.. ఎప్పుడంటే?

మణికట్టుకు గాయం.. కాసేపు నిలిచిపోయిన మ్యాచ్
భారత స్కోరును మరింత పెంచే క్రమంలో బ్యాటింగ్‌కు దిగిన రిషబ్ పంత్ 15 బంతుల్లో 3 పరుగులు చేసిన ఉన్న సమయంలో ఈ ఊహించని ప్రమాదం జరిగింది. శ్రీలంక పేసర్ లాహిరు కుమార వేసిన 58వ ఓవర్ మొదటి బంతికి రిషబ్ పంత్ పుల్ షాట్ ఆడేందుకు ప్రయత్నించాడు. అయితే షార్ట్ పిచ్‌గా వచ్చిన బంతి రిషబ్ పంత్ గ్లౌవ్‌ను తాకుతూ నేరుగా అతని మణికట్టు ఎముకకు బలంగా తాకింది. దీంతో తీవ్రమైన నొప్పితో రిషబ్ పంత్ మైదానంలో విలవిలలాడాడు. నొప్పి తీవ్రత ఎక్కువగా ఉండటంతో మ్యాచ్ ను కొద్దిసేపు నిలిపివేశారు.

ఫిజియో చికిత్స అందించినా తగ్గని నొప్పి
వెంటనే స్టేడియంలోకి వచ్చిన టీమిండియా ఫిజియో.. మణికట్టు భాగంలో వాపు రాకుండా నివారించడానికి ఐస్ ప్యాక్ తో ప్రథమ చికిత్స అందించారు. ఆ తర్వాత రిషబ్ మణికట్టుకు టేప్ కూడా చుట్టి బ్యాటింగ్ కొనసాగించేలా చూశారు. అయితే నొప్పి అస్సలు తగ్గకపోవడంతో బ్యాట్ సరిగ్గా పట్టుకోలేక రిషబ్ పంత్ ఇబ్బంది పడ్డాడు. ఈ క్రమంలో అంపైర్లతో చర్చించిన అనంతరం మైదానంలో రిస్క్ తీసుకోకూడదని భావించిన రిషబ్ పంత్ రిటైర్డ్ హర్ట్‌‌గా పెవిలియన్‌కు చేరుకున్నాడు.

Also Read

IND vs SL: టెస్టుల్లో సరికొత్త చరిత్ర సృష్టించిన శుభ్‌మన్ గిల్!

టీమిండియా యాజమాన్యంలో పెరిగిన ఆందోళన
తొలి టెస్ట్ రెండో ఇన్నింగ్స్ లో అద్భుత హాఫ్ సెంచరీతో భారత్ విజయంలో కీలక పాత్ర పోషించిన రిషబ్ పంత్.. ఇప్పుడు గాయం కారణంగా ఆట మధ్యలోనే నిష్క్రమించడం జట్టు యాజమాన్యాన్ని ఆందోళనకు గురిచేస్తోంది. మ్యాచ్ గమనాన్ని క్షణాల్లో మార్చేయగల రిషబ్ పంత్ గాయం తీవ్రతపై బీసీసీఐ మెడికల్ టీమ్ స్పష్టత ఇవ్వాల్సి ఉంది. రిషబ్ పంత్ గాయం తీవ్రం కాకూడదని.. త్వరగా కోలుకుని తిరిగి బ్యాటింగ్ కు రావాలని అభిమానులు ఆశిస్తున్నారు.